قازاقستان رەسپۋبليكاسى پرەزيدەنتتىگىنە كانديدات قاسىم-جومارت توقاەۆتىڭ جاقتاستارى الماتى وبلىسىنىڭ تۇرعىندارىمەن كانديداتتىڭ باعدارلاماسىنداعى الەۋمەتتىك باسىمدىقتاردى تالقىلادى.
وتەگەن باتىر اۋىلىندا بالالار كلينيكالىق اۋرۋحاناسىنىڭ قىزمەتكەرلەرىمەن كەزدەسۋ ءوتىپ, جيىن بارىسىندا كانديداتتىڭ سايلاۋالدى باعدارلاماسىندا كورسەتىلگەن ۇلتتىق دەنساۋلىق ساقتاۋ جۇيەسىن دامىتۋدىڭ نەگىزگى ماقساتتارى تالقىلاندى.
«الماتى وبلىسى – ەلىمىزدەگى ەڭ ءىرى وڭىرلەردىڭ ءبىرى. ايماق حالقىنىڭ 85 پايىزى اۋىلدا تۇرادى. مۇندا دا بارلىق وزگە وڭىردەگىدەي شەشىمىن كۇتىپ تۇرعان ماسەلەلەر از ەمەس. سول ماسەلەلەردى قازاقستاندىقتار جاپپاي قولدايتىن كۇشتى بيلىك قانا شەشە الادى. سوندىقتان سايلاۋشىلاردىڭ 20 قاراشادا سايلاۋ ۋچاسكەلەرىنە كەلىپ, ەلدىڭ ودان ءارى دامۋ جولىن انىقتايتىن تاڭداۋ جاساۋى ماڭىزدى», دەپ اتاپ ءوتتى رەسپۋبليكالىق قوعامدىق شتاب مۇشەسى ازات پەرۋاشەۆ.
بۇدان كەيىن شتاب مۇشەلەرى قوناەۆ قالاسىنداعى مادەنيەت ۇيىندە الماتى وبلىسىنىڭ جۇرتشىلىعىمەن كەزدەستى. باسقوسۋعا 200-گە جۋىق ادام قاتىستى. كانديداتتىڭ سايلاۋالدى باعدارلاماسىنداعى وڭىرلەردى دامىتۋعا جانە اۋىلداعى ينفراقۇرىلىمدى جاڭارتۋعا ارنالعان ءبولىمى قىزۋ تالقىلاندى. سونداي-اق شتاب مۇشەلەرى وڭىردەگى كوپبالالى انالارمەن كانديداتتىڭ وسكەلەڭ ۇرپاقتى قولداۋ جانە تۇرمىسى تومەن وتباسىلاردى الەۋمەتتىك قامسىزداندىرۋ جونىندەگى سايلاۋالدى باستامالارى تۋرالى اڭگىمە ءوربىتتى.