فۋتبولدان قازاقستان چەمپيوناتى مارەسىنە جاقىنداعان سايىن كوماندالار اراسىنداعى جوعارى ورىندارعا تالاس-تارتىس قىزا ءتۇستى. قازاقستاندىق داڭقتى فۋتبولشى جانە جاتتىقتىرۋشى ۆايت تالعاەۆتىڭ قۇرمەتىنە وتكەن XXIII تۋردا وتاندىق فۋتبول جانكۇيەرلەرى «توبىل» مەن «اقتوبە», «قايرات» پەن «استانا», «كاسپي» مەن «ماقتاارال» جانە تاعى باسقا كلۋبتار اراسىنداعى تارتىسقا تولى قىزىقتى ماتچتاردىڭ كۋاسى بولدى.
قوستانايداعى «توبىل» مەن «اقتوبە» ماتچى وسى تۋردىڭ ەڭ ماڭىزدى ويىنى بولعانىمەن, قازاقستاندىق فۋتبول جانكۇيەرلەرى «ەل-كلاسيكو» دەپ ايدار تاققان «قايرات» پەن «استانا» كەزدەسۋى دە ءدال وسى تۋرعا تۇسپا-تۇس كەلگەندىكتەن, ەلىمىزدىڭ ەڭ ماڭدايالدى كوماندالارىنىڭ اراسىنداعى تارتىستى 23-تۋردىڭ ورتالىق ويىنى بولدى دەۋگە تولىق نەگىز بار. كەيىنگى بىرنەشە جىلدا ەكى ۇجىم ورتاسىنداعى ماتچ جانكۇيەر قاۋىمىنىڭ دەلەبەسىن قوزدىرعان دەربي-دوداعا اينالىپ ۇلگەردى. يسپانياداعى ءمادريدتىڭ «رەالى» مەن كاتالونيانىڭ «بارسەلوناسى» اراسىنداعى «ەل-كلاسيكو» سياقتى ءبىزدىڭ ەلدىڭ «ەل-كلاسيكوسى» دا جىل سايىن فۋتبول جانكۇيەرلەرى اسىعا كۇتەتىن ماتچقا اينالعالى قاشان.
«قايرات» پەن «استانا» وسىمەن بيىلدىققا ەكىنشى مارتە كەزدەستى. العاشقى ويىن مامىر ايىندا ەلورداداعى «استانا ارەنا» ستاديونىندا ءوتىپ, سول كەزدە الاڭ يەلەرى الماتىلىقتاردى 6:0 ەسەبىمەن تىزە بۇكتىرگەن بولاتىن. ماتچتان كەيىن «قايرات» جانكۇيەرلەرى ويىننىڭ ەسەبى كەزدەيسوق ناتيجە ەكەنىن, «قايرات» الماتىداعى ماتچتا «استانانىڭ» «سازايىن» بەرەدى دەپ مالىمدەگەن ەدى. وزگە كلۋبتىڭ جانكۇيەرلەرى دە «قايرات» پەن «استانا» اراسىنداعى ماتچتىڭ قارىمتاسى قالاي بولار ەكەن دەپ, اسىعا كۇتتى.
دەگەنمەن جانكۇيەرلەر كۇتكەن بۇل كەزدەسۋدىڭ دە العاشقى «ەل-كلاسيكودان» ەش ايىرماشىلىعى بولعان جوق. تەك ماتچتىڭ وتكەن ورنى وزگەردى دەمەسەڭىز, تابلوداعى ەسەپ ءدال ءبىرىنشى ماتچتاعى ناتيجەگە ۇقساس بولدى. «ورتالىق» ستاديونداعى باسەكەدە «قايرات» «استانادان» تاعى دا ءىرى ەسەپپەن ۇتىلدى – 0:4. ەكى ويىننىڭ ناتيجەسى بويىنشا 10:0 ەسەبىمەن جەڭىلگەن الماتىلىقتار 180 مينۋت بويى «استانا» قاقپاسىنا بىردە-ءبىر گول سوعا المادى. مامىرداعى ماتچتا «استانا» ساپىنان مارين توماسوۆ حەت-تريكتىڭ, پەدرو ەۋجەنيو ءدۋبلدىڭ اۆتورى اتانعان بولسا, قازىر رەسەي چەمپيوناتىنداعى «ۋرال» كلۋبىندا ونەر كورسەتىپ جاتقان شابۋىلشى راي ۆلۋت ءبىر مارتە مەرگەندىگىمەن كوزگە تۇسكەن ەدى.
