بيىلعى كۇزدىڭ العاشقى ايى اۋىر سىناقتان باستالدى. قىركۇيەك باسىنان باستاپ بىرقاتار ايماقتاردا ىستىق اۋا-رايى مەن جاۋىن-شاشىننىڭ بولماۋىنا بايلانىستى تابيعي ورتتەر ءورشىدى, دەپ حابارلايدى Egemen.kz.
تەك قىركۇيەكتىڭ 2-8 جۇلدىزى ارالىعىندا عانا قازاقستاندا 40-قا جۋىق تابيعي ءورت جانە 100-گە جۋىق جانۋ فاكتىلەرى انىقتالدى.
ءىرى ورتتەر شىعىس قازاقستان, اباي, جەتىسۋ جانە قوستاناي وبلىستارىندا تىركەلدى.
ەلدى الاڭداتقان جاعداي قوستاناي وبلىسىنىڭ اۋليەكول اۋدانىندا قالىپتاسىپ, ءتورت كۇننىڭ ىشىندە ءورتتىڭ اۋدانى 43 000 گا دەيىن جەتتى. الاپات ءورتتىڭ قالىڭ ءتۇتىنى ورماندى جاعالاي ورنالاسقان ەلدى مەكەندەردەگى حالىقتىڭ تىنىسىن تارىلتىپ, اۋىلدارعا ءورت جايىلۋ قاۋپى ءتوندى.
جاعدايدىڭ ۋشىعۋىنا قاتتى جەلدىڭ ەكپىنى دە ىقپال ەتتى.
ءورت باستالعاننان باستاپ وقيعا ورنىنا توتەنشە جاعدايلار ءمينيسترى يۋ.يلين باستاعان تجم جەدەل توبى ۇشىپ بارىپ, ءورتتى ءسوندىرۋدى باسقاردى, ەلدى مەكەندەردەن 2 مىڭنان استام ادام ەۆاكۋاتسيالاندى.
وكىنىشكە وراي ءورت سالدارىنان 1 ادام قازا تاۋىپ, تاعى 12 ادام زارداپ شەكتى, 91 وتباسى تۇرعىن ءۇيسىز قالدى.
ءورتتى ءسوندىرۋ جەلدىڭ 20-23 م/س-قا دەيىن جەتكەن ەكپىنىنە, وسىمدىكتەردىڭ تىعىز وسۋىنە, قالىڭ ءتۇتىننىڭ ەداۋىر اۋماقتى جايلاپ كەتۋىنە, كىرمە جولداردىڭ بولماۋىنا جانە تابيعي سۋ كوزدەرىنىڭ شالعايدا ورنالاسۋىنا بايلانىستى قيىندادى.
جەدەل توپتىڭ ۇيلەسىمدى ءىس-قيمىلدارى مەن ۋاقتىلى قابىلدانعان شارالارىنىڭ ارقاسىندا 4 ەلدى مەكەنگە, بۇل وزەرنوە, لەسنوە, امانقاراعاي جانە باعانالى اۋىلدارى مەن امانقاراي اۋىلىنىڭ ماڭىنداعى مۇناي قويماسىنىڭ جانۋىنا جول بەرىلمەدى.
ءورت ورنىنداعى احۋالدى باقىلاپ وتىرعان مەملەكەت باسشىسى قاسىم-جومارت توقاەۆ ءورتتىڭ ودان ءارى ءورشۋ قاۋپىنە قاراماستان, قوستاناي وبلىسىنا باردى, اۋليەكول اۋدانىنداعى تابيعي ورتتەردەن زارداپ شەككەن اۋماقتاردى تىكۇشاقپەن ارالاپ شىقتى.
ءورت بولعان جەردە قوستاناي وبلىسىنداعى ورتتەردى جويۋ جونىندەگى جەدەل شتابتىڭ وتىرىسىن وتكىزىپ, بىرقاتار ناقتى تاپسىرمالار بەردى.
بۇگىنگى تاڭدا تابيعي ءورت سالدارىنان زارداپ شەككەندەرگە قالپىنا كەلتىرۋ, ءۇي سالۋ جۇمىستارى جۇرگىزىلۋدە.
سونداي-اق پرەزيدەنت توتەنشە جاعدايلار, ىشكى ىستەر جانە قورعانىس مينيسترلىكتەرى بولىمشەلەرىنىڭ جەكە قۇرامىمەن, سونداي-اق ءورت سوندىرۋگە جۇمىلدىرىلعان ەرىكتىلەرمەن كەزدەستى.
قاسىم-جومارت توقاەۆ توتەنشە جاعدايدى جويۋعا قاتىسۋشىلاردىڭ بارلىعىنا كورسەتكەن باتىلدىعى ءۇشىن العىس ءبىلدىرىپ, ولاردىڭ ماراپاتتاۋعا ۇسىنىلاتىنىن اتاپ ءوتتى.
سونداي-اق مەملەكەت باسشىسى ازاماتتىق قورعاۋ ورگاندارى قىزمەتكەرلەرىنىڭ ەڭبەكاقىسى مەن الەۋمەتتىك جاعدايىنا دا توقتالدى.
«جاڭا قازاقستان – شىن مانىندە ءادىل قازاقستان», دەدى قاسىم-جومارت توقاەۆ Amanat پارتياسىنىڭ كەزەكتەن تىس سەزىندە.
شىن مانىندە, جەدەل ارەكەت ەتۋ جانە توتەنشە جاعدايلاردىڭ سالدارىن جويۋ, ادام ولىمىنە جول بەرمەۋ, زالالدى بارىنشا ازايتۋ, قاۋىپسىزدىكتى قامتاماسىز ەتۋ – بۇل ازاماتتىق قورعاۋ ورگاندارى قىزمەتكەرلەرىنىڭ نەگىزگى مىندەتى بولىپ تابىلادى.
توتەنشە جاعدايلار مينيسترلىگىنىڭ قىزمەتكەرلەرى مەملەكەت باسشىسىنىڭ تاڭداعان جولى – جاڭا قازاقستاندى تولىق قولدايدى.
نۇربولات دەربىسوۆ,
قر تجم ورتكە قارسى قىزمەت كوميتەتىنىڭ توراعاسى