ارۋجان تۇركيادا توپ جاردى

تايپەيلىك يۋ-يۋن ليمەن جۇپتاسىپ ونەر كورسەتكەن 17 جاستاعى Team Kazakhstan اكادەمياسىنىڭ تۇلەگى بارلىق قارسىلاسىن سىپىرا ۇتىپ, فينالدا رەسەيلىك اناستاسيا مەن رادا زولوتارەۆالاردان 7:5, 3:6, 10:4 ەسەبىمەن باسىم ءتۇستى. وسىلايشا, قازاق قىزى ءوزىنىڭ سپورتتىق مانسابىندا العاش رەت ەرەسەكتەر اراسىنداعى ITF تۋرنيرىندە باس جۇلدەنى ولجالادى. «وسىنداي ەلەۋلى تابىسقا جەتكەنىمە قاتتى قۋانىپ وتىرمىن. ءدال قازىر قانداي سەزىمدە ەكەنىمدى ءدوپ باسىپ ايتۋدىڭ ءوزى قيىن. بۇل مەن ءۇشىن بيىلعى ماۋسىمداعى ەڭ قۋانىشتى ءسات. ءسوز ورايى كەلگەندە ماعان ۇنەمى قولداۋ كورسەتىپ جۇرگەن قازاقستان تەننيس فەدەراتسياسىنا, سول ۇيىمنىڭ پرەزيدەنتى بولات وتەمۇراتوۆقا جانە ءوزىمنىڭ جەكە باپكەرىم رۋسلان مۇحامەدزيانوۆقا شەكسىز العىسىمدى بىلدىرگىم كەلەدى», دەپ ارۋجان اعىنان جارىلدى.

جەكەلەگەن سايىستا ارۋجان ساعىندىقوۆا شيرەك فينالعا دەيىن جەتتى. سول مەجەدە ول سەربيالىق ناتاليا سەنيچكە 6:3, 1:6, 5:7 ەسەبىمەن ەسە جىبەردى.