ۇلت سپورتىنىڭ ءۇمىتى

ايتسە دە, كەيىنگى جىلدارى سپورتشىلاردىڭ جاڭا بۋىنى تىڭنان تۇرەن سالىپ, جاڭا سپورت تۇرلەرىن مەڭگەرە باستادى. ولار جاي مەڭگەرىپ قانا قويماي, ساناۋلى جىلدىڭ ىشىندە ءوز قاتارلاستارى اراسىندا الپاۋىت ەلدەردىڭ وكىلدەرىن جۇلدەسىز قالدىرىپ ءجۇر. ماسەلەن, ورتا عاسىرلاردا فران­تسيادا پايدا بولعان تەننيس سپورتىندا كەيىنگى ءبىر-ەكى جىلدىڭ كولەمىندە الاشتىڭ ورەندەرى جارقىراپ ونەر كورسەتە باستادى. الىسقا بارماي-اق تەننيستەن قازاقستاننىڭ 14 جاسقا دەيىنگى جاسوسپىرىمدەر قۇراماسىنىڭ بيىلعى الەم چەمپيوناتىنداعى جەتىستىگىن ايتساق جەتىپ جاتىر.

اقسۇيەكتەردىڭ ويىنى سانالاتىن تەننيس سپورتى فەدەراتسياسى ەلىمىزدە 1992 جىلى قۇرىل­عانى­مەن, 30 جىلدان بەرگى قاجىرلى ەڭ­بەكتىڭ جەمىسى ەندى كورىنە باس­تادى. تەن­نيستەن قازاقستاننىڭ 14 جاسقا دەيىنگى جاسوسپىرىمدەر قۇراماسى بيىل چەحيانىڭ پروستەەۆ قالاسىندا ۇيىمداستىرىلعان الەم چەمپيوناتىنا ەل تاريحىندا تۇڭعىش رەت قاتىسىپ, الەمنىڭ ەڭ ۇزدىك ءتورت قۇراماسىنىڭ قاتا­رىنان كورىندى.

قازاقستاندىق جاسوسپىرىمدەر مۇنداي دەڭگەيدەگى جارىسقا العاش رەت قاتىسقانىنا قاراماستان, الەمدەگى ۇزدىك قۇرامالارمەن تە­رەز­ەسى تەڭ ونەر كورسەتتى. جەرلەس­تەرى­مىز جاھاندىق بىرىنشىلىك با­رى­سىندا بىلتىرعى الەم چەمپيونى – يتاليا, سونىمەن قا­تار ارگەنتينا, سلوۆەنيا سەكىلدى قۇرا­مالاردى جارىس جولىنان ىعىس­تىردى. دۇنيەجۇزىلىك دودادا ەل نامىسىن قازاقتىڭ تالانتتى ۇلدارى – زاڭعار نۇرلان ۇلى, دامير جال­عاسباي جانە دانيەل تا­زا­بە­كوۆ قورعاعانىن ايتا كە­تەيىك.

سونداي-اق قىزدارىمىز دا ۇلداردان قالىسقان جوق. جۋىردا عانا تايلاندتا 14 جاسقا دەيىنگى تەننيسشىلەر اراسىنداعى ازيا چەم­پيوناتى اياقتالدى. سارى قۇر­لىق باسەكەسىنىڭ جەكەلەي سىنىندا قازاقتىڭ ەكى قىزى – اريانا گوگۋلينا مەن البينا كاكەنوۆا بارلىق قارسىلاسىن تىزە بۇكتىرىپ, ازيانىڭ ۇزدىك تەننيسشىلەرى اتان­دى. كوماندالىق سايىستا دا قازاقستان قۇراماسىنىڭ وكىلدەرى توپ جاردى. ازيا بىرىنشىلىگىندە ورەلى ونەرىمەن كوزگە تۇسكەن ال­بينا كاكەنوۆا 14 جاسقا دەيىن­گى تەننيسشىلەر اراسىندا ازيا رەيتينگىندە كوش باستادى. بۇل دا ءبىر تاريحي كورسەتكىش.