اراعا ءتورت اي سالىپ الماتىداعى قارىمتا كەزدەسۋدىڭ تاعدىرىن «استانانىڭ» قورعاۋشىسى تيمۋر دوسماعانبەتوۆتىڭ ءبىر ءوزى شەشىپ تاستادى. كەزدەسۋدىڭ 10-مينۋتىندا ەسەپتى اشقان «استانانىڭ» قورعاۋشىسى ەكىنشى تايمنىڭ 59, 88 جانە 90-مينۋتىندا تاعى دا ءۇش مارتە «قايرات» قاقپاسىنان ساڭىلاۋ تاۋىپ, پوكەردىڭ اۆتورى اتاندى.
ت.دوسماعامبەتوۆتىڭ كەشەگى بەنەفيسىنەن كەيىن ەسىمىزگە وسىدان 58 جىل بۇرىنعى وقيعا ءتۇستى. 1964 جىلدىڭ 26 تامىزىندا وداق چەمپيوناتى اياسىندا ماسكەۋگە ساپار شەككەن الماتىنىڭ «قايراتى» جەرگىلىكتى «سپارتاك» كلۋبىمەن كەزدەسىپ, سول ماچتا قازاقتىڭ داڭقتى اياقدوپ شەبەرى تيمۋر سەگىزباەۆ ەرەكشە ونەرىمەن دارالاندى. الاڭ يەلەرىنىڭ قاقپاسىنا جاۋاپسىز ەكى گول سوققان تيمۋردىڭ ەرلىگىنە ءتانتى بولعان كەڭەس وداعىنىڭ «فۋتبول» اپتالىعى باسىلىمى ماتچتىڭ ەرتەسى كۇنى «تيمۋر جانە ونىڭ كومانداسى» دەگەن تاقىرىپپەن كولەمدى ماقالا جاريالاعان ەدى. مىنە, سول قازاق فۋتبولىنداعى تيمۋرلاردىڭ جالعاسى بولعان تيمۋر دوسماعانبەتوۆ كەشەگى ماتچتا ءبىر ءوزى «استانانى» ورگە سۇيرەپ, كومانداسىن چەمپيوندىققا تاعى ءبىر قادام جاقىنداتتى.
«استانا» جانكۇيەرلەرىنىڭ قۋانىشىنا قاراي, تۋرنير كەستەسىندە كوش باستاپ تۇرعان «اقتوبە» كەيىنگى ءۇش تۋردا وسىمەن ەكىنشى مارتە ۇپاي جوعالتتى. 20-تۋردا «اقجايىقتان» 3:1 ەسەبىمەن جەڭىلىپ قالعان اندرەي كارپوۆيچ شاكىرتتەرى بۇل تۋردا سىرت الاڭدا قوستانايدىڭ «توبىلىنان» ۇتىلدى – 1:0. چەمپيوندىققا تالاس جۇرگىزىپ جاتقان ەكى ۇجىم اراسىنداعى ماتچ «اقتوبە» قاقپاسىنا پەنالتي بەلگىلەنگەنگە دەيىن تەڭ دارەجەدە ءوتىپ جاتقان ەدى. كەزدەسۋدىڭ 81-مينۋتىندا قوناق كوماندانىڭ فۋتبولشىلارى ءوز الاڭىندا ءتارتىپ بۇزىپ, باس تورەشى ستاس پوكاتيلوۆ قاقپاسىنا 11 مەترلىك ايىپ دوبىن بەلگىلەدى. «توبىلدىڭ» كاپيتانى سەرىكجان مۇجىقوۆ العاشقى مۇمكىندىگىندە دالدىك تانىتا الماعانىمەن, تورەشى پەنالتي ورىنداۋ ساتىندە قوناقتار تاعى دا ەرەجە بۇزدى دەپ, مۇجىقوۆقا ەكىنشى رەت پەنالتي تەپكىزدى. كاپيتان بۇل جولى بىلگەنىنەن جاڭىلعان جوق – 1:0. ماتچ سوڭىنا دەيىن تارازى باسىن تەڭەستىرە الماي, ءۇش ۇپايدان قاعىلعان «اقتوبە» قوستانايدان قۇر قول قايتتى. «اقتوبەلىكتەردىڭ» ۇپاي جوعالتقانىن ءتيىمدى پايدالانعان «استانا» اراداعى ۇپاي سانىن بىرەۋگە دەيىن قىسقارتتى.
