بۇل كۇندەرى قىتايدىڭ چەندۋ قالاسىندا ۇستەل تەننيسىنەن كوماندالىق الەم چەمپيوناتى ءوتىپ جاتىر. ەكىنشى توپقا تۇسكەن قازاقستان قۇراماسى بىرىنشىلىكتەگى العاشقى جەڭىسىنە قول جەتكىزدى.
سپورتتى دامىتۋ ديرەكتسياسىنىڭ مالىمەتى بويىنشا, جاھاندىق دودانىڭ كەزەكتى تۋر ويىنىن وزبەكستان قۇراماسىمەن وتكىزگەن جەرلەستەرىمىز 3:0 ەسەبىمەن جەڭىسكە جەتتى. حالىقارالىق ءىرى-ءىرى جارىستاردا باق سىناپ, جۇلدەلى ورىنداردان كورىنىپ جۇرگەن كيريلل گەراسيمەنكو, الان قۇرمانعاليەۆ پەن دەنيس جولۋدەۆ وڭتۇستىكتەگى كورشىلەرىمىزدىڭ سپورتشىلارىنا ەش مۇمكىندىك قالدىرمادى. ءۇش تەننيسشىمىز دە قارسىلاستارىن 3:0 ەسەبىمەن تىزە بۇكتىردى.
الەم چەمپيوناتىنىڭ العاشقى ەكى تۋرىندا فرانتسيا مەن گەرمانيادان جەڭىلىپ, كەيىننەن وزبەكستاننان باسىم تۇسكەن ءبىزدىڭ تەننيسشىلەر كەشە ۇندىستانمەن وينادى. وسىلايشا, قازاقستان قۇراماسى العاشقى جەڭىسىنەن كەيىن تۋرنير كەستەسىندە فرانتسيادان كەيىنگى 2-ورىنعا كوتەرىلدى. ايتا كەتەيىك, العاش رەت 1926 جىلى انگليادا ۇيىمداستىرىلعان ۇستەل تەننيسىنەن الەم چەمپيوناتى بيىل 56-مارتە وتكىزىلىپ جاتىر. 2000 جىلدان باستاپ كوماندالىق الەم بىرىنشىلىگى مارتەبەسىن العان بيىلعى سايىستا الەمنىڭ 36 ەلىنەن كەلگەن 60 كوماندا باق سىناپ جاتىر.