كاسىپقوي بوكستان WBO نۇسقاسى بويىنشا ورتا سالماقتاعى الەم چەمپيونى جانىبەك ءالىمحان ۇلى 12 قاراشادا ءوز اتاعىن قورعاپ قالۋ ءۇشىن دەنزەل بەنتليمەن كۇش سىناساتىنى بەلگىلى.
اتالعان ۇيىمنىڭ باسشىلىعى اقش-تىڭ لاس-ۆەگاس قالاسىندا وتەتىن جەكپە-جەكتە جەڭىسكە جەتكەن جاعدايدا قانداسىمىزدى حايمە مۋنگيامەن جۇدىرىقتاسۋدى مىندەتتەدى. بۇل قارسىلاستاردىڭ ەكەۋى دە وتە مىقتى. كاسىپقوي بوكستى سەرىك ەتكەن بەس جىل ارالىعىندا 27 جاستاعى بەنتلي 19 كەزدەسۋ وتكىزىپ, 17 رەت جەڭىسكە جەتتى. 14 قارسىلاسىن نوكاۋتقا جىبەردى. ءبىر رەت ۇتىلىپ, تاعى ءبىر باسەكەدە تەڭ ەسەپ تىركەلدى. ونىڭ ۇلىبريتانيا چەمپيونى دەگەن اتاعى بار.
26 جاستاعى مۋنگيا 2013 جىلدان بەرى كاسىپقوي رينگتە ونەر كورسەتەدى. سول كەزدەن بەرى 40 جەكپە-جەك وتكىزىپ, بىردە-ءبىر رەت جەڭىلىستىڭ كەرمەك ءدامىن تاتقان ەمەس. 32 قارسىلاسىن ۇرىپ جىقتى. مەكسيكانىڭ مارقاسقاسى 2018-2019 جىلدارى ءبىرىنشى ورتا سالماق دارەجەسىندە الەم چەمپيونى اتاندى. كەزىندە ول سادام ءالي, ليام سميت, برەندون كۋك, گاري و’سالليۆان, تۋرەانو دجونسون, كاميل شەرەمەت, گابريەل روسادو, ديميتريۋس باللارد, دجيمي كەللي سىندى ساڭلاقتاردى سان سوقتىرعان. 2018 جىلى حايمە ءبىزدىڭ گەننادي گولوۆكينمەن جۇدىرىقتاسۋعا ءتيىس ەدى. الايدا نەۆادا شتاتىنىڭ اتلەتيكالىق كوميسسياسى «مۋنگيانىڭ تاجىريبەسى ءالى تولىسقان جوق» دەپ بۇل باسەكەنى وتكىزبەي تاستادى.