قازاقستاندا كوللەدجدەردىڭ وقۋ اقىسى شامامەن 20%-عا قىمباتتادى. ەلىمىزدىڭ ءبىر وڭىرىندە باعانىڭ ءوسۋى بىردەن 66%-دى قۇرادى, دەپ حابارلايدى Egemen.kz finprom.kz سايتىنا سىلتەمە جاساپ.
بيىلعى جىلدىڭ قاڭتار-ماۋسىم ايلارىندا تەحنيكالىق جانە كاسىپتىك ورتا ءبىلىم بەرۋ سالاسىندا قىزمەت كورسەتۋ كولەمى 84,2 ملرد تەڭگەگە جەتتى, بۇل بىلتىرعىمەن سالىستىرعاندا 14,5%-عا ارتىق كورسەتكىش.
بيۋدجەت قاراجاتى ەسەبىنەن – 73,8 ملرد تەڭگە, حالىق ەسەبىنەن – 9,8 ملرد تەڭگە, كاسىپورىندار ەسەبىنەن – 669 ملن تەڭگەگە قىزمەت كورسەتىلگەن.
وڭىرلىك تۇرعىدا كورسەتىلگەن قىزمەتتىڭ ەڭ كوپ كولەمى الماتى قالاسىنا تيەسىلى: 11,1 ملرد تەڭگە – بىلتىرعىدان 18%-عا ارتىق. ودان كەيىن تۇركىستان وبلىسى (5,6 ملرد تەڭگە) مەن شىمكەنت قالاسى (5,5 ملرد تەڭگە) كىرىپ وتىر.
ەڭ از قىزمەت كورسەتۋ كولەمى ۇلىتاۋ وبلىسىندا بايقالعان – بار بولعانى 1,5 ملرد تەڭگە.
تەحنيكالىق جانە كاسىپتىك ورتا بىلىمگە كەلسەك, ەڭ جوعارعى كورسەتكىش ەلوردادا – جىلىنا 27,1%-عا ءوسىم كورسەتىپ, 4,6 ملرد تەڭگەگە دەيىن قىزمەت كورسەتەدى.
بيىلعى قىركۇيەك ايىنىڭ قورىتىندىسى بويىنشا كاسىپتىك ورتا ءبىلىم بەرۋ باعاسى ءبىر جىلدا 19,5% وسكەن.
باعانىڭ ەڭ كوپ ءوسۋى اتىراۋ وبلىسىندا بايقالعان – جىلىنا 65,9%-عا كوتەرىلگەن. كەيىنگى ورىن باتىس قازاقستان مەن تۇركىستان وبلىستارىنا تيەسىلى – 35,4% پەن 34,5%. ەڭ از باعا ءوسىمى اقمولا وبلىسىندا تىركەلدى: جىلىنا 1,3%-عا.
تەحنيكالىق جانە كاسىپتىك ورتا ءبىلىم بەرۋ سالاسىندا قىزمەت كورسەتەتىن كاسىپورىنداردىڭ 76,7 پايىزى مەملەكەتتىك. جىل باسىنان بەرى مەملەكەتتىك مەكەمەلەر 64,6 ملرد تەڭگەگە قىزمەت كورسەتكەن. كورسەتىلگەن قىزمەتتەردىڭ تاعى 23,3%-ى جەكە كاسىپكەرلىككە (19,7 ملرد. تەڭگە), ال تەك 1,9 ملن تەڭگە – شەتەلدىك كاسىپورىندارعا تيەسىلى.