تاشكەنتتە التىن الا المادىق

بار بولعانى – قوس قولا

وزبەكستان استاناسىندا ۇيىمداس­تىرىلعان بايراقتى باسەكەدە قازاقستان قۇراماسىنىڭ 17 وكىلى ونەر كورسەتىپ, ەكى قولا مەدال جەڭىپ الدى. ەلدوس سمەتوۆ پەن ءابيبا ابۋجاقىنوۆانىڭ بۇل جۇلدەلەرىنەن كەيىن قازاقستان دزيۋدو قۇراماسىندا العا ىلگەرىلەۋ بار دەپ ايتايىن دەسەك, سپورتشىلارىمىز جەتى جىلدان بەرى ءبىر التىن مەدالعا قول جەتكىزە الماي كەلە جاتىر. قازاق دزيۋدوسى قۇلدىراپ بارا جاتىر دەپ بايبالام سالايىق دەسەك, قورجىنىمىز كەيىنگى سەگىز الەم بىرىنشىلىگىندە بىردە-ءبىر رەت بوس قايتقان ەمەس. دەمەك قازاقستان دزيۋدوسى بىرنەشە جىلدان بەرى ءبىر ورىندا سىرەسىپ تۇر دەگەن ءسوز. سوندا دەيمىز, مەملەكەتتىڭ جىل سايىن سپورتشىلاردى قولداۋعا بولەتىن قارجىسى, شەتەلدىڭ ەڭ مىقتى دەگەن بىلىكتى باپكەرلەرىنە بەرەتىن جالاقىسى اۋاعا ۇشىپ جاتقان جوق پا؟

ايتەۋىر, جىل سايىنعى الەم چەمپيوناتتارىندا بۇكىل ءبىر فەدەراتسيانى اينالدىرعان ءبىر-ەكى عانا سپورتشى جۇلدە الىپ, ابىرويسىزدىقتان قۇتقارىپ كەلەدى. ماسەلەن, 2017 جىلى ماجارستاندا وتكەن الەم چەمپيوناتىندا گالبادراح وتگونتسەتسەگ جالعىز قولانى ولجالاسا, ءبىر جىلدان كەيىن باكۋدەگى بايراقتى باسەكەدە ەرلان سەرىكجانوۆ (كۇمىس) پەن گالبادراح وتگونتسەتسەگ (قولا) ۇزدىكتەر قاتارىنان كورىندى. ال 2019 جىلعى توكيوداعى ءدۇبىرلى دودادا ەلدوس سمەتوۆتىڭ جالعىز قولاسى كوڭىلگە مەدەت بولدى. بۋداپەشتتەگى بىلتىرعى باسەكەدە عۇسمان قىرعىزباەۆ فينالدا جەڭىلىپ, كۇمىستى قاناعات تۇتۋعا ءماجبۇر بولدى. بيىل ەلدوس سمەتوۆ 66 كيلودان ءوز سالماعىنا (60 ك) ورالماعاندا, ءابيبا بابىندا بولماعاندا بالۋاندارىمىز وزبەكستاننان وزەگى ورتەنىپ قايتقالى تۇر ەكەن. ابىروي بولعاندا, ەكى بالۋانىمىز دا جارىستىڭ العاشقى كۇنى قوس قولا ولجالاپ, ۇزدىكتەر قاتارىنان كورىندى.

ءبىر ايتا كەتەرلىگى, بيىل ايەلدەر ارا­سىنداعى ازيا چەمپيوناتىنىڭ كۇمىس جۇلدەگەرى اتانعان ءابيبا ابۋجاقىنوۆا تاشكەنتتەگى جەڭىسىنىڭ ارقاسىندا قازاق قىزدارى اراسىندا الەم چەمپيوناتىندا جۇلدە العان تۇڭعىش دزيۋدوشى رەتىندە تاريحتا قالدى.

