فۋتبولدان قازاقستان ۇلتتىق قۇراماسى قاراشا ايىندا تاشكەنتتە وزبەكستان فۋتبولشىلارىمەن جولداستىق ماتچ وتكىزەدى. بۇل تۋرالى قازاقستان فۋتبول فەدەراتسياسىنىڭ ءباسپاسوز قىزمەتى حابارلادى.
«وزبەكستان قۇراماسى ەۋرو-2024 ىرىكتەۋ كەزەڭىنە دايىندىق ءۇشىن جاقسى قارسىلاس دەپ سانايمىن. جاتتىقتىرۋشىلار شتابى ءۇشىن كوپ مالىمەت جيناۋعا مۇمكىندىك بەرەدى. وزبەكستاندا مىقتى فۋتبولشىلار كوپ. سول سەبەپتى وسى ويىندا ەۋروپا چەمپيوناتىنىڭ الداعى ىرىكتەۋ كەزەڭىندە ءۇمىت ارتاتىن فۋتبولشىلاردى ءبىر تەكسەرىپ الامىن دەپ ويلايمىن. وتە قىزىقتى ويىن بولادى دەپ ۇمىتتەنەمىن», دەيدى ماگومەد اديەۆ.
ايتا كەتەيىك, قازاقستان مەن وزبەكستان قۇرامالارى بۇعان دەيىن جاسىل الاڭدا التى رەت كەزدەسكەن. ونىڭ بىرەۋىندە جەرلەستەرىمىز, ەكى ماتچتا وزبەكستان فۋتبولشىلارى جەڭىسكە جەتكەن. ال ءۇش ويىن تەڭ ەسەپپەن اياقتالعان. قازان ايىنداعى فيفا رەيتينگى بويىنشا وزبەكستان قۇراماسى 77-ورىندا تۇر. قازاقستان 113-ورىنعا جايعاسقان. ەكى قۇراما اراسىنداعى جولداستىق ماتچ وسى جىلدىڭ 16 قاراشاسىندا تاشكەنتتەگى «پاحتاكور» ستاديونىندا وتەدى دەپ جوسپارلانعان.