باتىس قازاقستان وبلىسىنداعى اقساي قالاسىندا تاجىك-اۋعان شەكاراسىنداعى ۇرىس قيمىلدارىنا قاتىسۋشى جاۋىنگەرلەرگە ارنالعان ەسكەرتكىش ورناتىلدى, دەپ حابارلايدى Egemen.kz.
مەملەكەتارالىق ۋاعدالاستىقتارعا سايكەس 1992 جىلدان 2001 جىلعا دەيىن تمد-نىڭ ورتاق شەكاراسىن قازاقستان, وزبەكستان, قىرعىزستان جانە رەسەيدىڭ ورتاق اسكەرى كۇزەتكەن بولاتىن. وسى جىلدارى «قازبات» اتالعان قازاقستاندىق بىتىمگەرشىلىك باتالونى قۇرامىندا 14 مىڭعا جۋىق ازامات اسكەري ءىس-قيمىلدارعا قاتىسىپ, تاجىك-اۋعان شەكاراسىن سەپەراتيستەردەن قورعادى. اسكەري قاقتىعىستار سالدارىنان سول جىلدارى 46 قازاقستاندىق قازا تاۋىپ, 400-دەن استام ادام جاراقات العان. بەيبىت كۇندە باسىن قاتەرگە تىككەن ساربازداردىڭ اراسىندا 300-دەن اسا باتىسقازاقستاندىق بولىپتى. بۇگىندە سولاردىڭ 55-ءى ءبورلى اۋدانىندا تۇرادى ەكەن. اقساي قالاسىندا «قازباتتىقتارعا» ارنالعان ەسكەرتكىشتىڭ اشىلۋىنا سولار مۇرىندىق بولعان.
- تاجىك-اۋعان شەكاراسىندا جاۋىنگەرلىك مىندەتىن ورىنداپ قازا تاپقان سول ءبىر 19 جاسار جىگىتتەر بورىشى مەن انتىنا ادال بولعان باتىرلار ەدى. ولار – تاۋەلسىز قازاقستاننىڭ العاشقى ارداگەرلەرى بولدى. بۇگىن ءبىز وسى مونۋمەنتتى اشىپ, ەل تىنىشتىعى ءۇشىن جانىن قيعان ەرجۇرەك اسكەري قىزمەتكەرلەردىڭ رۋحىنا تاعزىم ەتەمىز! ولاردىڭ ەرلىگى مەن ابىرويى قازىرگى جاستارعا ۇلگى بولۋى ءتيىس! – دەدى ەسكەرتكىشتىڭ اشىلۋ سالتاناتىندا ءبورلى اۋدانىنىڭ اكىمى ەركەبۇلان يحسانوۆ.
تاجىك-اۋعان شەكاراسىنداعى اسكەري ءىس-قيمىلدار جانە اسكەري قاقتىعىستار ارداگەرلەرى وداعى باتىس قازاقستان وبلىستىق فيليالىنىڭ توراعاسى الىشەر اشۋرماتوۆ جاڭا ەسكەرتكىشتىڭ جاس ۇرپاقتى پاتريوتتىق تاربيەگە تارتاتىن ءبىر مۇيىسكە اينالاتىنىنا سەنىم ءبىلدىردى. وسى بەلگىنىڭ قويىلۋىنا قولداۋ بىلدىرگەن ءبورلى اۋدانى باسشىسىنا, ب.قايمولديەۆ, س.قۇتىمبەتوۆ, ا.باياندىقوۆ, ا.ەنيچەۆ, د.اقمامبەتوۆ, و.كۋشەۆ, ن.نيۋدەلچيەۆ, ۆ.كراۆتسوۆ, ە.بايتاس, ك.پالحوجاەۆ جانە ب.تەمىرباەۆقا العىس حات تابىس ەتتى. ر.تىلەكشيەۆ پەن ا.وتەنيازوۆ «قازاقستان پاتريوتى» مەدالدارىمەن ماراپاتتالدى.
جينالعاندار قازا تاپقان جاۋىنگەرلەردى ءبىر مينۋت ءۇنسىز ەسكە الىپ, ەستەلىك كومپوزيتسياعا گۇل شوقتارىن قويدى.