بالۋاندارىمىز سەنىمدى اقتامادى

تاشكەنتتەگى الەم چەمپيوناتىنا تالاي ءدۇبىرلى دودادا ىسىلعان, حالىقارالىق جارىستاردا ولجا سالىپ جۇرگەن تاجىريبەلى سپورتشىلارىمىزدىڭ ءبىرشاماسى باردى. ءتىپتى ولاردىڭ الدى وليمپيا ويىن­دارىنا قاتىسىپ, الەم جانە ازيا چەمپيوناتتارىندا جۇلدە العان, قالعان­دارى حالىقارالىق جارىستارعا ۇزدىكسىز قاتىسىپ كەلەدى. سول جارىستاردا جيعان تاجىريبەسى جۇلدەگە اپاراتىنداي ساڭلاق­تارىمىز ەل نامىسى سىنعا تۇسكەن ساتتە سۇرەڭسىز ونەر كورسەتىپ, بارشا جانكۇيەر­لەردى جەرگە قاراتتى.

ماسەلەن, بىلتىر 66 كيلودا الەم بىرىنشىلىگىنىڭ كۇمىس جۇلدەگەرى اتانعان عۇسمان قىرعىزباەۆ پەن 73 كيلوداعى بيىلعى ازيا چەمپيونى دانيار شامشاەۆ ەكىنشى كەزەڭنەن ارىگە اسا المادى. 60 كيلودا بەلدەسكەن ماعجان شامشاددين, 81 كيلوداعى ابىلايحان جۇبانازار جانە ازيا ويىندارىنىڭ جەڭىمپازى, ريو جانە توكيو وليمپيادالارىنا قاتىسقان ديدار حامزا (90 كگ), ازيا چەمپيوناتىنىڭ بىرنەشە دۇركىن جەڭىمپازى يسلام بوزباەۆ (100 كگ) جانە اسا اۋىر سالماقتاعى ەراسىل قاجىباەۆتىڭ (+ 100 كگ) ناتيجەلەرى ءتىپتى ناشار. ولاردىڭ بىردە-بىرەۋى ءبىرىنشى اينالىمنان ارىگە اسا المادى. تەك 100 كيلودا بەلدەسكەن نۇرلىحان شارحان عانا ءۇشىنشى اينالىمعا دەيىن جەتە الدى.

ءابيبادان باسقا قىزدارىمىزدان دا قايىر بولمادى. سەۆارا نىشانباەۆا (57 كيلو), ءمولدىر نارىنوۆا مەن ەسمىگۇل كۇيۋلوۆا (63 كگ), ارۋنا جانگەلدينا (78 كگ) جانە كاميلا بەرلىقاش (+78 كيلو) العاشقى اينالىمداردا سۇرىنسە, نۇرسۇلۋ ەراليەۆا (52 كيلو) مەن اناستاسيا مايا­كوۆا (70 كگ) ەكىنشى اينالىمدا ۇتىلىپ قالدى. جالپى, قازاقستاندا ايەلدەر دزيۋدوسىنىڭ جەڭىل سالماعىندا كىشكەنە بولسىن, ءوسۋ, العا جىلجۋ بايقالادى. ال وزگە سالماقتاردا باياعى جارتاس سول جارتاس كۇيىندە.

