ەلوردادا جاڭا پەريناتالدىق ورتالىقتار سالىنادى

«مەديتسينالىق مەكەمەلەردىڭ باسشىلارىمەن مەدكومەكتىڭ ساپاسىن ارتتىرۋ جانە مەدورتالىقتاردى ودان ءارى جاراقتاندىرۋ ماسەلەسىن تالقىلادىق. وسىعان دەيىنگى كەزدەسۋدە مەديتسينا قىزمەتكەرلەرىمەن ءارى تۇرعىندارىمىزبەن اتقارىلۋى ءتيىس جۇمىس جوسپارى جاسالعان. ولاردىڭ باسىم بولىگىن ورىندادىق», دەپ جازدى اكىم ينستاگرام پاراقشاسىندا.

كەزدەسۋ بارىسىندا مەدنىساندار سالۋ جانە جوندەۋ, كادرلاردى دايارلاۋ, وبەكتىلەردى تولىق جاراقتاندىرۋ, «قاۋىپسىز اۋلا» جوباسىن ەنگىزۋ سىندى ماسەلەلەر قوزعالعان. 

سونداي-اق قالا اكىمى تالقىلانعان ماسەلەلەر مەن اتقارىلعان جۇمىستار تۋرالى جازدى. 

ءبىرىنشى. دەنساۋلىق ساقتاۋ جۇيەسىنىڭ ينفراقۇرىلىمىن دامىتۋ

ەلوردانىڭ اۋقىمدى جوبالارىنىڭ ءبىرى تج اۋرۋحاناسىنىڭ (№3 كوپسالالى قالالىق اۋرۋحانا) «Ramada Plaza» عيماراتىنا كوشۋى. ەسكى تج اۋرۋحاناسىنىڭ اۋماعىنا جاڭا پەريناتالدىق ورتالىق سالىنادى. الماتى اۋدانى – №1 كوپسالالى قالالىق اۋرۋحاناسىنىڭ جانىنان تاعى ءبىر پەريناتالدىق ورتالىق تۇرعىزىلادى.

بىرقاتار مەديتسينالىق مەكەمەگە جوندەۋ جۇرگىزۋ, «جاعالاۋ-3» جانە «نۇرلى جول» ۆوكزالى اۋدانىندا امبۋلاتوريالىق-ەمحانالىق كەشەندەرىنىڭ, كوكتال-1, پريگورودنىي, تەلمان جانە ت.ب. ەلدى مەكەندەردە العاشقى مەديتسينالىق-سانيتارلىق كومەك ورتالىقتارىنىڭ قۇرىلىسى جوسپارلانعان.

ەكىنشى. مەديتسينا قىزمەتكەرلەرىنە جاعداي جاساۋ

كەلەسى جىلى دارىگەرلەردىڭ جالاقىسىن تاعى 35%-عا, ال ورتا بۋىن مەديتسينا قىزمەتكەرلەرىنىڭ جالاقىسىن 10%-عا ارتتىرۋ جوسپارلانعان.

كادرلاردى جۇمىلدىرۋ ءۇشىن ارنايى گرانتتار بولىنەدى. سونداي-اق مەديتسينا قىزمەتكەرلەرىنە ارناپ جاتاقحانا سالۋ جوسپارلانعان.

ءۇشىنشى. ماتەريالدىق-تەحنيكالىق بازا

سوڭعى 3 جىلدا مەديتسينا مەكەمەلەرى 3 مىڭعا جۋىق ارنايى جابدىقپەن جابدىقتالعان. ولار: ۋلترادىبىستىق اپپاراتتار, كومپيۋتەرلىك توموگرافتار, جەلدەتكىشتەر, جىلجىمالى فليۋوروگرافيالىق كەشەندەر, تسيفرلى رەنتگەنوگرافيالىق جۇيەلەر جانە ت.ب. بۇل جۇمىس ءارى قاراي دا جالعاسىن تابادى.

ءتورتىنشى. جەدەل مەديتسينالىق جاردەم ستانتسياسى

بيىل جەدەل مەديتسينالىق جاردەم ستانتسياسىنا 55 ارنايى ماشينا بەرىلگەن.