قۇرلىقتىق حوككەي ليگاسىندا (قحل) باق سىناپ جاتقان ەلوردانىڭ «بارىسى» سىرت ايدىنداعى جەڭىستى جولىن قازاقستاندا دا جالعاستىردى.
قىركۇيەكتىڭ سوڭىندا ياروسلاۆل پەن ماسكەۋگە ساپار شەگىپ, «لوكوموتيۆتى» بۋلليتتە تىزە بۇكتىرىپ (1:0), «سپارتاكتى» نەگىزگى ۋاقىتتا سان سوقتىرعان (3:1) «بارىس» ەندى, مىنە, ەلورداداعى باسەكەدە ء«سوچيدى» ءسۇرىندىردى. «باتىس» كونفەرەنتسياسىندا سوڭعى ورىنداردىڭ بىرىندە كەلە جاتقان رەسەيلىك كوماندا «بارىس ارەناداعى» ماتچتىڭ العاشقى كەزەڭىندە ء«ا» دەگەننەن ەسەپتە العا شىقتى. نيكيتا زوركين مەن نيكيتا پيۆتساكيننىڭ سوققان شايبالارىنا ەكىنشى كەزەڭدە «بارىس» ويىنشىلارى ءۇش شايبامەن جاۋاپ قايتارىپ, تارازى باسىن وزدەرىنە اۋداردى. گولدىڭ اۆتورلارى – انتون ساگادەەۆ, دجەرەمي براككو جانە ەنتوني لۋيس. الايدا جەرگىلىكتى جانكۇيەرلەردىڭ قۋانىشى ۇزاققا سوزىلمادى. ەكىنشى كەزەڭ اياقتالار تۇستا نيكيتا پوپۋگاەۆ سەگىز مينۋتتا ءدۋبلدىڭ اۆتورى اتانىپ, «سوچيگە» قايتا باسىمدىق سىيلادى – 3:4.
ءۇشىنشى كەزەڭدە ليندەن ۆەي ەسەپتى قايتا تەڭەستىرىپ, ويىندى وۆەرتايمعا ۇلاستىردى. قوسىمشا ۋاقىتتا ۆەي تاعى دا مەرگەندىگىمەن كوزگە ءتۇسىپ, ويىننىڭ نۇكتەسىن قويدى – 5:4. جەرلەستەرىمىز كەلەسى كەزدەسۋىن بۇگىن نيجنەكامسكىنىڭ «نەفتەحيميگىمەن» وتكىزەدى.