«جاسىل دامۋ» اق قاتتى تۇرمىستىق قالدىقتاردى بولەك جيناۋدىڭ ينفراقۇرىلىمىن دامىتۋ جوباسى اياسىندا وسكەمەندە زاماناۋي سۇرىپتاۋ جەلىسى ىسكە قوسىلدى. كەشەننىڭ رەسمي اشىلۋىنا شىعىس قازاقستان وبلىسىنىڭ اكىمى دانيال احمەتوۆ, «جاسىل دامۋ» اق باسقارما توراعاسىنىڭ ورىنباسارى نۇرجان قابدولدانوۆ جانە گرەكيانىڭ «Sabo» كومپانياسىنىڭ وكىلدەرى قاتىستى.
قازاقستاندا العاش رەت ىسكە قوسىلىپ وتىرعان زاماناۋي كەشەننىڭ جىلىنا 100 مىڭ توننا قالدىقتى سۇرىپتايتىن مۇمكىندىگى بار. اۆتوماتتى سۇرىپتاۋ جابدىعىنىڭ قۇنى 2 660 000 ەۋرونى قۇرايدى. 2020 جىلدىڭ جەلتوقسانىندا سۇرىپتاۋ جەلىسىن جەتكىزۋگە ارنالعان ۇشجاقتى كەلىسىمگە سايكەس قۇرىلعىلاردى «Sabo» كومپانياسى – ورناتۋشى, «وكم وپەراتورى» – قارجىلاندىرۋشى جانە وسكەمەن قالاسىنىڭ اكىمى جابدىقتاردى قابىلداۋشى رەتىندە مامىلە جاسالعان بولاتىن.
بۇگىنگى تاڭدا «جاسىل دامۋ» اق «وكم وپەراتورى» كەزىندە قولعا الىنعان مىندەتتەمەلەر كەزەڭ-كەزەڭىمەن جۇزەگە اسىرىلىپ جاتىر.
ايتا كەتۋ كەرەك, تۇرمىستىق قالدىقتى بولەك جيناۋ مەن سۇرىپتاۋ جۇيەسىن ەنگىزۋ جوباسىنىڭ جول كارتاسى اياسىندا وسكەمەن قالاسىنا 1 274 بىرلىك ەۋرو كونتەينەر, قالدىق شىعارۋعا ارنالعان ارنايى 6 تەحنيكا ساتىپ اپەرىلگەن بولاتىن.