جامبىل وبلىسىندا مەملەكەت جانە قوعام قايراتكەرى, جازۋشى شەرحان مۇرتازانىڭ 90 جىلدىق مەرەيتويى ءوتىپ جاتىر, دەپ حابارلايدى Egemen.kz.
تاراز قالاسىندا جازۋشىنىڭ ەڭسەلى ەسكەرتكىشى اشىلدى. سالتاناتتى شاراعا اقپارات جانە قوعامدىق دامۋ ءمينيسترى دارحان قىدىرالى ارنايى باردى. مينيستر كوپشىلىككە مەملەكەت باسشىسىنىڭ قۇتتىقتاۋ حاتىن وقىپ بەردى.
«اقيقاتتىڭ الداسپانى, نامىستىڭ ناركەسكەنى اتانعان ارداقتى شەراعاڭ سانالى عۇمىرىن ۇلت رۋحانياتىنىڭ دامۋىنا ارناعان قارىمدى قالامگەر, قايراتكەر تۇلعا ەدى. ءسوز زەرگەرى شەرحان مۇرتازا جۋرناليستيكادا تۇتاس ءبىر بۋىندى تاربيەلەپ, تالانتتارعا جول اشقان, وزىندىك مەكتەبىن قالىپتاستىرعان قازاق ءباسپاسوزىنىڭ ماۋەلى بايتەرەگى بولدى. ابىرويلى ازامات رەتىندە بيىك مىنبەرلەردە ەلدىك ماسەلەلەردى كوتەرىپ, ۇلت مۇددەسى جولىندا ايانباي كۇرەستى. جازۋشىنىڭ قالامىنان تۋعان قۇندى تۋىندىلار ۋاقىتپەن بىرگە جاساپ, وسكەلەڭ ۇرپاقتىڭ جادىندا جاڭعىرا بەرەرى انىق. ونىڭ قازاق رۋحانياتىنداعى ورنى مەن جارقىن بەينەسى ەشقاشان ۇمىتىلمايدى», دەپ جازىلعان پرەزيدەنتتىڭ قۇتتىقتاۋىندا. ەسكەرتكىشتىڭ اشىلۋ سالتاناتىنان كەيىن «كونە تاراز» تاريحي-ەتنومادەني كەشەنىندەگى كورمە پاۆيلونىندا «شەرحانتانىم: قازىرگى قازاق ادەبيەتى مەن قازاق ءباسپاسوزىنىڭ دامۋ تەندەنتسيالارى» تاقىرىبىنداعى عىلىمي-تاجىريبەلىك كونفەرەنتسياسى ۇيىمداستىرىلدى. جوسپار بويىنشا تۇستەن كەيىن جۋالى اۋدانى تالاپتى اۋىلىنداعى شەرحان مۇرتازانىڭ ادەبي-مەموريالدى ءۇيىنىڭ ء(وزى تۇرعان ءۇيى) اشىلۋ سالتاناتى وتەدى. ايتا كەتەيىك, مەملەكەت جانە قوعام قايراتكەرى, حالىق جازۋشىسى ش.مۇرتازانىڭ 90 جىلدىق مەرەيتويىن اتاپ وتۋگە نەگىزدەلگەن ءىس-شارالارعا اقىن, جازۋشى, قازاقستاننىڭ ەڭبەك ەرى مۇحتار شاحانوۆ, مەملەكەت جانە قوعام قايراتكەرى ورازكۇل اسانعازىقىزى, قر پارلامەنتى سەناتىنىڭ دەپۋتاتى, دوكتور, پروفەسسور, قر ۇلتتىق عىلىم اكادەمياسىنىڭ اكادەميگى م. قۇل-مۇحامەد, قازاقستان رەسپۋبليكاسىنىڭ اقپارات جانە قوعامدىق دامۋ مينيسترى قىدىرالى دارحان قۋاندىق ۇلى, جازۋشى, قوعام قايراتكەرى نۇرلان ورازالين سىندى بەلگىلى تۇلعالار شاقىرىلعان.