ەلەكتر ەنەرگياسى, جىلۋ جانە سۋمەن جابدىقتاۋ تاريفتەرىنىڭ ءوسۋى قاراپايىم تۇتىنۋشىنىڭ قالتاسىنا سالماق سالماۋعا ءتيىس. Amanat پارتياسى جانىنداعى ەنەرگەتيكا كوميتەتىنىڭ مۇشەلەرى وسىلاي دەپ ەسەپتەيدى. كەزەكتى جيىن بارىسىندا پارتيا مۇشەلەرى كوممۋنالدىق كاسىپورىنداردى جاڭعىرتۋ جانە الداعى جىلىتۋ ماۋسىمىنا دايىندىق بارىسىن قارادى.
مەملەكەت باسشىسى قاسىم-جومارت توقاەۆ جولداۋدا ەلىمىزدە ەلەكتر قۋاتىمەن قامتاماسىز ەتەتىن جەلىلەردىڭ ۇشتەن ەكىسىنىڭ, جىلۋ كوممۋنيكاتسياسىنىڭ 57 پايىزىنىڭ جانە سۋ قۇبىرى جەلىسىنىڭ جارتىسىنا جۋىعىنىڭ توزىعى جەتكەنىن ايتىپ, ء«تاريفتى ينۆەستيتسياعا ايىرباستاۋ» جاڭا تاريف ساياساتىنا كوشۋدى قامتاماسىز ەتۋدى تاپسىردى.
ەنەرگەتيكا ۆيتسە-ءمينيسترى جاندوس نۇرماعانبەتوۆتىڭ اقپاراتىنا سەنسەك, ءوندىرۋشى قۋاتتاردىڭ توزۋىن 15 پايىزعا تومەندەتۋ ءۇشىن 2035 جىلعا قاراي جىل سايىنعى ينۆەستيتسيانى ءۇش ەسەگە ۇلعايتۋ قاجەت.
«قازىرگى ۋاقىتتا سالاعا سالىنعان ينۆەستيتسيالاردى قايتارۋعا جۇمسالاتىن قاراجات كولەمىنە ليميت 32 ملرد تەڭگە دەڭگەيىندە بەلگىلەنگەن, ونى 100 ملرد تەڭگەگە دەيىن ۇلعايتۋ قاجەت. سونداي-اق ينۆەستيتسيالار اعىنىن قامتاماسىز ەتۋ ءۇشىن ەلەكتر قۋاتى نارىعىنداعى قولدانىستاعى ءتاريفتى ايىنا 1 مۆت ءۇشىن اعىمداعى 590 مىڭ تەڭگەدەن 1,2 ملن تەڭگەگە دەيىن ارتتىرۋ قاجەت. بۇل جىلىنا قوسىمشا 60 ملرد تەڭگە تارتۋعا مۇمكىندىك بەرەدى. ونىڭ ۇستىنە ەلەكتر ەنەرگياسىنا ءتاريفتى كۇشپەن ۇستاپ تۇرۋعا باعىتتالعان قازىرگى ساياسات ينفلياتسيانىڭ ءوسۋىن تولىق شامادا ەسكەرمەدى, بۇل سالانىڭ ينۆەستيتسيالىق تارتىمدىلىعىنا دا اسەر ەتتى», دەدى ول.
الايدا كوميتەت توراعاسى, ءماجىلىس دەپۋتاتى دۇيسەنباي تۇرعانوۆتىڭ ايتۋىنشا, بۇل جەردە ماسەلە تەك جارىق, جىلۋ جانە سۋ جەتكىزۋشىلەرگە عانا ەمەس, ەڭ الدىمەن قاتارداعى تۇتىنۋشىلاردىڭ مۇددەلەرى تۋرالى بولىپ وتىر. «كوممۋنالدىق قىزمەتتەگىلەرگە قىسىم جاساۋعا جول بەرمەۋ كەرەك. تاريفتەردى بەكىتۋ كەزىندە ينفلياتسيامەن قاتار ەنەرگەتيكتەرگە تولەنەتىن جالاقىنىڭ دا بىردەي ءوسۋىن قامتاماسىز ەتكەن ءجون. سەبەبى سالا بىلىكتى ماماندارىنان ايىرىلىپ قالۋى مۇمكىن. كروسس-سۋبسيديالاۋدان باس تارتۋعا كەلەتىن بولساق, قازىر تاريفتەردىڭ وسەتىنى انىق, تەك ول ادامداردىڭ قالتاسىنا كوپ سالماق سالمايتىنداي بولۋى قاجەت», دەدى دەپۋتات.
