اپات ايتىپ كەلمەيدى

«جەر استىنداعى 106 ادام­نىڭ 9-ى زارداپ شەكتى. 4-ەۋى – اۋ­رۋحانادا, 5 ادام قازا تاپتى. قازىر اپاتتىق-قۇتقارۋ جۇمىس­تارى جۇرگىزىلىپ جاتىر. ءبىز قازا تاپقان كەنشىلەردىڭ وتباسى­لارىنا كوڭىل ايتا­مىز. زار­داپ شەككەندەردىڭ بارلى­عىنا ءتيىستى كومەك كورسەتىلەدى», دەيدى «ارسەلورميتتال تەمىر­تاۋ» اق كومىر دەپارتامەن­تىنىڭ ديرەكتورى ارمان قالىقوۆ.

«كااقق روش» جشس قارا­عاندى فيليالىنىڭ التى قۇت­قا­رۋشى بولىمشەسى – 35 قۇتقارۋشى 830 مەتر تەرەڭ­دىكتە قۇتقارۋ جۇ­مىستارىنا جۇمىل­دىرىلدى. قۇت­قارۋشىلاردىڭ ايتۋىنشا, اپات اياق استىنان شىققاندىقتان كەنشىلەر ءوزىن-ءوزى قۇتقارۋ قۇ­رىل­عىلارىنا قوسىلا الماي قالعان.

– العاشقىدا ءۇش ادامنىڭ دەنەسىن تاپتىق. ءبىراز ۋاقىتتان كەيىن تاعى بىرەۋىن, سودان سوڭ بەسىنشى كەنشىنى تاۋىپ الدىق. اپات كەنەتتەن بولعاندىقتان كەنشىلەر ءوزىن-ءوزى قۇتقارۋ قۇرىل­عىلارىنا قوسىلىپ ۇلگەر­مەگەن, – دەدى «كااقق روش» جشس قاراعاندى فيليالى دي­رەك­تورىنىڭ ورىنباسارى جۇمات وكەنوۆ.

العاشقىدا اپات ورنىنان شاح­تينسك قالاسىنىڭ ورتالىق اۋرۋ­حا­­ناسىنا زارداپ شەككەن 4 ادام جەت­كىزىلدى. ونىڭ ەكەۋىنە مەتانمەن ۋ­لانعان دياگنوزى الدىن الا قويىلىپ, ح.ماقاجانوۆ اتىنداعى كوپبەيىندى اۋرۋحانانىڭ توكسيكولوگيا بولىمىنە دەرەۋ اۋىستىرىلعان-دى. دارىگەرلەر كونسيليۋمىنان سوڭ قالعان ەكى كەنشى دە وسى اۋرۋحاناعا الدىرىلدى. سەبەبى ولاردا ۋلانۋمەن قاتار باستىڭ اشىق جاراقاتى بار.

– ەكى ناۋقاستا باستىڭ اشىق جارا­قاتى جانە ۋلانۋ بار. ولاردى وپەرا­تسيا­عا دايىنداۋدا. ءبىر ساعاتتان سوڭ وپەراتسيا جاسالادى. ەستەرىن بىلەدى. دەگەنمەن جاعدايلارى اۋىر, رەانيماتسيادا. جاراقاتتىڭ اۋىرلىعىن ەسكەرسەك, ناقتى بولجام جاساۋ قيىن, – دەدى ح.ماقاجانوۆ اتىنداعى كوپبەيىندى اۋرۋحانا ديرەكتورىنىڭ ەمدەۋ ءىسى جونىندەگى ورىنباسارى تالعات جۇكەن. قالعان ەكى كەنشىنىڭ جاعدايى تۇراقتى.

قاراعاندى وبلىستىق پوليتسيا دەپارتامەنتىنىڭ ءباسپاسوز قىزمەتى لەنين اتىنداعى شاحتاداعى توتەنشە جاعدايعا بايلانىستى قازاقستان رەسپۋبليكاسى قىلمىستىق كودەكسىنىڭ 277-بابى 3-تارماعىنا سايكەس قىل­مىس­تىق ءىس قوزعالعانىن حابارلادى. وقيعا ورنىندا قاراعاندى وبلىستىق پوليتسيا دەپارتامەنتىنىڭ جەدەل-تەرگەۋ توبى تەرگەۋ جۇمىس جۇرگىزۋدە.

