بۇگىن قازمەديا ورتالىعىندا اقپارات جانە قوعامدىق دامۋ مينيسترلىگى جانە وعان قاراستى ۇيىمداردىڭ رەسپۋبليكا كۇنىنە ارنالعان سالتاناتتى ءىس-شاراسى ءوتتى, دەپ حابارلايدى Egemen.kz اقدم ءباسپاسوز قىزمەتىنە سىلتەمە جاساپ.
مينيستر دارحان قىدىرالى ارىپتەستەرىن قۇتتىقتاپ, بۇل كۇننىڭ ماڭىزدىلىعىنا توقتالدى.
«بۇل – ەلىمىزدىڭ مەملەكەت قۇرۋ جولىنداعى ەڭ العاشقى تاعدىرشەشتى قادامى جاسالىپ, ەگەمەندىگىمىزدىڭ ىرگەتاسى قالانعان كۇن. سوندىقتان تاۋەلسىزدىك تاريحىنداعى تاڭبالى داتانى قايتادان اتاپ ءوتۋىمىزدىڭ ءوز ءجونى بار. قازىرگىدەي سىندارلى كەزەڭدە جۇدىرىقتاي جۇمىلىپ, مەملەكەتىمىزدىڭ مۇددەسى ءۇشىن بىرلەسە قىزمەت ەتە بەرەمىز دەپ سەنەمىن», دەدى مينيستر.
ءىس-شارا بارىسىندا قازاقستان مۇسىلماندار ءدىني باسقارماسىنىڭ توراعاسى ناۋرىزباي قاجى تاعان ۇلىنا «پاراسات» جانە «ەگەمەن قازاقستان» گازەتىنىڭ جاۋاپتى حاتشىسىنىڭ ورىنباسارى امانگەلدى قياسقا «قۇرمەت» وردەنى تابىستالدى. سونداي-اق بىرقاتار سالا قىزمەتكەرىنە «ەرەن ەڭبەگى ءۇشىن», «شاپاعات» مەدالى, «اقپارات سالاسىنىڭ ۇزدىگى» توسبەلگىسى جانە باسقا دا ماراپاتتار بەرىلدى.
ايتا كەتەيىك, «اقپارات سالاسىنىڭ ۇزدىگى» توسبەلگىسىمەن ماراپاتتالعاندار اراسىندا «ەگەمەن قازاقستان» گازەتىنىڭ ءتىلشىسى نازەركە جۇماباي دا بار.