قازاقستان رەسپۋبليكاسىنىڭ پرەزيدەنتتىگىنە كانديدات جيگۋلي دايراباەۆ الماتى قالاسىنىڭ ىرگەسىندەگى نۇرا اۋىلىنداعى سايلاۋشىلارمەن كەزدەستى.
نۇرا اۋىلى – الماتى قالاسىنان 42 شاقىرىم جەردە ورنالاسقان ەلدى مەكەن. اۋىلداعى باستى ماسەلە – جۇمىسسىزدىق. تۇرعىنداردىڭ باسىم بولىگى كۇن سايىن الماتى قالاسىنا قاتىناپ جۇمىس ىستەيدى. قالا ىرگەسىندەگى اۋىل سانالاتىندىقتان وقۋ ورىندارى ستۋدەنتتەرگە جاتاقحانادان ورىن بەرمەي, جاستار كۇن سايىن قالاعا بارىپ-كەلىپ وقۋعا ءماجبۇر.
الايدا اۋىل مەن الماتى اراسىندا اۆتوبۋستىڭ جۇرمەگەنىنە ءتورت جىلداي ۋاقىت بولعان. بۇل ماسەلەنى شەشۋگە بيلىك ق ۇلىق تانىتپاعان. «اۆتوموبيل كولىگى تۋرالى» زاڭ بويىنشا قالا ماڭىنداعى ەلۋ شاقىرىمعا دەيىنگى ەلدى مەكەن قالالىق قوعامدىق كولىكپەن قامتاماسىز ەتىلۋى كەرەك بولسا دا, سوت شەشىمى شىقسا دا, ماسەلە ورىندالار ەمەس. الماتى قالاسىنىڭ اكىمدىگى سوت شەشىمىن ورىنداۋدىڭ ورنىنا قارسى شاعىم جازىپ الەك. اتالعان اۋىلدا سۋ, جارىق, دەنساۋلىق ساقتاۋ, ءبىلىم بەرۋ ماسەلەلەرى دە وزەكتى.
«الماتى مەن نۇرا اۋىلى اراسىنداعى اۆتوبۋس قاتىناسىنىڭ ماسەلەسىنە «اۋىل» پارتياسى ارالاسىپ, سوتتا اۋىل تۇرعىندارىنىڭ پايداسىنا شەشىم شىعارىلعانىن بىلەسىزدەر. دەسەك تە قوعامدىق كولىك ماسەلەسى ءالى دە شەشىلگەن جوق. الەمدىك قاۋىمداستىق مەملەكەت مارتەبەسىن مەگاپوليستەرمەن ەمەس, الىستاعى اۋىلدىڭ احۋالىمەن ولشەيدى», دەدى جيگۋلي دايراباەۆ.