استاناداعى اسا ءىرى جارىس

وكىنىشكە قاراي, ەل استاناسىندا ءوتىپ جاتقان بايراقتى باسەكەنىڭ ىرىكتەۋ سايىستارىنا قاتىسقان قازاق­ستاننىڭ ءتورت تەننيسشىسى دە نەگىزگى كەزەڭگە شىعا المادى. ال­عاشقى اينالىمدا دەنيس ەۆسەەۆ الەمنىڭ 66-راكەتكاسى بەلگيالىق داۆيد گوففەننەن (1:6, 4:6), گري­گوري لوماكين تۇركيالىق التۋگ چەليكبيلەكتەن (3:6, 3:6) جانە ارىس­لانبەك ايتقۇلوۆ رەسەيلىك پاۆەل كوتوۆتان (0:6, 0:6) جەڭىلىپ, جارىستىڭ نەگىزگى كەزەڭىنە جولداما الا المادى.

الەكساندر نەدوۆەسوۆ ىرىكتەۋدىڭ العاشقى اينالىمىندا سەنساتسيا جاساعانىمەن, ول دا نەگىزگى كەزەڭنەن قۇر قالدى. الەمدىك رەيتينگتە 1170-ورىندا تۇرعان ا.نەدوۆەسوۆ ال­عاشقى كەزدەسۋىندە الەمنىڭ 69-راكەتكاسى كولۋمبيالىق دانيەل گالانمەن شەبەرلىك بايقاسىپ, ءۇش سەتتە – 5:7, 7:6 (7:0), 6:2 ەسەبىمەن جە­ڭىسكە جەتكەن ەدى. بىراق نەگىزگى كەزەڭگە جولداما بەرەتىن باسەكەدە نەدوۆەسوۆ الەمنىڭ 123-راكەتكاسى قىتايلىق چجيچجەن چجانعا ەكى سەتتە ەسە جىبەرىپ (6:7 (5:7), 3:6), Astana Open ATP 500 ءتۋرنيرىنىڭ نەگىزگى كەزەڭىنەن تىس قالدى. ءبىرىنشى پارتيادا ەسەپ 5:4 بولعان مەزەتتە الەكساندر سەتبولىن پايدالانا المادى. سودان كەيىن تاي-برەيكتە قارسىلاسى ءساتتى وينادى. وسىلايشا, چجيچجەن چجان ىرىكتەۋ سايىستارىنان ءبىرىنشى بولىپ نەگىزگى كەزەڭگە شىقتى.

سونداي-اق نەگىزگى تۋرنيرگە الەم­­نىڭ 65-راكەتكاسى بەلگيالىق داۆيد گوففەندى جەڭگەن 19 جاستاعى يتا­ليالىق لۋكا ناردي, وتانداسى پاۆەل كوتوۆتى سۇرىندىرگەن رەسەي­لىك الەكساندر شەۆچەنكو, تۇركيا­لىق التۋگ چەليكبيلەكتى جولدان تاي­دىرعان الەمنىڭ 72-راكەتكاسى سەربيا­لىق لاسلو دجەرە جولداما الدى.

ىرىكتەۋ سايىستارى اياقتالعان سوڭ نەگىزگى كەزەڭدە وينايتىن تەن­نيسشىلەردىڭ جەرەبەسى تارتىلدى. ءسويتىپ العاشقى اينالىمىندا قازاقستاننىڭ ءبىرىنشى, الەمنىڭ 41-راكەتكاسى الەكساندر بۋبليك دۇنيەجۇزىلىك رەيتينگتە 52-ورىندا تۇرعان نيدەرلاندتىق تاللون گريكسپۋرمەن كەزدەسەتىن بولدى. ەكى تەن­نيسشى بۇعان دەيىن كورتتا ەكى مارتە جولىعىپ, ەكەۋىندە دە جەر­لەسىمىزدىڭ مەرەيى ۇستەم بولعان.

استاناداعى دوداعا ارنايى شاقىرتۋ العان ميحايل كۋكۋشكين ءبىرىنشى كەزەڭدە الەمنىڭ التىنشى, وسى ءتۋرنيردىڭ ءۇشىنشى راكەتكاسى بولىپ تىركەلگەن گرەكيالىق ستەفانوس تسيتسيپاسپەن وينايدى. كۋكۋشكين گرەكيالىق تەننيسشىمەن ءتورت مارتە كەزدەسسە دە ءالى كۇنگە دەيىن جەڭە الماي كەلەدى. جەرلەستەرىمىزدىڭ قاتىسۋمەن وتەتىن بۇل كەزدەسۋلەر بۇگىنگە جوسپارلانعان. ال جۋىردا عانا ەل چەمپيوناتىندا توپ جارعان 22 جاستاعى بەيبىت جۇقاەۆ جارىستىڭ العاشقى كۇنىندە الەمنىڭ 34-راكەتكاسى نيدەرلاندتىق بوتيك ۆان دە زاندسحۋلپپەن كورتقا شىعىپ, ەكى سەتتە 1:6, 1:6 ەسەبىمەن جەڭىلىپ قالدى.

