قازاقستان رەسپۋبليكاسى پرەزيدەنتتىگىنە كانديدات سالتانات تۇرسىنبەكوۆا شىمكەنت قالاسىنداعى تىگىن فابريكاسىنىڭ جۇمىسشىلارىمەن كەزدەستى.
ۇمىتكەر بارىنە ۇلگەرىپ, تابىس تاۋىپ, بالا ءوسىرىپ, سالت-ءداستۇردى ساقتاپ, ءىرى كاسىپورىننىڭ جۇگىن كوتەرىپ جۇرگەن ايەلدەردى ماقتان تۇتاتىنىن اتاپ ءوتتى.
– «گاۋھار» – وڭتۇستىكتەگى جەڭىل ونەركاسىپتىڭ فلاگمانى. مۇندا جۇمىس كيىمى, مەكتەپ فورماسى مەن توقىما بۇيىمدارى ادەمى ءارى ساپالى تىگىلەدى. «قازاقستاندا جاسالعان» دەپ ماقتانىشپەن ايتا الاتىن ءونىمنىڭ قالاي جاسالىپ جاتقانىن كورۋ كوڭىلگە قۋانىش سىيلايدى. وسىنداي ءىرى ءارى تانىمال كاسىپورىندى ايەل ادام باسقارىپ وتىرعانى, ءتىپتى ۇلكەن ماقتانىش. كوپشىلىك ايەلدىڭ تابىستى كوشباسشى بولا الاتىنىنا سەنبەيدى. بىراق مەن سەنەمىن! ايەلدىڭ قولىنان ءبارى كەلەدى: زاۋىتتى دا, ۇلكەن ۇجىمداردى دا, ءتىپتى بۇكىل ەلدى دە باسقارا الادى. ايەل-انا ءبىر قولىمەن بالا تەربەتسە, ءبىر قولىمەن الەمدى تەربەتەدى», دەدى س.تۇرسىنبەكوۆا.
كاسىپورىن باسشىسى ءانيپا حالباەۆا ۇجىمدى كانديداتتى قولداۋعا شاقىردى. «ايەلدەردىڭ پرەزيدەنت بولۋعا قۇقىعى بار!» دەدى ول.
سونداي-اق فابريكا باسشىلىعى كاسىپورىننىڭ سالىقتىڭ كوپتىگى, بىلىكتى كادرلاردىڭ تاپشىلىعى, تۇراقسىز سالا جانە ارنايى وقۋ ورىندارىنىڭ جەتىسپەۋشىلىگى سياقتى ماسەلەلەرگە توقتالدى. كەيىن اشىق اڭگىمە بارىسىندا تىگىنشىلەر ۇسىنىستارى مەن ساۋالدارىن ورتاعا تاستادى. ايەلدەر قازاقستاندىقتاردىڭ تابىس تەڭسىزدىگىنە الاڭدايتىنى تۋرالى ايتتى.