قازاقستان رەسپۋبليكاسىنىڭ پرەزيدەنتتىگىنە كانديدات جيگۋلي دايراباەۆ قاراعاندى وبلىسىندا بولىپ, «فيتوحيميا» حالىقارالىق عىلىمي-وندىرىستىك حولدينگىنىڭ قىزمەتىمەن تانىستى. كانديدات كاسىپورىن عالىمدارىمەن كەزدەسىپ, ولاردىڭ عىلىم سالاسىن دامىتۋعا قاتىستى پىكىرلەرىن تىڭدادى.
«فيتوحيميا» حولدينگى – قازاقستان مەن ورتالىق ازيانىڭ وسىمدىك شيكىزاتى نەگىزىندە دايىندالاتىن بىرەگەي دارىلىك پرەپاراتتاردىڭ جەتەكشى ازىرلەۋشىسى. بۇگىندە كاسىپورىن وسىمدىك شيكىزاتىن وڭدەۋدەن, سۋبستانتسيانى الۋدان باستاپ دايىن دارىلىك نىسانداردى, بىرەگەي فيتوپرەپاراتتاردى وندىرۋگە دەيىنگى تولىق تەحنولوگيالىق تسيكل ەنگىزىلگەن فارماتسەۆتيكا سالاسىنداعى يننوۆاتسيالىق جوبالاردى ىسكە اسىرۋمەن اينالىسادى.
حولدينگتىڭ قۇرامىنا عىلىمي كەشەننىڭ ءوزى ورنالاسقان بوتانيكالىق باق كىرەدى. الايدا كەيبىر مەملەكەتتىك قۇرىلىمدار تۇرعىن ءۇي كەشەنىن سالۋ ماقساتىندا عزي بوتانيكالىق باعىنىڭ جەرلەرىنە كوز تىككەن سىڭايلى.
«بۇل جەرلەردى كاسىپورىننان تۇرعىن ءۇي كەشەنىن سالۋ ءۇشىن الۋعا بولمايدى. مەن عىلىمي-زەرتتەۋ, اعارتۋشىلىق جانە زەرتتەۋ ماقساتىندا ءتىرى وسىمدىكتەردىڭ كوللەكتسيالارى زەرتتەلەتىن جانە كورسەتىلەتىن اۋماقتى جويۋمەن مۇلدەم كەلىسپەيمىن. تەحنولوگيالاردىڭ دامۋىمەن جانە ادامزاتتىڭ جاڭا جەتىستىكتەرىمەن وسىمدىكتەردى جانە ولاردىڭ اۋرۋلاردى ەمدەۋدەگى مۇمكىندىكتەرىن تەرەڭ زەرتتەۋ بۇرىنعىدان دا وزەكتى بولىپ قالا بەرەدى», دەدى جيگۋلي دايراباەۆ.