بۇل كۇندەرى الەمنىڭ بىرقاتار مەملەكەتىندە تەننيستەن اسا ءىرى حالىقارالىق تۋرنيرلەر ءوتىپ جاتىر. ال قازاقستاننىڭ ويىنشىلارى مۇحيتتىڭ ارعى جاعالاۋىندا ونەر كورسەتۋدە.
مەكسيكانىڭ گۆادالاحارا قالاسىندا جۇلدە قورى 2 527 250 اقش دوللارىن قۇرايتىن ءتۋرنيردىڭ شىمىلدىعى ءتۇرىلدى. ەلىمىزدىڭ ەڭ ۇزدىك تەننيسشىسى ەلەنا رىباكينا تۇساۋكەسەر كەزدەسۋىن كارولينا پليشكوۆامەن وتكىزدى. 30 جاستاعى چەحيانىڭ ماقتانىشى كەزىندە الەمنىڭ ءبىرىنشى راكەتكاسى اتانعان. ول US Open مەن ۋيمبلدوننىڭ فينالىندا, رولان گارروس پەن اقش اشىق بىرىنشىلىگىنىڭ جارتىلاي فينالىندا ويناپ, WTA تۋرنيرلەرىندە 16 رەت توپ جاردى. قازىرگى كەزدە پليشكوۆا ۇزدىكتەر تىزىمىندە 20-ورىندى يەلەنۋدە. وسىنداي ساقا سپورتشىمەن ەش قايىمىقپاي ايقاسقان رىباكينا 7:6, 6:2 ەسەبىمەن جەڭىسكە جەتتى. ەندى ەكىنشى كەزەڭدە جەرلەسىمىز الەمنىڭ 24-راكەتكاسى امەريكالىق دجەسسيكا پەگۋلامەن شەبەرلىك بايقاسادى.
اتستەكتەر ەلىندە ەسىمدەرى جوعارىدا اتالعان تەننيسشىلەردەن بولەك, پاۋلا بادوسا (يسپانيا), ۆيكتوريا ازارەنكو (بەلارۋس), ماريا ساككاري (گرەكيا), كارولين گارسيا (فرانتسيا), ەلەنا وستاپەنكو (لاتۆيا), ۆەرونيكا كۋدەرمەتوۆا (رەسەي), مەديسون كيس پەن سلوان ستيۆەنس (اقش), بيانكا اندرەەسكۋ (كانادا), بەليندا بەنچيچ (شۆەيتساريا) جانە تاعى باسقا تانىمال ويىنشىلار باق سىناۋدا.
ءچيليدىڭ كوكيمبو قالاسىندا باستالعان جارىستا تيموفەي سكاتوۆ سايىسقا تۇسۋدە. سوڭعى ءبىر جىل ارالىعىندا قارقىنىن كۇرت كۇشەيتكەن وتانداسىمىز العاشقى اينالىمدا يسپانيالىق دانيەل ريكوننان باسىم ءتۇستى – 7:5, 6:2. ال يۋليا پۋتينتسەۆا گۆادالاحاراداعى دودانىڭ ءبىرىنشى كەزەڭىندە ويدا جوقتا الەمدىك رەيتينگتە وزىنەن الدەقايدا تومەن تۇرعان پولشالىق ماگدالەنا فرەشكە ەسە جىبەردى – 3:6, 4:6. سول سەكىلدى دميتري پوپكو دا ءساتسىز ونەر كورسەتتى. ول ەكۆادوردىڭ امباتو قالاسىنداعى ءتۋرنيردىڭ تۇساۋكەسەر باسەكەسىندە ارگەنتينالىق حۋان وتەگۋيگە جول بەردى – 4:6, 5:7.