قازاقستان رەسپۋبليكاسى پرەزيدەنتتىگىنە كانديدات مەيرام قاجىكەن وبلىستىق سايلاۋالدى شتاب مۇشەلەرىمەن zoom-كونفەرەنتسيا وتكىزدى. ۇمىتكەر ءۇش وبلىستا وتكەن ساپار ناتيجەلەرىنە توقتالدى.
كونفەرەنتسيا كەزىندە سەنىمدى تۇلعالار وڭىرلەردەگى شتاب جۇمىستارى تۋرالى ەسەپ بەردى. ونلاين-كەزدەسۋ بارىسىندا سايلاۋ ناۋقانىنىڭ بارىسى مەن كانديداتتىڭ جوسپارلانعان ساپارلارىنا قاتىستى بىرقاتار ماسەلە كوتەرىلدى.
كۇننىڭ ەكىنشى جارتىسىندا م.قاجىكەن كاسىپوداقتار مەن بيزنەس-قوعامداستىق وكىلدەرىمەن كەزدەستى. دوڭگەلەك ۇستەل بارىسىندا قاتىسۋشىلار الەۋمەتتىك ارىپتەستىك, ەڭبەك جانە الەۋمەتتىك قاتىناستاردى رەتتەۋ تاقىرىپتارىن تالقىلادى. تاراپتار بۇگىنگى تاڭدا ءۇش قاتىسۋشى – ۇكىمەت, جۇمىس بەرۋشىلەر مەن كاسىپوداقتار بىرلەستىكتەرى قول قوياتىن باستى كەلىسىم, قىزمەتكەرلەردىڭ مۇددەلەرىن جەتكىلىكتى دەڭگەيدە قورعاۋدى قامتاماسىز ەتپەيتىنىن مالىمدەدى. م.قاجىكەننىڭ ايتۋىنشا, الەۋمەتتىك ارىپتەستىك – ازاماتتىق قوعام فاكتورلارىنىڭ ءبىرى. «الەمدىك تاجىريبەدە ەكى تاراپ – جۇمىس بەرۋشى مەن قىزمەتكەردىڭ پىكىرلەرى ءبىر جەردەن شىقپاسا, وندا تالقىلاۋ بارىسىندا ولار ءوزارا ءتيىمدى شەشىمدەرگە قول جەتكىزە المايدى. وسىدان سوڭ ولار زاڭ جۇزىندە, بەلگىلى ءبىر نورمالار مەن ەرەجەلەردى قابىلداۋ ءۇشىن مەملەكەتكە تەڭ سەرىكتەس رەتىندە كومەككە جۇگىنەدى. بۇل ءبىز الداعى ۋاقىتتا قول جەتكىزەتىن, تاراپتاردىڭ قارىم-قاتىناسىنىڭ جاڭا فورماتى بولماق», دەدى ول.