ءبىلىم باسەكەسى – ەڭ ۇلى باسەكە. اقىل ىزدەگەن جاستاردىڭ تالپىنىسىنا قاراپ تاڭداي قاعاسىز. كۇنى كەشە تالدىقورعان قالاسىنداعى نازارباەۆ زياتكەرلىك مەكتەبىنىڭ وقۋشىلارى شەتەلدە وتكەن ءبىلىم بايقاۋىنان ەلگە جەڭىسپەن ورالدى. وزات وقۋشىلار جاڭا وقۋ جىلىن وسىلايشا جارقىن كوڭىل كۇيمەن باستادى.
نۇرسۇلتان ەرلان ۇلى حالىقارالىق «تۋيماادا» وليمپياداسىنىڭ قولا جۇلدەگەرى اتاندى. بۇگىندە جاس ينفورماتيكتىڭ قورجىنىندا رەسپۋبليكادان ەنشىلەگەن كۇمىس پەن قولا, حالىقارالىق دەڭگەيدەگى جارىستاردان جەڭىپ العان ەكى قولا مەدالى بار.
دارىندى شاحماتشى ءاليما ومىرسەرىك مالديۆ ارالدارىندا وتكەن باتىس ازيا چەمپيوناتىندا ءساتتى ونەر كورسەتتى. تالانتتى وقۋشى بايراقتى باسەكەدە قارسىلاستارىن قوعاداي جاپىرىپ, جارىس جەڭىمپازى اتاندى. شاحماتتى اليماعا بالقيا اجەسى ۇيرەتىپتى. اليما 2018-2022 جىلدارداعى ايەلدەر اراسىندا الماتى وبلىسىنىڭ چەمپيونى اتاندى. 2018 جىلى ازيا چەمپيوناتىنىڭ قولا مەدالى, 2020 جىلعى اناتولي كارپوۆ اتىنداعى حالىقارالىق كۋبوكتىڭ التىن مەدالى (ماسكەۋ), «راپيد جانە بليتس-2022» بويىنشا قازاقستان رەسپۋبليكاسى چەمپيوناتىنىڭ قولا مەدالدارى, «جازعى كۋبوك» تۋرنيرىندە كلاسسيكالىق شاحماتتىڭ التىن مەدال يەگەرى.
سينحروندى جۇزۋدەن ءامينا جاناتبەك نۇر-سۇلتان اشىق كۋبوگىنىڭ جەڭىمپازى اتاندى. دۋەتتە جاس سپورتشى ەكىنشى ورىن الدى. ەكى كۇن بويى وتكەن جارىسقا ەلىمىزدىڭ ءار وڭىرىنەن 80-نەن استام وقۋشى باق سىنادى. ءامينا بولاشاقتا قازاقستان چەمپيونى اتانعىسى كەلەدى.
انار نۇرماحان رەسپۋبليكالىق پاندىك وليمپيادادا اعىلشىن ءتىلى پانىنەن ءىىى ورىندى جەڭىپ الدى. سونىمەن قاتار ءمادينا تۇركەبايمەن ەكەۋى رەسپۋبليكالىق ەكوكونكۋرستىڭ «ۇزدىك بەينەروليك» نوميناتسياسىنا يە بولدى. ال توعجان شامي رەسپۋبليكالىق «دوستىق كوپىرلەرى» ەسسە بايقاۋىندا باس جۇلدەگەر اتاندى.
بيىل تالدىقورعان قالاسىنداعى نازارباەۆ زياتكەرلىك مەكتەبىن تامامداعان 99 وقۋشىنىڭ 21-ءى نازارباەۆ ۋنيۆەرسيتەتىنە, 21 تۇلەك امەريكا, ۇلىبريتانيا, يتاليا, ماجارستان, رەسەي ۋنيۆەرسيتەتتەرىنە وقۋعا ءتۇستى.
جەتىسۋ وبلىسى