ATP 500 Astana Open: دجوكوۆيچ – جەڭىمپاز

ەلورداداعى ەركە ەسىلدىڭ جا­عا­سىندا تۇڭعىش رەت ۇيىمداس­تىرىلعان اتر 500 ساناتىنداعى Astana Open تۋرنيرىندە الەمنىڭ ەڭ تاڭداۋلى دەگەن ءدۇلدۇل تەن­نيسشىلەرى باق سىناپ, استانا تۇر­عىندارىنا ناعىز تەننيس مەرە­كەسىن ۇسىندى. بۇل تۋرنير اتر 500 ساناتىنا ەنگەنىمەن, قاتىسۋشىلاردىڭ اتاق-داڭقى, Beeline Arena سپورت كەشەنىنىڭ كورت­تارىندا وتكەن تارتىستى باسە­كەلەرى, ءتۋرنيردىڭ جوعارى دەڭگەي­دە ۇيىمداستىرىلۋى استاناداعى جارىستىڭ دەڭگەيىن اتر 500-دەن «ۇلكەن دۋلىعا», اتر 1000 تۋرنيرلەرىنە دەيىن كوتەرىپ تاستادى دەسەك, ارتىق ايتقاندىق ەمەس شىعار. ماسەلەن, Astana Open تۋرنيرىمەن قاتار وتكەن جاپو­نياداعى Rakuten Japan Open اتر 500 دوداسىنا الەمدىك رەيتينگتە توپ-20-دا تۇرعان ەكى-اق تەننيسشى قاتىستى.

جارىستىڭ العاشقى كۇنىنەن باستاپ سەنساتسياعا تولى بولعان استاناداعى ءتۋرنيردىڭ شيرەك فينالىنا دەيىن كارلوس الكاراس, فەليكس وجە-الياسسيم, ستانيسلاس ۆاۆرينكا, مارين چيليچ سەكىلدى ءتىس قاققان تەننيسشىلەر جەتىپ كەلە المادى. ¼ فينالعا جولداما الىپ, باعى جانعان سەگىز تەننيسشىنىڭ قاتارىنان اندرەي رۋبلەۆ, ادريان ماننارينو, ستەفانوس تسي­تسيپاس, حۋبەرت حۋركاچپەن نو­ۆاك دجو­كوۆيچ, كارەن حاچانوۆ, دا­نيل مەد­ۆەدەۆ جانە روبەرتو باۋتيستا-اگۋت تابىلدى.

العاشقى شيرەك فينالدا الەمنىڭ 9-راكەتكاسى اندرەي رۋبلەۆ پەن فرانتسيالىق ادريان ماننارينو (51 اتر) شەبەرلىك بايقاستى. قارسىلاستار وسىعان دەيىن ەكى رەت كەزدەسىپ, ەكەۋى دە ءبىر مارتەدەن جەڭىسكە جەتكەن بولاتىن. ءۇشىنشى كەزدەسۋدە رەسەيلىك تەننيسشى ەكى سەتتە – 6:1, 6:2 ەسە­بىمەن ەش قينالماي جەڭىسكە جەتىپ, جارتىلاي فينالعا جولداما الدى. شيرەك فينالدىڭ ەكىنشى جۇبىندا الەمنىڭ 6-راكەتكاسى گرەكيالىق ستەفانوس تسيتسيپاس پولياك حۋبەرت حۋركاچپەن وينادى. ءوزارا سەگىز ماتچتىڭ التاۋىندا جەڭىسكە جەتكەن تسيتسيپاس بۇل جولى دا پول­شا وكىلى حۋبەرت حۋركاچتى تىزە بۇك­تىردى – 7:6 (10:8), 6:3.