نەگىزگى كەزەڭنىڭ جەرەبەسى بو­يىن­شا, الەمنىڭ ءبىرىنشى راكەتكاسى, بيىلعى US Open ءتۋرنيرىنىڭ جەڭىمپازى يسپانيالىق كارلوس الكاراس رەيتينگتە 26-ساتىدا تۇر­عان دانيالىق حولگەر رۋنەمەن سىنعا ءتۇسۋى ءتيىس ەدى. الايدا كەشە 19 جاستاعى دانيالىق تەننيسشىنىڭ بەلگىسىز سەبەپتەرمەن استاناداعى تۋرنيرگە قاتىسۋدان باس تارتقانى بەلگىلى بولدى. ءسويتىپ ونىڭ ورنىن ىرىكتەۋ سايىستارىنىڭ فينالىندا جەڭىلگەن بەلگيالىق داۆيد گوففەن باستى. ەكى تەننيسشى وسىدان ءبىر جىل بۇرىن مەلبۋرندەگى (اۋستراليا) اتر تۋرنيرىندە كەزدەسىپ, الكاراس 6:3, 6:3 ەسەبىمەن جەڭىسكە جەتكەن. ەگەر يسپانيالىق تەننيسشى بۇل جولى دا جەڭىستى جولىن جالعاستىراتىن بولسا, ەكىنشى كەزەڭدە فرانتسيالىق ادريان ماننارينومەن وينايدى. ءوز كەزەگىندە ادريان العاشقى اينالىمدا «ۇلكەن دۋلىعا» ساناتىنداعى ءۇش بىردەي جارىستىڭ جەڭىمپازى اتانعان شۆەيتساريالىق ستەن ۆاۆرينكادان 1:6, 6:2, 6:3 ەسەبىمەن ايلاسىن اسىردى. ەكى تەننيسشى ەڭ كەيىنگى رەت وسى­دان جەتى جىل بۇرىن كەزدەسىپ, سول كەزدە دە ماننارينو ۇستەمدىك تا­نىتقان ەدى.

جارىستىڭ ەكىن­شى راكەتكاسى رە­سەيلىك دانيل مەد­ۆەدەۆ يسپا­نيا­لىق البەرت را­موس ۆينولاسپەن شە­بەر­لىك بايقاسادى. «ۇلكەن دۋلىعا» ءتۋر­ني­رىنىڭ 21 دۇركىن چەمپيونى سەر­بيا­لىق نو­ۆاك دجوكوۆيچ (جا­رىستىڭ 4-راكەتكاسى) ءبىرىنشى كەزەڭدە الەم­نىڭ 79-راكەتكاسى چي­ليلىك كريستيان گارينمەن وينايدى. ەگەر مەدۆەدەۆ پەن دجوكوۆيچ شيرەك فينالعا دەيىن سۇرىنبەي جەتسە, ½ فينالدا ءبىر-بىرىمەن كەزدەسەدى.

دانيل مەدۆەدەۆكە شيرەك فينالدا فەليكس وجە-الياسسيم, روبەرتو باۋتيستا-اگۋت جانە الەحاندرو داۆيدوۆيچ-فوكينا قارسىلاس بولۋى مۇمكىن. ال نوۆاك دجوكوۆيچتىڭ ەكىنشى كەزەڭدەگى بولاشاق قارسىلاسى – بوتيك ۆان دە زاندسحۋلپ, ال شيرەك فينالدا مارين چيليچ نەمەسە كارەن حاچانوۆتىڭ بىرىمەن وينايدى. ارينە, العاشقى كەزەڭدەردە ءسۇرىنىپ قالماسا.

جەرەبە تارتۋ راسىمىنەن سوڭ دا­­نيل مەدۆەدەۆ تۋرنير تۋرالى ءوز ويىن ورتاعا سالدى. «تۋرنيرگە قاتىسۋ­شىلاردىڭ قۇرامى وتە مىق­تى. «ماستەرس» جانە «ۇلكەن دۋلىعا» جا­رىستارىنان كەم تۇسپەيدى. سوندىق­تان ماتچتار وتە تارتىستى وتەتىنىنە سەنىمدىمىن. ءوز شەبەرلىگىمدى كورسەتۋ ءۇشىن بار كۇشىمدى سالامىن», دەدى رەسەيلىك تەننيسشى.

نەگىزگى كەزەڭنىڭ ءبىرىنشى كۇنىندە بەيبىت جۇقاەۆ پەن بوتيك ۆان دە زاندسحۋلپ, ادريان ماننارينو مەن ستەن ۆاۆرينكا جۇبىنان بولەك, اسلان كاراتسەۆ پەن چجيچجەن چجان جانە ارگەنتينالىق فرانسيسكو چە­رۋندولو مەن پولشالىق حۋبەرت گۋركاچ جۇبى سىنعا ءتۇستى. قىتايلىق تەننيسشى ا.كاراتسەۆتى 4:6, 6:4, 6:1 ەسەبىمەن جەڭسە, الەمنىڭ 10-راكەتكاسى گۋركاچ فرانسيسكونى ەكى سەتتە 6:2, 7:6 ناتيجەسىمەن قاپى قال­دىردى.

ايتا كەتەيىك, ويىندار 9 قازانعا دەيىن ەلورداداعى ۇلتتىق تەننيس ورتالىعىنداعى Beeline Arena سپورت كەشەنىندە وتەدى. ەرەجە بويىنشا, كەشە جانە بۇگىن ءبىرىنشى كەزەڭنىڭ ماتچتارى وينالادى. ال ەرتەڭگە ءبىرىنشى اينالىمنىڭ سوڭعى جانە ەكىنشى راۋندىنىڭ العاشقى ويىندارى جوسپارلانعان. 6 قازاندا ەكىنشى ىرىكتەۋ كەزەڭدەرى اياقتالىپ, 7 قازاندا شيرەك فينال ماتچتارى باستالادى. 8 قازاندا جارتىلاي في­نال ويىندارى, 9 قازاندا فينال باسەكەسى وتەدى.

ىرىكتەۋ جانە شيرەك فينال ويىن­دارى ساعات 10:00-دە باس­تال­سا, جارتىلاي في­نال جانە في­نال كەز­دەسۋلەرى 16:00-گە جوس­پار­لانعان.