الەۋمەتتىك جۇمىس ماماندىق رەتىندە قازاقستان ءۇشىن سالىستىرمالى تۇردە جاڭاشىلدىق ەكەنىن اتاپ وتكەن ءجون. الەۋمەتتىك جۇمىس ماماندارىن كاسىبي دايارلاۋ سوڭعى جيىرما جىل كولەمىندە جۇزەگە اسىرىلىپ كەلەدى. بۇل رەتتە الەۋمەتتىك قىزمەتكەرلەردىڭ 33%-ى وسى جۇيەدە 10 جىلدان استام جۇمىس ءوتىلى بار ماماندار ەكەنىن ايتا كەتەلىك.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, ەلىمىزدە 12 مىڭنان استام الەۋمەتتىك قىزمەتكەر جۇمىس ىستەيدى. ولار حالىقتىڭ ءارتۇرلى ساناتتارىنا ءومىر ءسۇرۋ ساپاسىن جاقسارتۋ جانە كۇردەلى ومىرلىك جاعدايدان شىعۋ ءۇشىن كومەك كورسەتۋ ماقساتىندا ارناۋلى الەۋمەتتىك قىزمەتتەر كورسەتەدى.
قازىرگى ۋاقىتتا الەۋمەتتىك قىزمەتكەرلەر قارتتارعا, مۇگەدەكتىگى بار ادامدارعا, ونىڭ ىشىندە بالالارعا, بەلگىلى ءبىر تۇرعىلىقتى جەرى جوق, باس بوستاندىعىنان ايىرۋ ورىندارىنان بوساتىلعان ادامدارعا, تۇرمىستىق زورلىق-زومبىلىق پەن ادام ساۋداسىنىڭ قۇرباندارىنا ارناۋلى الەۋمەتتىك قىزمەتتەر (ااق) كورسەتەدى.
الەۋمەتتىك قىزمەتكەردىڭ نەگىزگى مىندەتتەرى – قىزمەت الۋشىلاردى وزىنە-ءوزى قىزمەت كورسەتۋ, ءوزىن-ءوزى باقىلاۋ, قارىم-قاتىناس داعدىلارىنا ۇيرەتۋ. سونداي-اق الەۋمەتتىك قىزمەتكەرلەر وتباسى مۇشەلەرىمەن وڭالتۋ ءىس-شارالارىن ىسكە اسىرۋ جانە قىزمەت الۋشىلاردىڭ قوعامدا وزدەرىن بەيىمدەۋ بويىنشا جۇمىس جۇرگىزەدى, الەۋمەتتىك تولەمدەر مەن باسقا دا الەۋمەتتىك قولداۋ شارالارىن الۋعا جاردەمدەسەدى.
الەۋمەتتىك قىزمەتكەرلەر ستاتسيونار, جارتىلاي ستاتسيونار جاعدايىندا, ۇيدە جانە ۋاقىتشا بولۋ ۇيىمدارىندا ااق ۇسىنادى.
12 مىڭ الەۋمەتتىك قىزمەتكەردىڭ 884-ءى مەديتسينالىق-الەۋمەتتىك مەكەمەلەردە, ونىڭ ىشىندە 695-ءى ستاتسيونارلىق مەكەمەلەردە, 189-ى وڭالتۋ ورتالىقتارىندا قىزمەت كورسەتەدى. ۇيدە الەۋمەتتىك كومەك كورسەتۋ بولىمشەلەرىندە 11 395 الەۋمەتتىك قىزمەتكەر, بەلگىلى ءبىر تۇرعىلىقتى جەرى جوق ادامدارعا ارنالعان الەۋمەتتىك بەيىمدەۋ ورتالىقتارىندا – 65, داعدارىس ورتالىقتارىندا 65 الەۋمەتتىك قىزمەتكەر جۇمىس ىستەيدى.
سونىمەن قاتار الەۋمەتتىك قىزمەتكەرلەردىڭ 45%-ى اۋدان ورتالىقتارى مەن قالالاردا, 30%-ى وبلىس ورتالىقتارى مەن رەسپۋبليكالىق ماڭىزى بار قالالاردا, 25%-ى اۋىلدىق وكرۋگتەردە قىزمەت كورسەتەدى.
2021 جىلدىڭ قورىتىندىسى بويىنشا مەملەكەتتىك جانە ۇكىمەتتىك ەمەس سەكتورلاردا ارناۋلى الەۋمەتتىك قىزمەتپەن 116 مىڭنان استام ادام قامتىلدى.
بيىل الەۋمەتتىك قىزمەتكەرلەردىڭ مىنەز-قۇلقىنىڭ كاسىبي ەتيكاسىنىڭ نورمالارى بەكىتىلدى. بۇل ولار ۇسىناتىن قىزمەتتەردىڭ ساپاسىن ارتتىرۋعا ىقپال ەتەتىن بولادى. سونىمەن قاتار الەۋمەتتىك كودەكس جوباسىندا حالىققا الەۋمەتتىك قىزمەت كورسەتۋ جۇيەسىن ودان ءارى جاڭعىرتۋ كوزدەلگەن. قولدانىستاعى ارنايى الەۋمەتتىك قىزمەتتەر وزەكتەندىرىلەدى جانە جاڭا ستاندارتتار ازىرلەنەدى, ال الەۋمەتتىك قىزمەتكە مۇقتاج ادامدارعا الەۋمەتتىك قىزمەتكەرلەردى تاڭداۋ مۇمكىندىگى بەرىلەدى. بۇدان باسقا, الەۋمەتتىك قىزمەتكەرلەر ءتىزىلىمىن قۇرۋ جوسپارلانىپ وتىر, وندا ولاردىڭ بىلىكتىلىگى, كورسەتىلەتىن قىزمەتتەردىڭ تۇرلەرى مەن ساپاسى, جۇمىس ناتيجەلەرى تۋرالى اقپارات قامتىلادى.
الەۋمەتتىك قىزمەتكەرلەر ءۇشىن كاسىپتىك ستاندارتتار ازىرلەنەدى, وندا جۇمىس بەرۋشىلەردىڭ وقىتۋ پەرسونالىنىڭ ءبىلىمى, داعدىلارى جانە بىلىكتىلىك دەڭگەيىنە قويىلاتىن تالاپتارى كورسەتىلەدى. ۇسىنىلاتىن قىزمەتتەردىڭ بىلىكتىلىك دەڭگەيىن, ساناتى مەن ەرەكشەلىگىن ەسكەرەتىن ەڭبەكاقى تولەۋدىڭ جاڭا جۇيەسى ازىرلەنبەك.