استانادا ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ VI ءسامميتىنىڭ جۇمىسى باستالدى. سامميتكە 11 ەلدىڭ مەملەكەت باسشىلارى قاتىسىپ جاتىر, دەپ حابارلايدى Egemen.kz.
سامميت قازاقستان پرەزيدەنتى قاسىم-جومارت توقاەۆتىڭ توراعالىعىمەن وتۋدە.
ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ VI ءسامميتى اوسشك شاقىرۋ تۋرالى باستامانىڭ 30 جىلدىعىنا ورايلاستىرىلعان.
ايتا كەتسەك, قازاقستان استاناسى ەكى كۇن بويى مەملەكەت باسشىلارى مەن شەتەلدىك دەلەگاتسيالاردى قابىلداپ جاتىر.
ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ سامميتىنە 11 مەملەكەت باسشىسى - ازەربايجان, يراك, يران, قىرعىزستان, پالەستينا, تاجىكستان, رەسەي, تۇركيا, وزبەكستان پرەزيدەنتتەرى, كاتار ءامىرى, سونداي-اق ۆەتنام ۆيتسە-پرەزيدەنتى, قحر توراعاسىنىڭ ورىنباسارى جانە بەس مينيستر قاتىسادى. اوسشك مەملەكەتتىك باقىلاۋشىسى بولىپ تابىلاتىن بەلارۋس پرەزيدەنتى دە ەلورداعا كەلدى.
اوسشك باستاماسىن قازاقستان 1992 جىلى بۇۇ باس اسسامبلەياسىنىڭ 47 سەسسياسىندا العا تارتتى. قىزمەتتىڭ نەگىزگى ماقساتى مەن باعىتى - ازياداعى بەيبىتشىلىك پەن قاۋىپسىزدىكتى قامتاماسىز ەتۋدىڭ كوپجاقتى تاسىلدەرىن ازىرلەۋ ارقىلى ىنتىماقتاستىقتى نىعايتۋ.
بۇعان دەيىن اوسشك-نى تولىققاندى حالىقارالىق ۇيىمعا اينالدىرۋ جوسپارلارى تۋرالى حابارلانعان ەدى.