ءۇشىنشى جۇپتا الەمنىڭ 7-راكەتكاسى سەربيالىق نوۆاك دجو­كوۆيچ پەن رەسەيلىك كارەن حا­چانوۆ ونەر كورسەتتى. 2018 جىلى پاريجدە وتكەن «ماستەرس» ءتۋر­نيرىنىڭ فينالىندا دجوكوۆيچتى جەڭگەن حاچانوۆ سول جىلعى ەرلىگىن قايتالاي المادى. نوۆاك رەسەيلىك كارەن حاچانوۆتى ەكى سەتتە – 6:4, 6:3 ەسەبىمەن جەڭىپ كەتتى. شيرەك فينالدىڭ سوڭعى جۇبى – الەمنىڭ 4-راكەتكاسى رە­سەيلىك دانيل مەدۆەدەۆ پەن يس­­پانيالىق روبەرتو باۋتيستا-اگۋت شەبەرلىك بايقاستى. جالپى, رەسەيلىك تەننيسشى ءۇشىن روبەرتو وتە قولايسىز قارسىلاس سانالادى. سەبەبى ەكى تەننيسشى اراسىنداعى بەس كەزدەسۋدىڭ بىرەۋىندە عانا دا­نيل يسپانيالىقتى سۇرىندىرگەن بولاتىن. دەگەنمەن استانادا جوعارى دەڭگەيدە ونەر كورسەتكەن مەدۆەدەۆ باۋتيستانى بەت قاراتپاي جەڭدى – 6:1, 6:1.

وسىلايشا, جارتىلاي فينالعا ەكى رەسەيلىك تەننيسشى – اندرەي رۋبلەۆ جانە دانيل مەدۆەدەۆ, سونداي-اق گرەكيالىق ستەفانوس تسيتسيپاس پەن سەربيالىق نوۆاك دجوكوۆيچ شىقتى.

ءبىرىنشى جارتىلاي فينالدىق باسەكەدە ستەفانوس تسيتسيپاس پەن اندرەي رۋبلەۆ وينادى. ەكى تەن­نيس­شى بۇگىنگە دەيىن كورتتا 11 مارتە كەزدەسىپ, التاۋىندا گرەكيالىق تەننيسشى باسىم بول­عان. بەس مارتە جەڭىسكە جەتكەن رۋبلەۆ ءۇشىن بۇل تارازى باسىن تەڭەستىرەتىن تاماشا مۇمكىندىك ەدى. الايدا اندرەي وزىنە بەرىلگەن مۇمكىندىكتى پايدالانا المادى. ەكى ساعات ون مينۋتقا جالعاسقان تارتىستى باسەكەنىڭ العاشقى پارتياسى 6:4 ەسەبىمەن رەسەيلىك تەننيسشىنىڭ پايداسىنا اياقتالدى. دەگەنمەن تسيتسيپاس ەكىنشى سەتتە تارازى باسىن تەڭەس­تىرىپ (4:6), ءۇشىنشى, شەشۋشى سەتتە جەڭىستى ج ۇلىپ الدى – 6:3. ستەفانوس تسيتسيپاس Astana Open ءتۋرنيرىنىڭ العاشقى ءفيناليسى اتاندى.

ەكىنشى جارتىلاي فينالدا دانيل مەدۆەدەۆ پەن نوۆاك دجوكوۆيچ شەبەرلىك بايقاستى. ەكى تەننيسشى كەيىنگى ءۇش ماتچتا تەك فينالدا كەزدەسكەن. 2021 جىلعى فرانتسياداعى «ماستەرس» پەن اۋستراليا اشىق بىرىنشىلىگىندە نوۆاك جەڭىسكە جەتسە, سول جىلعى US Open دوداسىندا ءدانيلدىڭ مەرەيى ۇستەم بولدى. استاناداعى جارىستا ەكى تەننيسشىنىڭ جولدارى جارتىلاي فينالدا قيىستى. ءبىرىنشى پارتيادا رەسەيلىك سپورتشى باسىم بولعانىمەن (6:4), ەكىنشى سەتتە دجوكوۆيچ تاي-برەيكتە ءساتتى ويناپ (7:6 (8:6)), تارازى باسىن تەڭەستىرىپ كەتتى. سپورت كەشەنىنە جينالعان جانكۇيەرلەر شەشۋشى ءۇشىنشى سەتتى تاماشالايمىز دەپ وتىرعاندا مەدۆەدەۆ جاراقاتىنا بايلانىستى ماتچتى جالعاستىرا الماي­تىنىن ايتىپ, كورتتان شىعىپ كەتتى. ءدانيلدىڭ بۇل شەشى­مىن جانكۇيەرلەر دە, نوۆاك تا تۇسىنبەي, ءبىراز اڭتارىلىپ قالدى.

