ستۋدەنتتىڭ ايلىق تابىسى 1 ميلليون

ب.ايتەن – سىر ءوڭىرىنىڭ تۋماسى. قىزىلوردادا 6 سىنىپقا دەيىن ءبىلىم الىپ, كەيىن الىپ شاھار الماتىدا وقىعان. 2019 جىلى قاسكەلەڭدەگى سدۋ-عا تۇسكەن. بۇگىنگى تاڭدا ينجەنەرلىك جانە جاراتىلىستانۋ عىلىمدارى فاكۋلتەتىندە «كومپيۋتەرلىك عىلىمدار» ماماندىعى بويىنشا وقيدى. ال ونىڭ ينجەنەرياعا دەگەن قىزىعۋشىلىعى بالا كەزىندە باستالعان. ويىنىڭ ۇشقىرلىعىن ۋنيۆەرسيتەت قابىرعاسىندا ۇشتاپ, ۇستازى نازيم يبراگيموۆتىڭ جەتەكشىلىگىمەن اسسيستەنت رەتىندە وقۋ ورداسىنىڭ ىشىندە ورنالاسقان تەحنوپاركتە ينجەنەريا ىسىمەن اينالىسادى. ونىڭ ايتۋىنشا, بۇل ورىن – روبوتتەحنيكانى مەڭگەرگەن ماماندارعا تاپتىرماس مۇمكىندىك. مۇندا كەز كەلگەن ستۋدەنت ءوزىنىڭ يدەياسىن شىن مانىندە جۇزەگە اسىرا الادى.

تەحنوپاركتە كۇنى-ءتۇنى جۇمىس ىستەۋىنىڭ ارقاسىندا بەكسۇلتان ايتەن بۇگىندە كەڭىستىكتى قاناتىمەن باعىندىراتىن درون ويلاپ تاپقان. ونىسى جاي ۇشاتىن قۇرىلعى ەمەس, تاماق جانە باسقا دا جۇكتەردى تاسىمالدايدى. جاس كاسىپكەردىڭ بۇل جوباسىنا بۇگىندە جەڭىل تاماق ونىمدەرىن دايىندايتىن, قازىرگى زاماننىڭ تىلىمەن ايتقاندا, «فاست-فۋدپەن» اينالىساتىن كومپانيالار قىزىعۋشىلىق تانىتىپ وتىر. ونىڭ ايتۋىنشا, وسىنداي باعىتتا قىزمەت ەتەتىن كۋرەرلەر كۇنىنە 20 شاقتى تاپسىرىس ورىنداپ, ايىنا 200-300 مىڭ تەڭگە تابىس تابادى.

بەكسۇلتاننىڭ باستاماسىمەن ونىڭ كومانداسى بىرىگىپ جاساعان درونداردىڭ ناقتى سانى قازىرگى ۋاقىتتا التىعا جەتكەن. ولاردىڭ ءاربىرىنىڭ اتقاراتىن قىزمەتى مەن كوتەرەتىن جۇك شاماسى ءبىر-بىرىنە ۇقسامايدى. ماسەلەن, بىرەۋى تاماق تاسىسا, ەكىنشىسى اۋەدەن تۇسىرەدى, كەلەسى بىرەۋلەرى سۋ تاسيدى, ءدارى سەبەدى دەگەن سياقتى. سونىڭ ىشىندە سۇرانىسقا يە بولىپ وتىرعانى – جوعارىدا اتالعان تاسىمالداۋشى مىندەتىن اتقاراتىن قۇرىلعىلار.

ديدار مالىك ۇلى

الماتى وبلىسى,

قاسكەلەڭ قالاسى