ەلىمىزدە تاس جولداردىڭ دەر كەزىندە جوندەلمەۋىنە بيتۋم تاپشىلىعى سەبەپ بولىپ وتىرعانى بيىل ءجيى ايتىلدى. مەردىگەرلەر كوكتەم-جاز مەزگىلدەرىندە جول توسەۋگە قاجەتتى ماتەريال تاپشىلىعىنان قيىندىق كورەدى.
مۇنايعا تاپشىلىق جوق ەلدە بيتۋمعا دەگەن مۇقتاجدىق ماسەلەسىن شەشۋ قاجەتتىگى پرەزيدەنت قاسىم-جومارت توقاەۆتىڭ جولداۋىندا دا ايتىلدى. «مەن 2025 جىلعا دەيىن جەرگىلىكتى جولداردىڭ كەمىندە 95 پايىزىن جاقسارتۋ جونىندە تاپسىرما بەردىم. ۇكىمەت بۇل ماسەلەنى تىكەلەي باقىلاۋعا السىن. جول قۇرىلىسىنداعى زاڭسىزدىقتاردى انىقتاۋ قاجەت. بۇل جۇمىستان ناقتى ناتيجە شىعارۋ كەرەك. بىزدە ءالى كۇنگە دەيىن بيتۋم تاپشى. بۇل – ءىرى كولەمدە مۇناي وندىرەتىن ەل ءۇشىن, ءتىپتى ۇيات جاعداي», دەگەن ەدى مەملەكەت باسشىسى.
بيتۋم تاپشىلىعىن بولدىرماۋعا تولەبي اۋدانىندا اشىلعان «كازاحبيتۋم» جشس-نىڭ مۇناي ونىمدەرىن وڭدەۋ زاۋىتىنداعى ۇزدىكسىز پوليمەردى موديفيكاتسيالاۋ تسەحى ءوز سەپتىگىن تيگىزبەك. كيەلىتاس اۋىلدىق وكرۋگى اۋماعىندا ورنالاسقان زاۋىت جىلىنا 200 مىڭ توننادان استام ءونىم وندىرۋگە قاۋقارلى. جوبا قۇنى – 550 ملن تەڭگە. تسەحتا جول جوندەۋ جۇمىستارىنا قولدانىلاتىن ەرەكشە قوسپا وندىرىلەدى.
جاڭا ءوندىرىس ورنىنىڭ اشىلۋ راسىمىنە قاتىسقان وبلىس اكىمى دارحان ساتىبالدى وڭىردە كاسىپكەرلىك سالاسىن ءتيىستى ينفراقۇرىلىممەن قامتاماسىز ەتۋ بويىنشا جۇمىس جۇرگىزىلىپ جاتقانىن اتاپ ءوتتى.
«مەملەكەت باسشىسىنىڭ «10 مىڭ تۇرعىنعا 100 تۇراقتى جۇمىس ورىندارىن اشۋ» جونىندەگى تاپسىرماسىنا سايكەس, وبلىسىمىزدا 10 مىڭنان استام جاڭا جۇمىس ورنىن اشۋ جوسپارلانۋدا. سونىمەن قاتار پرەزيدەنت اۆتوجول قۇرىلىسىنا, سونىڭ ىشىندە جەرگىلىكتى جولداردىڭ ساپاسىنا باسا ءمان بەرۋ كەرەگىن ايتقان بولاتىن. 2025 جىلعا دەيىن جولداردىڭ كەمىندە 95 پايىزىن جاقسارتۋ جونىندە تاپسىرما بەردى. بىزدە ءالى كۇنگە دەيىن بيتۋم تاپشىلىعى بار. اۋدان اۋماعىندا جۇمىس ىستەپ تۇرعان زاۋىتتىڭ جۇمىسىن جانداندىرۋ ارقىلى وبلىستا وسى ماسەلەنى شەشەمىز. بۇگىن ىسكە قوسىلعان پوليمەردى موديفيكاتسيالاۋ تسەحىنىڭ ماڭىزى جوعارى», دەدى وبلىس اكىمى.
جول جۇمىستارىندا كەڭىنەن قولدانىلاتىن بيتۋمنىڭ ءبىر ەرەكشەلىگى – اۋا رايىنىڭ كەز كەلگەن تەمپەراتۋراسىنا بەيىم. جول توسەنىشىنىڭ بىركەلكىلىگىن جانە ءتۇرلى دەفورماتسيالانۋدان ساقتايدى. پوليمەرلى بيتۋمدى پايدالاناتىن اسفالتبەتون قوسپاسى جولدى توزىپ كەتۋدەن قورعايدى. تسەحتا جەرگىلىكتى تۇرعىندار تۇراقتى جۇمىسپەن قامتىلعان.
ايتا كەتەلىك, اۋداندا كاسىپكەرلىك سالاسىندا جۇمىس ىستەپ تۇرعان سۋبەكتىلەر سانى – 7 882, بۇل سالادا 16 699 ادام جۇمىسپەن قامتىلعان. كىشى جانە ورتا بيزنەستى دامىتۋ ءۇشىن جىل باسىنان جەكە ازاماتتارعا 3 ملرد 921 ملن تەڭگەنىڭ نەسيەسى بەرىلدى. «بيزنەستىڭ جول كارتاسى-2025» بيزنەستى قولداۋ مەن دامىتۋدىڭ مەملەكەتتىك باعدارلاماسى شەڭبەرىندە جاڭا بيزنەس-يدەيالاردى ىسكە اسىرۋعا مەملەكەتتىك گرانتتار بەرۋ بويىنشا اۋداننان 38 جوبا قاتىسىپ, ونىڭ ىشىنەن ىرىكتەۋدەن جالپى 10,0 ملن تەڭگەگە 2 جوبا وتكەن. جوبالار جىلدىڭ سوڭىنا دەيىن «دامۋ» قورى ارقىلى قارجىلاندىرىلادى. سونداي-اق اۋداندا «جايلى مەكتەپ» ۇلتتىق جوباسى اياسىندا بىرنەشە مەكتەپ سالىنادى. لەڭگىردە – 1 500 ورىندىق, ءبىرىنشى مامىر ەلدى مەكەنىندە – 1 500, دوستىقتا – 900, كوكسايەك اۋىلىندا – 600, سونداي-اق قوساعاشتا 600 ورىندى جاڭا مەكتەپتەردىڭ كۇرىلىسى جوسپارلانىپ وتىر. ال «اۋىل – ەل بەسىگى» جوباسى اياسىندا 2022 جىلى 6 ەلدى مەكەندە 6 جوبا ىسكە اسىرىلۋدا. اۋداننىڭ ينجەنەرلىك ينفراقۇرىلىم جۇيەسىن دامىتۋ ماقساتىندا 19 بيۋدجەتتىك ينۆەستيتسيالىق جوبا جۇزەگە اسىرىلۋدا. اۋدان حالقىنىڭ 99,8%-ى اۋىز سۋمەن, 109 مىڭ تۇرعىن تابيعي گازبەن قامتىلعان. لەڭگىر قالاسىندا 5 قاباتتى 20 پاتەرلى تۇرعىن ءۇيدىڭ قۇرىلىس جۇمىستارى جۇرگىزىلۋدە.
تۇركىستان وبلىسى