مالايزيادا ءوتىپ جاتقان «لانگكاۆي تۋرىنىڭ» التىنشى كەزەڭىندە Astana Qazaqstan Team كومانداسىنىڭ شاباندوزى گلەب سيريتسا مارە سىزىعىن ەكىنشى بولىپ كەستى.
جارىستىڭ التىنشى كەزەڭى مالايزياداعى پينانگ شتاتىنىڭ استاناسى – دجوردجتاۋن قالاسىنان باستالىپ, الور-سەتاردا ءوز مارەسىنە جەتتى. 120,4 شاقىرىمدىق جازىق ايماقتا وتكەن باسەكەدە نورۆەگيالىق ۆەلوشاباندوز ەرلەند بليكرا (Uno-X Pro Cycling Team) توپ جاردى. ول مارە سىزىعىن 2 ساعات 49 مينۋت 49 سەكۋند ىشىندە كەستى. ودان ءسال عانا قالىپ قويعان گلەب سيريتسا ەكىنشى ساتىعا جايعاستى. بۇل – «استانا» ساپىنداعى رەسەيلىك لەگيونەردىڭ وسى جارىستاعى ءۇشىنشى ءىرى جەتىستىگى. بۇعان دەيىن ول ۆەلوكوپكۇندىكتىڭ ءبىرىنشى كەزەڭىندە جەڭىمپاز اتانسا, ەكىنشى جارىس كۇنىندە مارەگە ەكىنشى بولىپ جەتكەن ەدى. التىنشى كەزەڭدە گەرمانيالىق ريۋديگەر زەليگ (Lotto Soudal) ءۇشىنشى ساتىعا تۇراقتادى.
جالپى ەسەپتە 24 جاستاعى كولۋمبيالىق يۆان سوسا (Movistar Team) ءتورت كەزەڭنەن بەرى ەشكىمگە جەتكىزبەي كەلەدى. ونىڭ ۋاقىتى – 21:06:03. ەكىنشى ورىنداعى بريتانيالىق حيۋ كارتي (Ef Education – Easypost) كوشباسشىدان 22 سەكۋندقا قالىپ تۇر. ۇزدىك ۇشتىككە تاعى ءبىر كولۋمبيالىق ۆەلوشاباندوز ەينەر اۋگۋستو رۋبيو رەيەس (Movistar) جايعاستى.