شوتلاندياعا ساپار شەگەدى

قازاقستاننىڭ تەننيسشىلەرى س توبىندا ونەر كورسەتەدى. قار­سىلاستارىمىز – يسپانيا مەن ۇلىبريتانيا قۇرامالارى. بۇل كوماندالاردىڭ ەكەۋى دە ازۋلى. پيرەنەي تۇبەگىنىڭ وكىلدەرى اتالعان جارىستا بەس مارتە (1991, 1993, 1994, 1995, 1998 جىلدارى) توپ جارىپ, التى رەت (1989, 1992, 1996, 2000, 2002, 2008) فينالدا وينادى. قازىرگى كەزدە بۇل مەملەكەتتىڭ ءتورت ويىنشىسى توپ-100-دىكتىڭ قاتا­رىندا. سولاردىڭ اراسىنان گار­بينە مۋگۋرۋسا مەن پاۋلا بادوسانى بولە-جارا اتاۋعا بولادى. 29 جاستاعى گاربينە 2016 جىلى رولان گارروستا الدىنا جان سالمادى. 2017 جىلى ۋيمبلدوندا دارا شىقتى. 2021 جىلى WTA-نىڭ قورىتىندى تۋرنيرىندە توپ جارىپ, 10-نان اسا ءىرى حالىقارالىق جارىستا قارسىلاس شاق كەلتىرمەدى. وسى تابىستارىنىڭ ارقاسىندا ول كەزىندە الەمنىڭ ءبىرىنشى راكەتكاسى اتاندى.  

كەلەسى ايدىڭ بەل ورتاسىندا 25 جاسقا تولعالى وتىرعان پاۋلا بادوسا WTA رەيتينگىندە 4 ورىندا تۇر. بىلتىر ول رولان گارروستىڭ شيرەك فينالىنا شىقسا, بيىل اۋستراليانىڭ اشىق بىرىنشىلىگىنىڭ ءتورتىنشى كەزەڭىنە دەيىن جەتتى. ال 26 جاستاعى سارا سورريبەس-تورمو ۇزدىكتەر تىزمىندە 72 ورىنعا تۇراقتاسا, 31 جاستاعى نۋريا پارريزاس-دياس 76 ساتىعا جايعاستى.  

تۇماندى البيون بۇرىم­دىلارى وسى كۇنگە دەيىن بيللي دجين كينگ كۋبوگىن بىردە-ءبىر رەت ولجالاعان جوق. ەسەسىنە ولار ءتورت رەت فينالعا شىقتى. شەشۋشى تۇستا ۇلىبريتانيالىقتار اقش (1967, 1981), اۋستراليا (1971) جانە وار قۇرامالارىنا (1972) ەسە جىبەردى. اتالعان مەملەكەتتىڭ بۇگىنگى تاڭداعى ماقتانىشى – ەمما رادۋكانۋ. بىلتىر ول اقش-تىڭ اشىق بىرىنشىلىگىندە ايدى اسپانعا ءبىر-اق شىعارىپ, باس جۇلدەنى جەڭىپ العان ەدى. ءدال وسى جارىس باستالاتىن كۇنى 20 جاسقا تولاتىن رادۋكانۋ بۇل كۇندەرى WTA رەيتينگىندە 70 ورىندى قاناعات تۇتۋدا. ال بيىل جازدا عانا ول توپ-10 تەننيسشىنىڭ ساناتىنا ەنگەن. وكىنىشكە قاراي, سوڭعى كەزدەردەگى سۇرەڭسىز ويى­نىنىڭ سالدارىنان تومەنگە قۇل­ديلاۋدا. ۇلىبريتانيا قۇرا­مىنداعى تاعى ءبىر بەلدى ويىنشى ول – حەرريەت دارت. 26 جاستاعى دارت ۇزدىكتەر تىزىمىندە 86 ساتىعا تۇراقتادى.

