وسكەمەندە پوليتسيا قىزمەتكەرلەرى ەسىرتكىنى پايدالانعان جانە ساقتاعان دەگەن كۇدىكپەن 21 جاستاعى قالا تۇرعىنىن ۇستادى. قۇقىق بۇزۋشى «سەرگەك» كەشەندى كامەرالارىنا ءتۇسىپ قالعان, دەپ حابارلايدى Egemen.kz.
بەينەباقىلاۋ كامەراسى زاڭسىز ارەكەتتى تىركەگەننەن كەيىن بىرنەشە مينۋت وتكەن سوڭ وقيعا ورنىنا ءتارتىپ ساقشىلارى كەلگەن. پوليتسەيلەردى كورە سالىسىمەن جاس جىگىت قولىنداعى زاتتارىنان قۇتىلۋعا اسىققان. بىراق ويىنداعىسىن ىسكە اسىرىپ ۇلگەرمەدى.
ساراپتاما كورسەتكەندەي, ۇستاۋ كەزىندە قالا تۇرعىنى ەسىرتكىگە ماساڭ كۇيدە بولعان.
«پوليتسەيلەر جاس جىگىتتەن فولگاسى بار پلاستيكالىق بوتەلكە مەن سپەتسيفيكالىق ءيىسى بار قوڭىر-جاسىل ءتۇستى وسىمدىك زاتى سالىنعان قاعاز ورامانى تاركىلەدى. ساراپتاما قورىتىندىسىنا سايكەس الىنعان زات كەپتىرىلگەن ماريحۋانا بولىپ شىقتى. اتالعان فاكتى بويىنشا قر قك-ءنىڭ 296-بابى 2-بولىگى (ەسiرتكi, پسيحوتروپتىق زاتتاردى, سول تەكتەستەردى وتكىزۋ ماقساتىنسىز زاڭسىز دايىنداۋ) بويىنشا سوتقا دەيىنگى تەرگەۋ جۇرگىزىلىپ جاتىر», دەپ جازىلعان Polisia.kz تاراتقان حابارلامادا.
ماريحۋانانىڭ جالپى سالماعى - 1,51 گرامم.