وزبەكتەر وزىپ تۇر

وزبەكستان قۇراماسىنىڭ بالۋاندارى ءوز ەلىندە وتكەن الەمدىك جارىستا ايانىپ قالمادى. 2011 جىلعى الەم چەمپيوناتىنان كەيىن وڭتۇستىكتەگى كورشىمىزدىڭ بالۋاندارى العاش تۇعىردىڭ ەڭ بيىك ساتىسىنان كورىندى. سول ارالىقتا قولانىڭ وزىنە ارەڭ قول جەتكىزىپ جۇرگەن وزبەكتەر بۇل جولى ءبىر ەمەس ەكى التىن مەدال جەڭىپ الدى. وزبەكستان قۇراماسىنا العاشقى التىندى ناۋاي وبلىسىنىڭ نۇراتا اۋدانىندا دۇنيەگە كەلگەن داۋلەت بابانوۆ سالدى. 90 كيلودا كۇرەسكەن 2021 جىلعى الەم بىرىنشىلىگىنىڭ كۇمىس جۇلدەگەرى, توكيو وليمپياداسىنىڭ قولا جۇلدەگەرى فينالدا ەۋروپا چەمپيوناتىنىڭ قولا جۇلدەگەرى يتاليالىق كريستيان پارلا­تيدەن باسىم ءتۇستى. ەكىنشى التىن جۇل­دەنى 100 كيلو سال­ماقتا كۇرەسكەن مۋزاففار­بەك تۋروبوەۆ جەڭىپ الدى. ول فينالدا بىلتىرعى پا­نامەريكا ويىندارىنىڭ چەمپيونى كانا­دالىق كايل رەيەستى تىزە بۇكتىردى. وسىلايشا, ەكى التىن مەدال ەن­شىلەگەن وزبەكستان قۇراماسى جالپى­كو­مان­دالىق ەسەپتە ءۇشىنشى ورىنعا يە بولدى.

قاي ەلدىڭ قارقىنى كۇشتى؟

كەيىنگى ون جىلدىڭ بەدەرىندە ەرلەر سايىسىندا جاپونيا بالۋاندارىنىڭ اتى وزىپ تۇر. ۇزاققا بارماي-اق, كۇنشىعىس ەلى وكىلدەرىنىڭ سوڭعى 10 جىلداعى ناتي­جەسىنە قارايتىن بولسا, ولار ءار الەم چەم­پيوناتىندا كەم دەگەن ەكى التىننان ولجالاپ ءجۇر. جاپون بالۋاندارى بيىل دا سول مەجەدەن كورىندى. تاشكەنت تاتاميىندە ولار 2 التىن مەن 3 كۇمىس, 1 قولا مەدالدى جەڭىپ الدى. ەكىنشى ورىندا – وزبەكستان. الا تاقيالى اعايىنداردىڭ ەنشىسىندە ەكى التىن بار. موڭعوليا قۇراماسى ءۇشىنشى ساتىعا جايعاستى. ولار 1 التىن, 1 كۇمىس مەدالدى قورجىنعا سالدى. سونداي-اق گرۋزيا جانە كۋبا دزيۋدوشىلارى ءبىر-ءبىر رەتتەن جەڭىس تۇعىرىنىڭ ەڭ بيىك ساتىسىنا كوتەرىلدى.

ايەلدەر اراسىندا دا جاپونيا قۇرا­ماسىنا تەڭ كەلەر كوماندا تابىلماي تۇر. ولار 3 التىن, 1 كۇمىس جانە 2 قولا جۇلدەنى قورجىنعا سالدى. ەكىنشى ورىنعا 2 التىن, 1 كۇمىسپەن برازيليا قىزدارى جاي­عاسسا, ءۇشىنشى ورىنعا حورۆاتيا قىز­دارى تۇراقتادى – 1 التىن, 1 كۇمىس. سونى­مەن قاتار فرانتسيانىڭ ءبىر وكىلى تاش­كەنتتە التىننان القا تاقتى.

جالپىكوماندالىق ەسەپتە دە جاپونيا قۇراماسى توپ جاردى. ولار بارلىعى 12 جۇلدە (5 التىن, 4 كۇمىس, 3 قولا) جەڭىپ الدى. ەكىن­شى ورىنداعى برازيليادا 4

(2 ال­تىن, 1 كۇمىس, 1 قولا) مەدال بار. ۇز­دىك ۇشتىكتى جارىس قو­جايىن­دارى 2 ال­تىنمەن تۇيىندەدى. ال قور­جىنىن­دا نەبارى ەكى-اق قولاسى بار قازاقستان قۇرا­­ماسى ازەربايجان, نيدەرلاند جانە كورەيا­مەن بىرگە 15-ورىندى ءبولىستى.