ال وزگە توپتاردا مىنا كوماندالار ونەر كورسەتەدى: ا توبى – شۆەيتساريا, كانادا جانە يتاليا. ۆ توبى – اۋستراليا, سلوۆاكيا جانە بەلگيا. D توبى – چەحيا, اقش جانە پولشا.

وتكەنگە زەر سالساق, اتال­عان جارىس 1963 جىلدان بەرى ۇيىم­داستىرىلىپ كەلەدى. بۇرىندارى ول فەدەراتسيا كۋبوگى دەپ اتالدى. 2020 جىلى بۇل دودا بيللي دجين كينگ كۋبوگى دەگەن اتاۋعا يە بولدى. كينگ كەزىندە الەمنىڭ ءبىرىنشى راكەتكاسى بولىپ, «ۇلكەن دۋلىعا» ساناتىنداعى جارىستاردا 39 رەت جەڭىمپاز اتانعان. تارقاتىپ ايتساق, جەكەلەگەن سايىستا – 12, جۇپتىق باسەكەدە – 16 جانە ميكستە – 11 رەت توپ جاردى. فەدەراتسيا كۋبوگىن جەتى مارتە توبەسىنە كوتەردى. كەيىننەن اقش قۇراماسىنىڭ باس باپكەرى رەتىندە اتالعان دودادا ءۇش جانە وليمپيا ويىندارىندا ەكى رەت باس جۇلدەنى ولجالادى. بيللي دجين ايگىلى تەننيسشى بولۋىمەن قوسا, سپورتتاعى ايەلدەردىڭ تەڭدىگى ءۇشىن كۇرەستى. سونداي-اق ول WTA ۇيىمى قۇرىلۋىنىڭ التىن باستاۋىندا تۇردى.

بيللي دجين كينگ كۋبوگىن ەڭ كوپ ولجالاعان كوماندا – اقش قۇراماسى. امەريكالىقتار 18 ­جا­رىستا جەڭىسكە جەتتى. چەحيا مەن چەحوسلوۆاكيانى قوسا العاندا ولار 11 مارتە باس جۇلدەنى يەلەن­دى. اۋستراليا جەتى رەت توپ جارسا, يسپانيا مەن رەسەي بەس رەتتەن دارا شىقتى. سونداي-اق يتاليا – 4, فرانتسيا – 3, گەرمانيا – 2, بەلگيا, سلوۆاكيا جانە وار 1 مارتە تەڭدەسسىز دەپ تانىلدى. سوڭ­­عى تۋرنيردە رەسەي قۇراماسى الدىنا جان سالمادى. 2021 جىلى چەحيانىڭ استاناسى پراگادا وت­كەن جارىستىڭ فينالىندا ولار شۆەيتساريانى 2:0 ەسەبىمەن ۇتتى.

جەكەلەگەن ويىنشىلار اراسىندا اتالعان تۋرنيردە ەڭ كوپ ولجاعا كەنەلگەن – كريس ەۆەرت. اقش-تىڭ ايگىلى تەننيسشىسى سەگىز جارىستىڭ باس جۇلدەسىن يەلەندى. ەۆەرتتىڭ وتانداستارى – روزاماري كاسالس پەن بيللي دجين-كينگ جە­تى رەت وزسا, چەحيالىق پەترا كۆي­توۆا مەن باربورا سترىتسوۆا التى مارتە ءدال سونداي قۇرمەتكە بولەندى.

قازىرگى كەزدە ايەلدەر اراسىن­داعى الەمدىك رەيتينگتە اۋسترا­ليانىڭ ارۋلارى جەكە-دارا كوش باستاپ تۇر. ولار 1002,71 ۇپايدى ەنشىلەۋدە. ودان كەيىنگى ورىندارعا فرانتسيا (885,6), يسپانيا (884,62), چەحيا (842,92), شۆەيتساريا (881,81), كانادا (780,09), اقش (758,09), سلوۆاكيا (744,23), قازاقستان (704,75) جانە گەرمانيا (702,52) قۇرامالارى جايعاستى.