جەڭىلىستىڭ اششى ساباعى

2015 جىلدان بەرى كاسىپ­قويلار اراسىندا كۇش سىنا­سىپ جۇرگەن 30 جاستاعى قاندا­سىمىز سول كەزدەن بەرى 16 كەز­دە­سۋ وتكىزىپ, بارلىعىندا جەڭىسكە جەتتى. 11 كەزدەسۋدى مەر­زىمىنەن بۇرىن اياقتادى. وسى تابىستارىنىڭ ارقاسىندا ايدوس الەم چەمپيونى اتاعى ءۇشىن تالاسۋ مۇمكىندىگىنە يە بولدى. قارسىلاسى ودان التى جاس كىشى. دەسەك تە مايتالمان مامانداردىڭ تاراپىنان دەۆيد موررەلدىڭ الەۋەتى وتە جوعا­رى باعالانۋدا. كۋبادا تۋىپ-ءوسىپ, كەيىننەن اقش-قا قونىس اۋدارعان ول ءوزىنىڭ مىقتىلىعىن بىردەن مويىنداتتى. كاسىپقوي رينگتە نەبارى جەتى جەكپە-جەك وتكىزگەنىنە قاراماستان, دەۆيد الەم چەمپيونى اتانىپ قانا قويماي, وزىنە تيەسىلى التىن بەلبەۋىن ءۇش مارتە ءساتتى قورعادى.

ميننەاپوليستەگى باسەكەدە موررەلدىڭ باسىمدىعى بىر­­دەن بايقالدى. كۋبالىق قابى­لان ءوزىنىڭ بويى مەن قولىنىڭ ۇزىندىعىن ۇتىمدى پايدالاندى. قانداسىمىزعا قاراعان­دا الدەقايدا جىلدام ءارى ءابجىل قيمىلداعان ول ۇنەمى ونىڭ الدىن وراپ وتىردى. سوققىلارىن ءجيى دارىتىپ, ءدال تيگىزە ءبىلدى. شىنى كەرەك, العاشىندا ءبىز ەربوسىن ۇلى «بۇل ەكپىنگە شىدامايتىن شىعار» دەپ ويلادىق. ويتكەنى باستاپقى راۋندتاردىڭ وزىندە دەۆيدتىڭ بىرنەشە سوققىسى وعان وڭباي ءتيدى. سول كەشتە اۋىر اپپەركوتتار مەن جويقىن حۋكتار­دىڭ سان ءتۇرىن كوردىك. كەيبىرى تىپتەن ايدوستى ەسەڭ­گىرەتىپ تاستاعانداي كورىندى. ونىڭ ۇستىنە, جەرلەسىمىزدىڭ كەڭ­سىرى­گىنەن كەتكەن قاندى توقتاتۋ دا وڭاي بولمادى.

بىراق ايدوس ەر ەكەن. قان­شاما اۋىر سوققى السا دا, بارىنە شىداپ باقتى. بەتى قانعا بويالىپ, كوزى كورۋدەن قالسا دا, سوڭىنا دەيىن ايقاستى. قارسىلاسىن ايقىن جەڭە المايتىنىنا كوزى جەتكەن موررەل 12 راۋندا باستالعان بەتتە ايلاعا جۇگىندى. اڭعال ايدوس ابايسىز­دا جاسالعان بەلدەن تومەن سوققى­سى ءۇشىن كەشىرىم سۇراپ تۇرعان ساتتە دەۆيد ونى ۇرىپ قۇلاتتى. تورەشى نوكداۋن بەلگىلەدى. بۇل جەردە ءبىز بوستاندىق ارالى وكىلىن كىنالاۋدان اۋلاقپىز. بارلىق كىنا – ايدوستىڭ وزىندە. بوكسشى قانداي كەزدە دە بارىنە دايىن جانە ساق بولۋى كەرەك. بۇل – بوكستىڭ زاڭدىلىعى! ءدال وسى سوققىدان كەيىن ەربو­سىن ۇلى ءوز-وزىنە كەلە المادى. باسەكەنىڭ اياقتالۋىنا ساناۋلى عانا سەكۋندتار قالعاندا دەۆيد موررەل قازاق بوكسشىسىن وڭ قولىمەن وڭدىرماي ۇرىپ, اۋىر نوكاۋتقا جىبەردى.

ءدال وسى جارىستىڭ اندەركاردىندا ابىلايحان ءجۇسىپوۆ تە كۇش سىناستى. اۋەسقويلار اراسىندا الەم چەمپيوناتىندا ءۇش رەت قولا مەدالدى يەلەنگەن قانداسىمىز كاسىپقوي رينگتەگى ءۇشىنشى كەزدەسۋىندە جەڭىسكە جەتتى. بۇل جولى ول امەريكالىق دەماركۋس لەيتوندى (8-3-1, 5 كو) ەكىنشى راۋندتا ەسىنەن تاندىردى.