ال مەملەكەت باسشىسى قاسىم-جومارت توقاەۆ قازا تاپقان جۇمىسشىلاردىڭ وتباسىلارى مەن جاقىندارىنا كوڭىل ايتۋ جەدەلحاتىن جولدادى.

«ارسەلورميتتال تەمىرتاۋ» اك­­تسيو­نەرلىك قوعامىنىڭ شاحتاسىندا بول­عان اپات سالدارىنان قازا تاپ­قان جۇمىسشىلاردىڭ وتباسىلارى مەن جاقىندارىنىڭ قايعىسىنا ور­تاق­تا­سىپ, كوڭىل ايتامىن. زارداپ شەككەن ازاماتتاردىڭ تەزىرەك ساۋىعىپ كەتۋىنە تىلەكتەستىك بىلدىرەمىن. ۇكى­مەت­­كە جانە قاراعاندى وبلىسىنىڭ اكى­مىنە اپات سەبەپتەرىن انىقتاۋ ءۇشىن شۇعىل شارالار قابىلداۋدى جانە قايتىس بولعان جانە زارداپ شەككەن ازاماتتاردىڭ وتباسىلارىنا ءتيىستى كومەك كورسەتۋدى تاپسىردىم», دەپ جازىلعان جەدەلحاتتا.

اپاتتىڭ سەبەپتەرىن انىقتاۋ ءۇشىن توتەنشە جاعدايلار ءمينيسترى يۋري يلين باسقارعان ۇكىمەتتىك كوميسسيا قۇرىلدى. قازا بولعان كەنشىلەر وتباسىنا وبلىس اكىمى جەڭىس قاسىمبەك تە كوڭىل ايتىپ, كومەك كورسەتىلەتىنىن جەتكىزدى.

قازا تاپقان كەنشىلەردىڭ جاسىنىڭ الدى 42-دە بولسا, ەڭ جاسى 26-دا.

لەنين اتىنداعى شاحتادا قازا تاپقاندار ءتىزىمى

بويچەنكو دميتري يگورەۆيچ, 1991 جىلى تۋعان, جەراستى بۇرعىلاۋ قوندىرعىسىنىڭ ءماشينيسى. جۇمىس ءوتىلى – 8 جىل. ارتىندا اناسى قالدى. سانجاروۆ اندرەي پاۆلوۆيچ, 1980 جىلى تۋعان, جەراستى بۇرعىلاۋ قوندىرعىسىنىڭ ءماشينيسى. جۇمىس ءوتىلى – 21 جىل. اتا-اناسى مەن ەكى بالاسى قالدى. ينكين دەنيس اناتولەۆيچ, 1984 جىلى تۋعان, جەراستى بۇرعىلاۋ قوندىرعىسىنىڭ ءماشينيسى. جۇمىس ءوتىلى – 13 جىل. مارقۇمنىڭ سوڭىن­دا اكەسى, جۇبايى, قىزى جانە اسىراۋىن­داعى تاعى ءبىر ادام قالدى. قاشكەي ارمان قادىرجان ۇلى, 1993 جىلى تۋعان, جەراستى بۇرعىلاۋ قوندىرعىسىنىڭ ءماشينيسى. جۇمىس ءوتىلى – 8 جىل. ارتىندا اتا-اناسى قالدى. ىنتىبەكوۆ مارعۇلان سەرىك ۇلى, 1996 جىلى تۋعان, بۇرعىلاۋ قوندىر­عىسى ءماشينيسىنىڭ كومەكشىسى. جۇمىس ءوتىلى – ەكى اي. مارقۇمنىڭ ارتىندا اكەسى قالدى.

ەسكە سالا كەتەيىك. بىلتىر, دالى­رەك ايتقاندا, وسى ۋاقىتتا قارا­شانىڭ 7-ىندە ساعات 08.30-دا اباي شاح­تا­سىن­داعى جارىلىستان 6 ادام قازا تاپقان-دى. مۇندا اپاتقا كومىر مەن گازدىڭ كەنەتتەن جارىلۋى سەبەپكەر بولعان ەدى.

 

قاراعاندى وبلىسى