ۇلت ۇستازى احمەت بايتۇرسىن ۇلىنىڭ 150 جىلدىق مەرەيتويىنا وراي 5 قىركۇيەكتە الاش ارىسىنىڭ كىندىك قانى تامعان اقكول اۋىلىنان انادولى ەلىنە دەيىن ۆەلوشەرۋ ۇيىمداستىرعان جەرلەسىمىز ەرنات مەلس ۇلى انكاراعا جەتتى.
55 كۇندە 5 مىڭ 555 شاقىرىم جولدى ەڭسەرۋدى جوسپارلاعان قازاقستاندىق ۆەلومارافونشى بىرەر كۇن بۇرىن تۇركيانىڭ استاناسىنا ات باسىن تىرەدى. وسى ۋاقىت ارالىعىندا ول قازاقستاننىڭ ءتورت وبلىسىندا, ياعني قوستاناي, اقتوبە, اتىراۋ جانە ماڭعىستاۋدا بولىپ, ودان ءارى قاپ تاۋىن بەتكە الدى. گرۋزيانىڭ تاۋلى-قىراتتى اۋماقتارىن ءجۇرىپ وتكەن جەرلەسىمىز ەندى, مىنە, مەجەلى جەرىنە دە كەلىپ جەتتى. ءبىر ايتا كەتەرلىگى, ول ءار توقتاعان جەرىندە ۇلت ۇستازىنىڭ ەڭبەگىن ناسيحاتتاپ تا ۇلگەرگەن.
انكاراعا جەتكەن ۆەلوشاباندوزدى تۇركيانىڭ كەچيورەن اۋدانىنداعى جۇرتشىلىق ىستىق ىقىلاسپەن كۇتىپ الدى. قارسى الۋشىلاردىڭ قاتارىندا اۋدان مەرى مەن قازاقستان ەلشىسى دە بار.
ۆەلوشەرۋشى جينالعان جۇرتشىلىقتى ەكى ەلدىڭ ديپلوماتيالىق قارىم-قاتىناسىنىڭ 30 جىلدىعىمەن قۇتتىقتاپ, ۇلت ۇستازى تۋرالى كەلەلى اڭگىمە ءوربىتتى. كەلۋشىلەرگە العىسىن ءبىلدىرىپ, جولدا بولعان شىتىرمان وقيعالارىن ورتاعا سالدى. «باتىر بابالاردىڭ, باھادۇرلەردىڭ بۇگىنگى ۇرپاعى رەتىندە قوس دوڭگەلەكتى تەمىر اتتى تىزگىندەپ, انادولى جەرىنە كەلدىم. قازاق ەلى, قازاق جۇرتى, قازاقستان – بارشا تۇركىلەردىڭ اتاجۇرتى. سىزدەرگە اتاجۇرتتىڭ ىستىق سالەمىن الا جەتتىم», دەدى ەرنات مەلس ۇلى.
احمەت بايتۇرسىن ۇلىنىڭ 150 جىلدىعىنا ارنالعان ۆەلوشەرۋدى كەيىپكەرىمىز ىستانبۇلداعى اتاقتى تاەكۆوندوشى مۇستافا وزتۇرىكتىڭ زيراتىنا ءتاۋ ەتۋمەن تۇيىندەمەك. وعان دەيىن ەرنات تۇرىك الەمىنىڭ مادەني استاناسى بۋرساعا بارىپ, قازاقتىڭ كوك بايراعىن جەلبىرەتپەك.