بۇگىن ەلورداداعى «بارىس ارەنا» مۇز سارايىندا استانانىڭ «بارىسى» قۇرلىقتىق حوككەي ليگاسىنداعى (قحل) كەزەكتى تۋر ويىنىن ماگنيتوگورسكىنىڭ «مەتاللۋرگىمەن» وتكىزەدى. ماتچ اياسىندا بىرىككەن ۇلتتار ۇيىمى دامۋ باعدارلاماسى (بۇۇ دب) مەن «بارىس» حوككەي كلۋبى «قار بارىسىن ساقتايىق!» ەكولوگيالىق اكتسياسىن ۇيىمداستىرماق.
جىل سايىنعى اكتسيا 23 قازاندا دۇنيەجۇزىندە اتاپ وتىلەتىن حالىقارالىق قار بارىسى كۇنىنە ورايلاستىرىلعان. ءداستۇرلى ءىس-شارا الەمدە وتە سيرەك كەزدەسەتىن جانە جويىلىپ بارا جاتقان قار بارىسىن ساقتاپ قالۋ, جۇرتشىلىقتىڭ نازارىن اۋدارۋ ماقساتىندا وتكىزىلەدى.
«بارىس ارەنا» مۇز سارايىنىڭ اۋماعىندا ۇيىمداستىرىلاتىن «قار بارىسىن ساقتايىق!» ەكولوگيالىق اكتسياسى اياسىندا جانكۇيەرلەر ءۇشىن تاقىرىپتىق فوتوايماق, ەلىمىزدىڭ تابيعاتىندا تۇسىرىلگەن ءىلبىستىڭ بىرەگەي كادرلارىنىڭ فوتوكورمەسى, ارنايى سىيلىقتار ويناتىلاتىن ۆيكتورينا, بالالارعا ارنالعان اكۆاگريم جانە باسقا دا ءىس-شارالار ۇيىمداستىرىلادى. سونداي-اق ماتچتى تاماشالاۋعا كەلگەن ءاربىر جانكۇيەر كاسىبي سۋرەتشىلەرمەن بىرلەسىپ قار بارىسى تاقىرىبىندا سۋرەت سالۋعا قاتىسا الادى.
قازاقستان حالقىنىڭ باسىم بولىگى, وكىنىشكە قاراي, قار بارىسىنىڭ پوپۋلياتسياسىن ساقتاۋدىڭ ماڭىزدىلىعى مەن ونىڭ جويىلۋ سەبەپتەرى تۋرالى بىلە بەرمەيدى. ادامداردىڭ تابيعاتقا بەيجاي قاراۋى, ەكوجۇيەلەردىڭ بۇزىلۋى, براكونەرلىك جانە كليماتتىڭ وزگەرۋى قار بارىسى سانىنىڭ قىسقارۋىنىڭ نەگىزگى سەبەپتەرى ەكەنى بەلگىلى.
قار بارىسى جويىلىپ كەتۋ قاۋپىنە بايلانىستى حالىقارالىق تابيعاتتى قورعاۋ وداعىنىڭ «قىزىل كىتاپ» تىزىمىنە جانە جانۋار مەكەن ەتەتىن بارلىق 12 ەلدىڭ, سونىڭ ىشىندە قازاقستاننىڭ دا «قىزىل كىتابىنا» ەنگەن. ءبىر ايتا كەتەرلىگى, كەيىنگى 40 جىلدا قازاقستانداعى ءىلبىستىڭ پوپۋلياتسياسى شامامەن 180-200-دەن 135-170 باسقا دەيىن قىسقارعان.
بۇۇ دب بىرنەشە جىلدان بەرى قازاقستان ۇكىمەتىمەن بىرلەسىپ عالامدىق ەكولوگيالىق قوردىڭ (عەق) قولداۋىمەن قار بارىسىنىڭ پوپۋلياتسياسىن قورعاۋ جانە ساقتاۋ باستاماسىن ىسكە اسىرىپ كەلەدى. اتاپ ايتقاندا, عىلىمي زەرتتەۋلەر, براكونەرلىككە قارسى ءىس-قيمىل, قار بارىسى مەكەندەيتىن ورىنداردىڭ قورعالۋىن كۇشەيتۋ, ەكولوگيالىق اعارتۋ, ۇلتتىق زاڭنامانى جەتىلدىرۋ بويىنشا ءىس-شارالار جۇرگىزىلۋدە.