سونداي-اق «كاسپي» مەن «ماقتاارال» اراسىنداعى ماتچتا دا توسىن ناتيجە تىركەلدى. بۇل كەزدەسۋدە «كاسپيگە» قاراعاندا كوش سوڭىنداعى «ماقتاارالعا» ءۇش ۇپاي اۋاداي قاجەت ەدى. الايدا ماتچتىڭ العاشقى تايمىندا الاڭ يلەرى قوناق كوماندا قاقپاسىنا ەكى گول سالىپ, ءبىرىنشى تايمدى ءوز پايداسىنا اياقتادى. بىلتىر «ماقتاارالدى» جوعارى ليگاعا شىعارعان بىلىكتى باپكەر كونستانتين گوروۆەنكو ءۇزىلىس ۋاقىتىندا شاكىرتتەرىنە كەرەكتى اقىل-كەڭەسىن ايتىپ, فۋتبولشىلاردىڭ نامىسىن جاعا الدى. ەكىنشى 45 مينوتتە تۇركىستان وبلىسىنىڭ كومانداسى ماتچ سوڭىنا دەيىن «كاسپي» قاقپاسىنا ءتورت گول سوعىپ, تاماشا كامبەك جاسادى – 2:4. ماڭىزدى ءۇش ۇپايىن يەلەنگەن «ماقتاارال» تۋرنير كەستەسىندە ءبىر ساتى جوعارىلاپ, 13-ورىنعا كوتەرىلدى. ال سىرت الاڭدا «تارازبەن» تەڭ ويناعان (0:0) «اقجايىق» 14-ورىنعا سىرعىدى.
سونىمەن قاتار بۇل تۋردا «قىزىلجار» ءوز الاڭىندا «اتىراۋدى» تىزە بۇكتىرسە (3:1), «ورداباسى» دا شىمكەنتتە «شاحتەردەن» ايلاسىن اسىردى – 1:0. «اقسۋ» تۇركىستاندا جەرگىلىكتى «تۇراندى» ءبىر دوپ ايىرماسىمەن قاپى قالدىردى – 0:1.
كەلەسى XXIV تۋردا «ماقتاارال» – «توبىل», «اقجايىق» – «قىزىلجار», «استانا» – «اتىراۋ», «شاحتەر» – «قايرات», «تاراز» – «كاسپي», «اقتوبە» – «تۇران» جانە «اقسۋ» – «ورداباسى» كلۋبتارى كەزدەسەدى.
تۋرنير كەستەسى
№
كلۋب
ويىن
جەڭىس
تەڭ
جەڭى-ءلىس
دوپ ايىر-ماسى
ۇپاي
1
«اقتوبە»
23
14
3
6
34-23
45
2
«استانا»
23
13
5
5
55-21
44
3
«توبىل»
23
12
5
6
40-30
41
4
«قايرات»
23
10
6
7
29-32
36
5
«ورداباسى»
23
11
2
10
32-35
35
6
«اقسۋ»
23
10
2
11
28-32
32
7
«شاحتەر»
23
9
4
10
30-28
31
8
«كاسپي»
23
9
2
12
24-37
29
9
«اتىراۋ»
23
7
7
9
26-30
28
10
«تاراز»
23
6
9
8
24-23
27
11
«قىزىلجار»
23
6
8
9
27-27
26
12
«تۇران»
23
5
10
8
20-27
25
13
«ماقتاارال»
23
6
6
11
23-37
24
14
«اقجايىق»
23
6
5
12
16-26
23