ءوز كەزەگىندە ۇەم تابيعي مونوپوليالاردى رەتتەۋ كوميتەتى توراعاسىنىڭ ورىنباسارى تيمۋر قوسىمباەۆ كوممۋنالدىق قىزمەتتەرگە تاريفتەردى قايتا قاراۋ بويىنشا شەشىم ءار وڭىرگە قاتىستى جەكە قابىلداناتىنىن ايتتى.
ء«بىز تۇتىنۋشىلار مەن مونوپوليستەر اراسىنداعى تەڭگەرىمگە قول جەتكىزۋ ساياساتىن جۇرگىزىپ جاتىرمىز. ەكونوميكالىق جانە الەۋمەتتىك جاعدايدىڭ اراسىندا تەپە-تەڭدىك بولۋى شارت. مونوپوليستەر ءوز تابىسىن امورتيزاتسيا رەتىندە پايدالانىپ, ونىڭ باسىم بولىگىن جەلىلەردى جوندەۋگە جانە جاڭارتۋعا باعىتتاۋى كەرەك. جالپى, رەفورما بويىنشا تۇرعىندار تولەيتىن تاريفتەردىڭ ءوسۋى بولجانىپ وتىر. بۇل رەتتە ۋاكىلەتتى ورگان ولاردىڭ كۇرت نەمەسە نەگىزسىز وسۋىنە جول بەرمەيدى», دەپ سەندىردى ول.
سونىمەن قاتار جيىندا پارتيالىقتار ەلىمىزدىڭ جىلۋ بەرۋ ماۋسىمىنا دايىندىعىن تالقىلادى. ەنەرگەتيكا مينيسترلىگىنىڭ دەرەگى بويىنشا ەلەكتر ستانسالارىندا 4 ەنەرگوبلوكتا (44%), 32 قازاندىقتا (53%), 26 تۋربينادا (62%) جوندەۋ اياقتالدى. ال 5 ەنەرگوبلوكتا, 20 قازاندىق پەن 13 تۋربينادا جوندەۋ جۇمىستارى جۇرگىزىلۋدە. قويمالارداعى كومىر قورى 4,1 ملن توننانى جانە 82 مىڭ توننا مازۋتتى قۇرايدى, بۇل جالپى بەكىتىلگەن نورماعا سايكەس كەلەدى.
جيىن قورىتىندىسى بويىنشا كوميتەت ەلەكتر ستانتسيالارى مەن قازاندىقتارعا جانە تۇرعىنداردىڭ قاجەتتىلىكتەرى ءۇشىن دە كومىر مەن مازۋت جەتكىزۋدى تۇراقتى قامتاماسىز ەتۋ, سونداي-اق ءبىلىم بەرۋ, دەنساۋلىق ساقتاۋ نىساندارىن جىلۋمەن جابدىقتاۋ جۇيەسىنە ۋاقتىلى قوسۋ ماسەلەسىن ەرەكشە باقىلاۋعا الۋعا قاۋلى ەتتى.
«كوميتەت كوممۋنالدىق ينفراقۇرىلىمدى جاڭعىرتۋ, تاريفتىك ساياساتتى رەفورمالاۋ ماسەلەلەرىن شەشۋدى تۇراقتى باقىلاۋدا ۇستاپ قانا قويماي, ءوز قۇزىرەتى شەڭبەرىندە وسى ءۇشىن قاجەتتى تەتىكتەردى, ونىڭ ىشىندە زاڭنامالىق دەڭگەيدە ازىرلەپ, ۇسىنادى. سونىمەن قاتار تۇتىنۋشىلار قاراجاتىنىڭ ماقساتتى پايدالانىلۋىن قاتاڭ باقىلاۋ, مونوپوليستەردىڭ جاۋاپكەرشىلىگىن ارتتىرۋدى, تابيعي مونوپوليا سالاسىنداعى قىزمەتتى مەملەكەتتىك رەتتەۋ راسىمدەرىنىڭ اشىقتىعىن قامتاماسىز ەتۋ قاجەت», دەپ تۇيىندەدى د.تۇرعانوۆ.