ءسويتىپ, ەلورداداعى ءتۋرنيردىڭ فينالىندا الەمنىڭ جەتىنشى راكەتكاسى نوۆاك دجوكوۆيچ الەمدىك رەيتينگتە التىنشى ورىندا تۇرعان گرەكيالىق ستەفانوس تسيتسيپاسپەن كەزدەسەتىن بولدى.

بۇل – گرەكيالىق تەننيسشىنىڭ بيىلعى ماۋسىمداعى جەتىنشى فينالى. بۇعان دەيىن ول مونتە-كارلوداعى مالوركوداعى تۋرنيرلەردە دارا شىققان. قالعان ءتورت فينالدا قارسىلاسىنا جول بەرگەن ەدى. ال دجوكوۆيچ قاتارىنان ەكىنشى ءتۋرنيرىنىڭ فينالىنا شى­عىپ وتىر. استاناداعى تۋرنيرگە دەيىن تەل-اۆيۆتەگى اتر 250 دوداسىندا باس جۇلدەنى ولجالاعان بولاتىن.

تسيتسيپاس پەن دجوكوۆيچ كەشەگى ماتچقا دەيىن كورتتا ءوزارا 10 ماتچ وتكىزگەن. سونىڭ جەتەۋىندە سەربيالىق ساڭلاقتىڭ مەرەيى ۇستەم بولعان بولسا, ۇشەۋىندە تسيتسيپاس باسىم بولعان. ءبىر قىزىعى, گرەكيالىق تەننيشى نوۆاكتى 2018 جانە 2019 جىلعى تۋرنيرلەردە عانا تىزە بۇكتىرگەن. ودان كەيىنگى بارلىق ويىندا ول دجوكوۆيچتىڭ وسال تۇسىن تابا الماي كەلەدى. ولار ءتورت مارتە ءتۇرلى جارىستىڭ فينالىندا باق سىناعان جانە بارلىعى سەربيالىق تەننيسشىنىڭ جەڭىسىمەن اياقتالعان-دى. ستەفانوس نوۆاكتى ءۇش مارتە جابىق كەشەندەگى كورتتاردا جەڭگەنىن جانكۇيەرلەر جاقسى بىلەدى.

فينالدىق ماتچتىڭ ءبىرىنشى پارتياسىنداعى سەگىزىنشى گەيمدە نوۆاك برەيك جاساپ, كەيىننەن ءوز گەيمىندە جەڭىسكە جەتتى – 3:6. ەكىنشى سەتتىڭ ءۇشىنشى گەيمىندە دجوكوۆيچ تاعى ءبىر برەيك جاساپ, 1:2 ەسەبىمەن العا شىعىپ الدى. كەيىنگى گەيمدەردە ەكى تەننيسشى دە قاتەسىز وينادى. سوڭعى, ونىنشى گەيمدە سەربيالىق تەننيسشى دوپتى ويىنعا ءوزى قوسىپ, كارەراسىنداعى 90-شى جەڭىسىنە قول جەتكىزدى. قورىتىندى ەسەپ – 6:3, 6:4.

وسى جەڭىسىنىڭ ارقاسىندا نوۆاك دجوكوۆيچ Astana Open ءتۋرنيرىنىڭ باس جۇلدەسىمەن قوسا, 500 رەيتينگتىك ۇپايى مەن 355 310 مىڭ اقش دوللارىن قانجىعاسىنا بايلادى. ال فينالدا جەڭىلگەن ستەفانوس تسيتسيپاس 300 ۇپاي مەن 191 180 مىڭ اقش دوللارىن يەلەندى. سونداي-اق جارتىلاي فينالدا ۇتىلعان رەسەيلىكتەر – دانيل مەدۆەدەۆ پەن اندرەي رۋبلەۆ 180 رەيتينگتىك ۇپاي مەن 101 890 مىڭ اقش دوللارىن ولجالادى.