قازاقستاننىڭ ءبىرىنشى, الەمنىڭ 25-ءشى راكەتكاسى ەلەنا رىباكينا پورتوروج WTA 250 ءتۋرنيرىنىڭ فينالىندا ۇتىلىپ قالدى, دەپ حابارلايدى Egemen.kz قازاقستاننىڭ تەننيس فەدەراتسياسىنا سىلتەمە جاساپ.
جارىستىڭ ءۇشىنشى راكەتكاسى بولىپ تىركەلگەن قازاقستاندىق تەننيسشى فينالدا دۇنيەجۇزىلىك رەيتينگىدە 82-ءشى ورىندا تۇرعان چەحيالىق كاتەرجينا سينياكوۆامەن باس جۇلدەگە تالاستى.
ءبىرىنشى سەتتە رىباكينا قوس برەيك جاساپ, 5:0 ەسەبىمەن العا كەتسە دە, سينياكوۆانىڭ تارازى باسىن تەز تەڭەستىرىپ, ەسەپتى 5:5-كە جەتكىزدى. رىباكينا بىرنەشە سەت-پوينتتى دا پايدالانا المادى. دەگەنمەن تاي-برەيكتە قارسىلاسىن تىعىرىققا تىرەي ءبىلدى - 7:6 (7:4).
ەكىنشى سەتتە ەسەپ 3:3 بولعان مەزەتتە قازاقستاندىق سپورتشى برەيك جاساعانىمەن, چەحيالىق تەننيسشى سول بويدا ەسە قايىردى. ەسەپ 4:4 بولدى. بۇل جولى تاي-برەيكتە سينياكوۆا ءساتتى وينادى - 7:6 (7:5).
ءۇشىنشى, شەشۋشى سەتتە سينياكوۆا برەيكپەن العا وزىپ, ەسەپ 4:2-گە جەتتى. ەلەنا رىباكينا ەسەپتى تەڭەستىرگەنىمەن, چەحيالىق ويىنشى قايتا برەيك جاسادى.
بۇعان دەيىن رىباكينا سەگىز رەت WTA دودالارىنىڭ فينالىنا ءوتىپ, سونىڭ ەكەۋىندە عانا ۇزدىك شىققان ەدى.