ليز تراسستىڭ ۇلىبريتانيا پرەمەر-ءمينيسترى بولعانىنا تۋرا ءبىر اي بولدى. وسى ارالىقتا ونىڭ رەيتينگى تومەندەپ ۇلگەردى, دەپ حابارلايدى Egemen.kz Euronews سايتىنا سىلتەمە جاساپ.
YouGov اناليتيكالىق كومپانياسى جۇرگىزگەن ساۋالناماعا سايكەس, ءسىم-ءنىڭ بۇرىنعى باسشىسىن بريتاندىقتاردىڭ تەك 14%-ى عانا قولدايدى. بۇل كورسەتكىش, ءتىپتى, بوريس دجونسوننىڭ رەيتينگىنەن كەم ءتۇستى.
ونىڭ ۇكىمەتى ۇسىنعان سالىق رەفورماسى ەڭ باي بريتاندىقتار ءۇشىن تابىس سالىعىنىڭ مولشەرلەمەسىن 45%-دان 40%-عا دەيىن تومەندەتۋ بولدى. بۇل, ءتىپتى, كونسەرۆاتورلار تاراپىنان دا قولداۋ تاپپادى, وسىنىڭ اسەرىنەن فۋنت ستەرلينگ تە رەكوردتىق دەڭگەيدە تومەندەدى.
«وسى قيىن كەزەڭدەردە ءبىز جەدەل ارەكەت ەتۋىمىز كەرەك. مەن ۇلىبريتانيانى الاساپىراننان امان-ەسەن الىپ شىعىپ, ءبىزدى ۇلت رەتىندە نىعايتۋعا بەل بۋدىم. بۇل ميسسيادا ماعان بريتاندىقتارعا دەگەن بەرىك سەنىمىم كومەكتەسەدى», دەدى ليز تراسس.
بيرمينگەمدەگى كونسەرۆاتيۆتىك پارتيا كونفەرەنتسياسىندا سويلەگەن سوزىندە ليز تراسس نازاردى ەكونوميكالىق ساياساتتان باسقا جاققا اۋىستىرۋعا تىرىستى. الايدا ونىسى دا ءساتتى بولا قويعان جوق. پرەمەر-ءمينيستردىڭ ءسوزىن «گرينپيس» بەلسەندىلەرى ءبولدى. ول ليز تراسس كليماتتىڭ وزگەرۋىمەن كۇرەسۋ بويىنشا بىرقاتار شارانى الىپ تاستايدى دەگەن قاۋىپتەن تۋىنداعان.
بۇگىندە بريتان ۇكىمەتى باسشىسىنىڭ نازارىن تالاپ ەتەتىن نەگىزگى ماسەلەلەردىڭ ءبىرى – ينفلياتسيا مەن ءومىر ءسۇرۋ قۇنىنىڭ ءوسۋى. سەنبى كۇنى كورولدىكتە سوڭعى ون جىلدىقتارداعى ەڭ ءىرى تەمىرجولشىلار ەرەۋىلى باستالدى.
جانسايا ءانۋار