قازاقستان رەسپۋبليكاسى پرەزيدەنتتىگىنەن ۇمىتكەر قاسىم-جومارت توقاەۆتىڭ رەسپۋبليكالىق قوعامدىق شتابى قىزىلوردا وبلىسىندا كەزدەسۋلەر وتكىزدى.
كاسىپكەرلەرمەن جانە اگرارلىق سەكتور وكىلدەرىمەن كەزدەسۋدە شتاب مۇشەلەرى وڭىردەگى كولىك جانە الەۋمەتتىك ينفراقۇرىلىمدى دامىتۋ ماسەلەلەرىن تالقىلادى. بۇدان سوڭ قىزىلوردا جىلۋ ەلەكتر ورتالىعىنىڭ ۇجىمىمەن كەزدەسۋ ءوتتى. كەزدەسۋ بارىسىندا شتاب مۇشەلەرى كانديداتتىڭ كوممۋنالدىق شارۋاشىلىق سالاسىندا ۇسىنعان رەفورمالارى, تۋرالى ايتىپ بەردى.
بۇل كۇنى شتاب مۇشەلەرى ايتىسكەرلەرمەن جانە جىرشىلارمەن كانديداتتىڭ مادەنيەت پەن ونەردى دامىتۋعا, سونداي-اق حالىقارالىق ارەنادا قازاقستاندى بەيبىتشىلىك پەن كەلىسىم, ىزگىلىك پەن تولەرانتتىلىق ەلى رەتىندە تانىتۋعا باعىتتالعان سايلاۋالدى باستامالارىن تالقىلادى.
«قازىر ءبىزدىڭ ەلىمىز دامۋدىڭ جاڭا كەزەڭىن باستان وتكەرىپ جاتىر جانە حالىقتىڭ ەرتەڭگى كۇنگە دەگەن سەنىمى زور. ادىلدىك بار جەردە حالىقتىڭ ىنتىماعى دا, ءوزارا اۋىزبىرشىلىگى دە بەكەم. مۇنداي قوعامنىڭ تۇراقتى داميتىنى دا ءسوزسىز. مەملەكەتىمىزدى ساقتاۋ, تاۋەلسىزدىگىمىزدى باياندى ەتۋ ادىلەتتى قازاقستان قۇرۋدى تالاپ ەتىپ وتىر. ادىلەتتى قازاقستان قۇرۋ ءۇشىن ەڭ الدىمەن بۇكىل قوعامدى وزگەرتىپ, وعان بارشامىز اتسالىسۋىمىز كەرەك. بارلىعىمىز الداعى سايلاۋعا بەلسەندى قاتىسۋىمىز قاجەت, سەبەبى ەلىمىزدىڭ ەرتەڭگى تاعدىرى ءاربىرىمىزدىڭ داۋىسىمىزعا بايلانىستى», دەدى جىرشى ۇلجان بايبوسىنوۆا.