ءال-فارابي اتىنداعى قازاق ۇلتتىق ۋنيۆەرسيتەتىندە «ماسكەۋ ينجەنەرلىك-فيزيكالىق ينستيتۋتى» ۇلتتىق يادرولىق زەرتتەۋ ۋنيۆەرسيتەتىنىڭ فيليالى اشىلدى. فيليال مەملەكەت باسشىسى ق.توقاەۆتىڭ باستاماسىمەن ەكى ەل پرەزيدەنتتەرىنىڭ كەلىسىمى نەگىزىندە ىسكە اسىپ وتىر.
فيليالدىڭ اشىلۋ سالتاناتىندا ءسوز سويلەگەن ءال-فارابي اتىنداعى قازۇۋ رەكتورى ج.تۇيمەباەۆ: «مەملەكەت باسشىسى اتاپ وتكەندەي, عىلىم مەن تەحنولوگيانى, يننوۆاتسيانى دامىتۋ – ەلىمىزدىڭ باسەكەگە قابىلەتىن ارتتىراتىن نەگىزگى سالانىڭ ءبىرى. ءبىلىم بەرۋ جۇيەسىن جەكە عىلىمي ورتالىقتارمەن جانە تەحنوپاركتەرمەن بىرىكتىرۋ – مىقتى زەرتتەۋ ۋنيۆەرسيتەتتەرىن قالىپتاستىرۋعا مۇمكىندىك بەرەدى. پرەزيدەنت ءوز جولداۋىندا تەحنيكالىق ماماندار دايارلاۋ ماسەلەسىنە ەرەكشە ءمان بەرە وتىرىپ, اسىرەسە جوعارى جانە جوعارى وقۋ ورنىنان كەيىنگى ءبىلىمدى دامىتۋعا ستراتەگيالىق باسىمدىق بەرىپ كەلەدى. بۇگىندە الەمدەگى 500-دەن اسا ءىرى حالىقارالىق جوعارى وقۋ ورنىمەن تۇراقتى ارىپتەستىك بايلانىستاعى قازۇۋ-دا ميفي فيليالىنىڭ اشىلۋى – ەلىمىزدە بىلىكتى تەحنيكالىق ماماندار دايارلاۋعا ۇلكەن سەرپىلىس بەرەدى», دەپ اتاپ ءوتتى.
جيىن بارىسىندا عىلىم جانە جوعارى ءبىلىم ءمينيسترى ساياسات نۇربەك پرەزيدەنت باسىمدىق بەرىپ وتىرعان جوعارى ءبىلىم بەرۋ سالاسىندا بىلىكتى ماماندار دايارلاۋ ماسەلەسىنىڭ وزەكتىلىگىنە, سونىمەن قاتار الداعى جىلداردا عىلىمي كادرلاردى وقىتۋ, عىلىمي-زەرتتەۋ جۇمىستارىن جەتىلدىرۋ ادىستەمەسىنىڭ, قارجىلاندىرۋ جاعىنىڭ پىسىقتالاتىنىنا ءجىتى توقتالدى. ال كەلەسى جىلدان باستاپ عىلىم سالاسىن قارجىلاندىرۋ ەكى ەسەگە دەيىن كوبەيەتىن بولادى.
جاھاندىق وزگەرىستەر تۇراقتى دامۋ ماسەلەسىندە جاڭا تەحنولوگيالىق سەرپىلىستىڭ اسا قاجەتتىگىن كورسەتىپ وتىر. بۇل زاماناۋي كادرلار دايارلاۋمەن تىعىز بايلانىستى. ميفي فيليالىنىڭ باستى ماقساتى – يادرولىق فيزيكا, لازەرلىك جانە پلازمالىق تەحنولوگيالار, اتوم ەنەرگەتيكاسى, نانوماتەريالدار سالالارىندا مامانداردى بىرلەسىپ دايارلاۋ. ول باكالاۆريات, ماگيستراتۋرا جانە دوكتورانتۋرانى قامتيدى. ءبىلىم بەرۋ باعدارلامالارى بولاشاقتىڭ ماماندىقتارىنا باعدارلانعان ءارى حالىقارالىق ينجەنەرلىك ستاندارتتارعا سايكەس كەلەدى. وسى ورايدا فيليال ستۋدەنتتەرى ساپالى ينجەنەرلىك ءبىلىم الۋمەن قاتار, عىلىممەن دە اينالىسادى, زەرتتەۋشىلىك داعدىلاردى يگەرىپ, زاماناۋي عىلىمي زەرتحانالاردا تاعىلىمدامادان وتەدى. وقىتۋ قازۇۋ, سونداي-اق ميفي بازاسىندا, ال تاجىريبەلىك باعىتتاعى ساباقتار يادرولىق فيزيكا ينستيتۋتىندا وقىتىلادى.
رەسەيدىڭ عىلىم جانە جوعارى ءبىلىم ءمينيسترىنىڭ ورىنباسارى ناتاليا بوچاروۆا فيليالدى اشۋ بارىسىنداعى ەكىجاقتى كەلىسىمدەر, ىقپالداستىققا قاتىستى جۇزەگە اسقان جۇمىستار بارىسىنا توقتالىپ, تەحنيكالىق جوعارى وقۋ ورنىنىڭ قىزمەتىن شەتەلدەردە ۇيىمداستىرۋدىڭ وزىندىك قيىندىقتارى تۋرالى ايتىپ ءوتتى. وسىعان قاراماستان, قىسقا مەرزىمدە جوبا جۇزەگە اسىپ, عىلىمعا قىزىعۋشىلىق تانىتقان جاستار ءۇشىن مول مۇمكىندىك اشىلىپ وتىر. ال «روساتوم» مەملەكەتتىك كورپوراتسياسى باس ديرەكتورىنىڭ پەرسونال جونىندەگى ورىنباسارى تاتيانا تەرەنتەۆا ەلىمىزدى عىلىم مەن ءبىلىم سالاسىنداعى ستراتەگيالىق سەرىكتەس رەتىندە اتاپ ءوتتى. «روساتوم» سوڭعى ون جىلدان استام مەرزىمدە ارىپتەس مەملەكەتتەر ءۇشىن ۇلتتىق يادرولىق باعدارلامالارعا ماماندار دايارلاۋ باعىتىنداعى جوبالاردى جۇزەگە اسىرىپ كەلەدى. بۇگىندە كورشى ەلدە يادرولىق باعىتتاعى ماماندىقتاردا 2 مىڭنان استام ستۋدەنت ءبىلىم الۋدا. ال زاماناۋي مۇمكىندىكتەر كەزەڭىندە مامانداردى بىرلەسىپ دايارلاۋدىڭ ماڭىزدىلىعىنا قاتىستى ماسەلەگە ميفي رەكتورى ۆلاديمير شەۆچەنكو توقتالىپ, ءارى قارايعى ىقپالداستىققا سەنىم ارتتى.
قاتىسۋشىلار ءال-فارابي اتىنداعى قازۇۋ بازاسىندا اشىلعان ميفي ۇلتتىق زەرتتەۋ يادرولىق ۋنيۆەرسيتەتى فيليالىنىڭ ەستەلىك تاقتاسىنا قول قويىپ, فيزيكا-تەحنيكالىق فاكۋلتەتىندەگى اۋديتوريامەن تانىستى.
الماتى