قازاقستان رەسپۋبليكاسى پرەزيدەنتتىگىنە كانديدات سالتانات تۇرسىنبەكوۆا ءوزىنىڭ سايلاۋالدى ۇگىت-ناسيحات ساپارىندا تۇركىستانداعى «بەلسەندى ۇزاق ءومىر ءسۇرۋ ورتالىعىنداعى» زەينەتكەرلەرمەن كەزدەستى.
رەسمي مالىمەت بويىنشا, قازاقستاندا زەينەت جاسىنداعى 2,25 ميلليونعا جۋىق ازامات بار. «بۇل بەلگىلى ءبىر پروبلەمالارى مەن قاجەتتىلىكتەرى بار ادامدار. بەلسەندى جانە اقىل-ويى تولىسقان جاندار. مەنىڭ ماقساتىم – امەريكالىقتار نەمەسە قىتايلىقتار سياقتى قازاقستانداعى وسى جاستاعى ازاماتتاردىڭ ەۋروپاداعى مۇراجايلاردى كورۋ ءۇشىن دەمالىسقا شىعۋىنا نەمەسە افريكاعا سافاريگە بارۋىنا مۇمكىندىك جاساۋ. بارلىق ازاماتتار ءۇشىن لايىقتى جانە قاۋىپسىز قارتتىق – مەنىڭ ارمانىم», دەدى سالتانات تۇرسىنبەكوۆا.
كانديدات ورتالىققا كەلۋشىلەرمەن بىرگە سپورت جاتتىعۋلارىن جاساپ, اڭگىمەلەسىپ, ءتىپتى بي بيلەدى. مۇنداعى ايەلدەردىڭ دەنساۋلىعى جاقسى. ولار سپورتتىڭ كەز كەلگەن ءتۇرىن ەركىن مەڭگەرىپ, قيىن دەگەن جاتتىعۋلاردى وپ-وڭاي ورىندايدى. دەگەنمەن, ولاردى الاڭداتاتىن ءبىر جايت بار. زەينەتاقىنىڭ ازدىعى, مەملەكەت تاراپىنان جاقسى الەۋمەتتىك قولداۋدىڭ جوقتىعى, باسپانا تاپشىلىعى, كەيبىرەۋىن جالعىزدىق مۇڭايتادى. سالتانات تۇرسىنبەكوۆا ورتالىق مۇشەلەرىنىڭ بارلىق ارىز-شاعىمدارى مەن وتىنىشتەرىن تىڭداپ, زەينەتكەرلەرگە كومەكتەسۋ جانە تۇرمىسىن جاقسارتۋ ماقساتىندا ەڭ تومەنگى جالاقى مەن كۇنكورىس دەڭگەيىن ارتتىرۋدى (زەينەتاقى جيناقتارى مەن جاردەماقىلار), قيىن ومىرلىك جاعدايعا تاپ بولعان وتباسىلاردىڭ قارىزدارىن جويۋدى نازارعا الاتىنىن جەتكىزدى.