ويلىلار ويىنى سانالاتىن شاحمات سپورتىندا دينارا سا­دۋاقاسوۆا, جانسايا ابدىمالىك, ءبيبىسارا اساۋباەۆا سەكىلدى ايەل­دەر جانە ەرلەر اراسىنداعى گروسس­مەيستەرلەردىڭ جاقىن ارادا ورنىن باساتىن مىقتى بۋىن قالىپتاسىپ كەلەدى. ماسەلەن, قازان ايىنىڭ العاشقى ونكۇندىگىندە ازەربايجاندا 16 جاسقا دەيىنگى جاسوسپىرىمدەر اراسىنداعى دۇنيە­جۇزىلىك شاحمات وليمپياداسى ۇيىمداستىرىلدى. بۇل دوداعا قازاقستان قۇراماسىنىڭ 12 جانە 14 جاستاعى سپورتشىلارى قاتىسسا دا, وزدەرىنەن ۇلكەن شاحماتشىلارىمەن تەڭ دارەجەدە ونەر كورسەتتى. ءتىپتى ەرلەر اراسىنداعى جارىستا سىنعا تۇسكەن ساۋات نۇرعاليەۆ جەكە ەسەپتە بارلىق پارتيادا ۇزدىك ناتي­جە كورسەتىپ, وليمپيادانىڭ التىنىن جەڭىپ الدى. سونداي-اق تاعى ءبىر زەرەك شاحماتشى يمان­عالي اقىلباي قولا جۇلدەگەر اتان­دى.

قازاقستان قۇراماسىنىڭ سپورتشىلارى وزدەرىنەن ۇلكەن جاستاعى شاحماتشىلارمەن ويناسا دا, جالپىكوماندالىق ەسەپتە شاحمات سپورتىنىڭ ۇزدىكتەرى سانالاتىن ءۇندىستان مەن يراننىڭ كوماندالارىن باسىپ وزىپ, ۇزدىك تورتتىكتىڭ قاتارىنان كورىندى.

كەڭەس وكىمەتى تۇسىندا قازاق جەڭىل اتلەتتەرىنىڭ اتى وزعان-دى. كسرو قۇرامىندا وليمپياداعا قاتىسقان تۇڭعىش قازاق جەلاياعى عۇسمان قوسانوۆتىڭ 1960 جىلى ريم وليمپياداسىندا كۇمىس مە­دالعا يە بولعانىن سپورت جان­كۇيەرلەرى جاقسى بىلەدى. ع.قو­سانوۆتىڭ ءىزىن الا ءامين تۇياقوۆتىڭ ەسىمى جەڭىل اتلەتيكا سپورتىندا جاڭعىردى. ءامين اعامىز التى دۇركىن كسرو چەمپيو­نى, ءوز زامانىندا 100 جانە 200 مەتر قاشىقتىققا جۇگىرۋدەن كسرو-نىڭ بىرنەشە رەكوردىن جاڭارتقان داڭقتى جەلاياق بولاتىن. وكىنىشكە قاراي, كەيىننەن عۇسمانداي, امين­دەي جەلاياق اعالاردىڭ جەڭىستى جولى بىرازعا دەيىن ءۇزىلىپ قالعان­داي ەدى. ايتسە دە, ەگەمەندى ەلدە دۇنيەگە كەلگەن جاس دارىندى سپورتشىلار جەڭىل اتلەتيكاداعى ءۇمىتىمىزدى قايتا جاققانداي بولدى.

وسىدان بىرەر كۇن بۇرىن كۋ­ۆەيتتىڭ باس شاھارى – ءال-كۋ­ۆەيت­تە جەڭىل اتلەتيكادان جاسوس­پى­رىمدەر اراسىنداعى ازيا بىرىن­شىلىگىندە قازاقستاننىڭ سپورتشىلارى اۋىز تولتىرىپ ايتار­لىقتاي جەتىستىككە قول جەت­كىزدى. ناتيجەسىندە, 3 التىن, 3 كۇمىس جانە 1 قولا مەدال ەنشىلەگەن ورەن­دەرىمىز جالپىكوماندالىق ەسەپتە بەسىنشى ورىنعا تابان تىرەدى. بۇل – قازاقستاننىڭ جاس­وسپى­رىمدەر اراسىنداعى ازيا بىرىن­شى­لىك­تە­رىندەگى ەڭ ۇزدىك ناتي­جەلەرىنىڭ ءبىرى.

مىنە, بۇل – قازاق سپورتىنىڭ بولاشاعىنا بالاعان جاس سپورت­شى­لارىمىزدىڭ تەك ءبىر جارىس­تا عانا قول جەتكىزگەن تولايىم تابىسى. سا­ناۋلى جىلداردان كەيىن ەلىمىزدىڭ نەگىزگى قۇرامىنا قابىلداناتىن بۇل بۋىنعا ەل نامىسىن قورعاۋدى وليم­پيادا, الەم, ازيا چەمپيوناتتارىندا سەنىپ تاپسىرا بەرۋگە بولادى دەگەن سەنىمدەمىز.