تۇركىستان وبلىسى اۋماعىندا 838 اۋىلدىق ەلدى مەكەن بار. اۋدان, قالا اكىمدىكتەرىنىڭ تالداۋ اقپاراتى ناتيجەلەرى بويىنشا 642 ەلدى مەكەندەگى 1 753 012 تۇرعىن ساپالى ينتەرنەتپەن قامتىلعان, بۇل – جالپى وبلىc حالقىنىڭ 73,7 پايىزى. سونداي-اق وڭىردەگى 441 129 وقۋشى 3G جانە 4G ءموبيلدى جەلىسىمەن, 123 اۋىلدىق ەلدى مەكەندە 63 مىڭعا جۋىق وقۋشى 2G ءموبيلدى جەلىسىمەن قامتاماسىز ەتىلگەن.
وبلىستىق تسيفرلاندىرۋ, مەملەكەتتىك قىزمەتتەر كورسەتۋ جانە ارحيۆتەر باسقارماسىنىڭ باسشىسى ە.وتەباەۆتىڭ ايتۋىنشا, بيىل وڭىردە 152 اۋىلدى ساپالى ينتەرنەتپەن قامتۋ جوسپارلانىپ, ونىڭ 51-ىندە جاڭا بازالىق ستانسا ىسكە قوسىلعان. قالعان 101 ەلدى مەكەن جىل سوڭىنا دەيىن ينتەرنەتپەن قامتىلادى. كەي اۋدانداردا عالامتور ساپاسى ناشار. ول جونىندە وبلىس اكىمىنىڭ ەسەپتىك كەزدەسۋلەرىندە اۋدان تۇرعىندارى تاراپىنان ايتىلعان. بۇل ورايدا وبلىس اكىمى ءاربىر اۋدان, اۋىلداعى بايلانىس ساپاسى نازارعا الىنۋى قاجەتتىگىن ايتتى.
«جىلدام عالامتورمەن قامتاماسىز ەتۋ جۇمىسى جالعاسۋعا ءتيىس. جىل سوڭىنا دەيىن جوسپارداعى 100-دەن استام ەلدى مەكەندى ينتەرنەتپەن قامتۋ جۇمىستارى تولىق اتقارىلسىن», دەدى دارحان ساتىبالدى اپپارات وتىرىسىندا.
وڭىردە «250+» جوباسى اياسىندا 2020-2021 جىلدارى 129 ەلدى مەكەندە موبيلدىك ينتەرنەت ساپاسى ارتقان. ءمجا جوباسى اياسىندا 376 ەلدى مەكەن تالشىقتى-وپتيكالىق ينتەرنەتپەن قامتاماسىز ەتىلدى. ەلىمىزدە العاش رەت تۇركىستان وڭىرىندە «قازاقتەلەكوم» جانە «ترانستەلەكوم» اكتسيونەرلىك قوعامدارى تاراپىنان مەملەكەت-جەكەمەنشىك ارىپتەستىگى جوباسى بويىنشا اۋىلداردا تالشىقتى-وپتيكالى جەلىسىن پايدالانۋ ىسكە اسىرىلدى. وتكەن جىلى 82 اۋىل ينتەرنەتكە اۋا ارقىلى راديوموست تەحنولوگياسىمەن قوسىلدى. قازىر وسى 82 اۋىلدىڭ تۇرعىندارى, ياعني 6 مىڭعا جۋىق جەكە تۇرعىن ءۇي جوعارى جىلدامدىقتى ينتەرنەت پايدالانۋدا.
ايتا كەتەلىك, وبلىس اۋماعىنداعى اۋىلدىق جەرلەردى عالامتورمەن قامتۋ مەن تسيفرلاندىرۋ باعىتىنا بىلتىر 34 ملرد تەڭگە جۇمسالسا, 2022 جىلى 17,5 ملرد تەڭگە ءبولىنىپ وتىر. ال 2025 جىلعا دەيىن بۇل ماقساتقا 225 ملرد تەڭگە قاراستىرىلعان.
تۇركىستان وبلىسى