قىزىلوردا. 27 مامىر. بايقوڭىر قالاسىنىڭ پروكۋراتۋرا قىزمەتكەرلەرى اۋماقتاعى ەڭبەك زاڭناماسىنىڭ ساقتالۋىنا تالداۋ جۇرگىزۋ بارىسىندا «ينفراكوس» رمك قىزمەتكەرلەرىنە تيەسىلى ايلىق جالاقىنىڭ تولەنبەي كەلگەنىن انىقتادى. بۇل تۋرالى قىزىلوردا وبلىستىق پروكۋراتۋراسىنىڭ ءباسپاسوز قىزمەتى حابارلادى.
«تەكسەرۋ ناتيجەسىندە رەسپۋبليكالىق مەملەكەتتىك كاسىپورىننىڭ 152 قىزمەتكەرگە جالپى سوماسى 7 800 214 تەڭگە جالاقىلارى ۋاقىتىلى تولەنبەي, ولاردىڭ كونستيتۋتسيالىق قۇقىقتارىنىڭ بۇزىلعانى بەلگىلى بولدى», - دەلىنگەن حابارلامادا.
«قازاقستان رەسپۋبليكاسى كونستيتۋتسياسىنىڭ 24-بابى 2-تارماعىنا سايكەس, اركىمنىڭ قاۋىپسىزدىك پەن تازالىق تالاپتارىنا ساي ەڭبەك ەتۋ جاعدايىنا, ەڭبەگى ءۇشىن نەندەي ءبىر كەمسىتۋسىز سىياقى الۋىنا, سونداي-اق جۇمىسسىزدىقتان الەۋمەتتىك قورعالۋعا قۇقىعى بار.
سونداي-اق, قازاقستان رەسپۋبليكاسى ەڭبەك كودەكسىنىڭ 134-بابى 1-تارماعىنا سايكەس, جالاقى قازاقستان رەسپۋبليكاسىنىڭ ۇلتتىق ۆاليۋتاسىنداعى اقشالاي نىساندا ايىنا كەمىندە ءبىر رەت, كەلەسى ايدىڭ ءبىرىنشى ونكۇندىگىنەن كەشىكتىرىلمەي تولەنەدى», - دەپ ءمالىم ەتىلگەن ءباسپاسوز پاراقشاسىندا.
وسىعان قاراماستان, «ينفراكوس» رمك باسشىلىعى تاراپىنان قىزمەتكەرلەرىنە جالاقىلارىن ۋاقىتىلى تولەمەي, ولاردىڭ كونستيتۋتسيالىق قۇقىقتارىنا ەداۋىر نۇقسان كەلتىرگەن. بۇل رەتتە, قالا پروكۋراتۋراسى دەر كەزىندە ەنگىزىلگەن پروكۋرورلىق ىقپال ەتۋ اكتىسىنىڭ قارالۋ قورىتىندىسىمەن «ينفراكوس» رمك-نىڭ بارلىق قىزمەتكەرلەرىنە 7 800 214 تەڭگە كولەمىندە جالاقىلارى جانە ءاربىر كەشىكتىرىلگەن كۇنتىزبەلىك كۇن ءۇشىن 128 320 تەڭگە وسىماقى تولىعىمەن تولەنۋى قامتاماسىز ەتىلدى.
قۇرىش نۇرىمبەت.
دەرەككوز: قىزىلوردا وبلىستىق پروكۋراتۋراسى.
فوتو: mgorod.kz.