«اگرارلىق نەسيە كورپوراتسياسى» شاعىن نەسيە بەرۋ ءۇشىن ونلاين وتىنىمدەردى قابىلداۋعا كىرىستى. بۇل فەرمەرلەرگە ۇيدەن شىقپاي-اق نەسيەنى الدىن الا ماقۇلداۋعا مۇمكىندىك بەرەدى. كورپوراتسيانىڭ باسىم باعىتىنىڭ ءبىرى – نەسيە بەرۋ ۇدەرىسىن تسيفرلاندىرۋ. بۇل مىندەتتى شەشۋ ءۇشىن نەسيە ونىمدەرى وڭتايلاندىرىلىپ, شاعىن نەسيەگە وتىنىمدەردى ونلاين قاراۋ جۇيەسى ازىرلەنگەن.
جۇيە «ىسكەر» باعدارلاماسى بويىنشا 6 ملن تەڭگەگە دەيىن نەسيە رەسىمدەگىسى كەلەتىن الەۋەتتى كليەنتتەرگە قۇجاتتار جيناۋ مەرزىمىن قىسقارتۋعا, فيليالعا كەلۋدى ازايتۋعا, ءوتىنىمدى قاراۋ بارىسىنىڭ ساپاسى مەن اشىقتىعىن ارتتىرۋعا كومەكتەسەدى. ۇيدە وتىرىپ-اق شارۋا جەكە سايكەستەندىرۋ ءنومىرى (جسن) ارقىلى شاعىن نەسيە الۋعا ءوتىنىم بەرە الادى. اۆتوماتتاندىرىلعان جۇيە مەملەكەتتىك جانە وزگە دە دەرەكقوردىڭ مالىمەتتەرىن پايدالانىپ, الەۋەتتى قارىز الۋشىنىڭ تولەم قابىلەتىن تەكسەرەدى. بۇل رەتتە, كەپىل م ۇلىك ونلاين باعالانادى.
الدىن الا ماقۇلداۋدى العان كەزدە فەرمەر كەپىل م ۇلىك جونىندەگى قۇجاتتارمەن بىرگە كورپوراتسيانىڭ فيليالىنا بارادى. ەگەر قانداي دا ءبىر سەبەپپەن كليەنت الدىن الا ماقۇلداۋدى الماسا (بانك نەمەسە باسقا قارجى ينستيتۋتى الدىنداعى مەرزىمى وتكەن بەرەشەك, سالىق, تەرىس نەسيە تاريحى جانە ت.ب.), فيليالعا بارۋدىڭ قاجەتى جوق.
«اگرارلىق نەسيە كورپوراتسياسى» اق باسقارما توراعاسىنىڭ ورىنباسارى رۋسلان تولەگەنوۆتىڭ ايتۋىنشا, بيزنەس ۇدەرىستى وڭتايلاندىرۋ – كورپوراتسيا قىزمەتىنىڭ ماڭىزدى باعىتىنىڭ ءبىرى. ءوتىنىمدى قاراۋدىڭ ەلەكتروندى فورماتى ادامي فاكتوردى ازايتادى. سونىمەن قاتار قاجەتتى قۇجاتتار سانى دا كەميدى. ونلاين نەسيەگە ءوتىنىم بەرۋ فەرمەردىڭ 10 مينۋتتان ارتىق ۋاقىتىن المايدى.
«نەسيەنى الدىن الا ونلاين ماقۇلداۋ تۋرالى ءوتىنىش بەرۋ ءۇشىن نە ىستەۋ كەرەك؟ ەگەر مال شارۋاشىلىعى نەمەسە ەگىنشىلىكتى دامىتۋعا قارجى العىڭىز كەلسە, agronesie.kz پلاتفورماسىنا كىرىپ, امبەباپ كەلىسىمگە قول قويىڭىز. ءوتىنىمدى جەكە كابينەت ارقىلى جولداڭىز. كەپىل بەرۋشىنىڭ دەرەكتەرىن ەنگىزىڭىز (جسن جانە تەلەفون ءنومىرى) جانە م ۇلىكتى الدىن الا ونلاين باعالاتىڭىز. ۇسىنىلعان كەپىل جەتكىلىكتى بولعان جاعدايدا جۇيە قارىزدى الدىن الا ماقۇلداۋ تۋرالى حابارلاما جىبەرىپ, اگرارلىق نەسيە كورپوراتسياسىنىڭ وبلىستىق فيليالىنا جۇگىنۋگە قاجەت قاجەتتى قۇجاتتاردىڭ تىزبەسىن جولدايدى», دەلىنگەن كورپوراتسيانىڭ رەسمي حابارلاماسىندا.
ەلىمىزدە «ىسكەردەن» بولەك فەرمەرلەرگە ءتيىمدى شارتتارمەن نەسيە ۇسىناتىن «كەڭ دالا» (جىلدىق ءتيىمدى سىياقى مولشەرلەمەسى 1,5 پايىزدان باستالادى) جانە «اگروبيزنەس» (1 ملن تەڭگەدەن 5 ملرد تەڭگەگە دەيىن بەرەدى) باعدارلامالارى دا بار.
بۇعان دەيىن ەلىمىزدە فەرمەرلەرگە اۋىل شارۋاشىلىعى تەحنيكالارىن جەڭىلدەتىلگەن ليزينگپەن بەرۋ باعدارلاماسى ىسكە قوسىلعان ەدى. ول ءۇشىن «جاسىل دامۋ» اق ەسەبىنەن – 30 ملرد, «قازاگروفينانس» اق ەسەبىنەن 10 ملرد تەڭگە قاراستىرىلعان. قازىرگە دەيىن باعدارلاما اياسىندا مىڭنان استام ءوتىنىم تىركەلىپ, سونىڭ 369-ى 16,6 ملرد تەڭگە سوماسىنا قارجىلاندىرىلعان. جالپى, قازاقستاندىق فەرمەرلەر جالپى قۇنى 43,6 ملرد تەڭگە بولاتىن 1 089 اۋىل شارۋاشىلىعى تەحنيكا بىرلىگىن الۋعا نيەتتى. بىراق باعدارلاماعا بولىنگەنى – 40 ملرد تەڭگە. سۇرانىستىڭ بۇل سومادان اسىپ كەتكەنىن ەسكەرىپ, مەملەكەت الداعى ۋاقىتتا قارجىلاندىرۋ كولەمىن ۇلعايتۋى دا بەك مۇمكىن.