مەملەكەت باسشىسىنىڭ كەزەكتى جولداۋى جالپىۇلتتىق رەفەرەندۋمنان كەيىن قازاقستاندىقتار ساياسي جاڭعىرتۋ باعىتىن قولداپ, ەلىمىز دامۋدىڭ جاڭا كەزەڭىنە اياق باسقان تۇستا بۇعان دەيىنگى جولداۋدىڭ زاڭدى جالعاسىنداي قابىلداندى. وسىنى ەسكەرسەك, كەلەسى قادام ەكونوميكانى نىعايتۋعا ارنالماق.
اسكەري ادامدار ءۇشىن دە وتباسىنىڭ ءال-اۋقاتىنىڭ ارتۋى ماڭىزدى بولىپ قالا بەرمەك. بۇل جاڭا باعدارلامالىق قۇجات ەلىمىزدىڭ باستى قۇندىلىعى – حالىققا ارنالعاندىقتان, ونى ءبىز ءسوزسىز قولدايمىز. وسىعان سايكەس, حالىقتىڭ مەملەكەتپەن قارىم-قاتىناسىن قايتا قالىپتاستىرۋ پروتسەسىندە مۇمكىندىكتەر تەڭدىگى مەن بارلىق ادامدار ءۇشىن ادىلەتتىلىك قامتاماسىز ەتىلەدى. ءبىرىنشى كەزەكتە, بۇل ۇلتتىق بايلىقتى ءادىل ءبولۋ جانە قازاقستاندىقتاردىڭ بارىنە بىردەي مۇمكىندىك بەرۋ. وسىنىڭ ءبارى ازاماتتارىمىزدىڭ ءال-اۋقاتىنىڭ ساپالى ءارى ينكليۋزيۆتى وسۋىنە بارىنشا مۇمكىندىك بەرۋگە ءتيىس.
جولداۋدا ۇلت دەنساۋلىعى مەن ساپالى ءبىلىم بەرۋ ماسەلەسىنە ايتارلىقتاي ءمان بەرىلگەن. حالىق دانالىعى «تاربيە تال بەسىكتەن باستالادى» دەيدى. مەملەكەت باسشىسى قاسىم-جومارت توقاەۆتىڭ ادىلەتتى قازاقستاندى قۇرۋدا مەكتەپ مۇعالىمدەرى شەشۋشى ءرول اتقاراتىنىن جايدان-جاي اتاپ وتكەن جوق. سوندىقتان جاڭا مەكتەپتەر سالۋ مەملەكەتتىك قۇرىلىمداردىڭ وزەكتى مىندەتتەرىنىڭ ءبىرى بولىپ قالا بەرەدى.
اتا زاڭىمىزدا جەر مەن تابيعي بايلىق حالىققا تيەسىلى ەكەنى ايتىلعان. بۇل قازاقستاندىق ءار وتباسىنىڭ ۇلتتىق بايلىقتىڭ قانداي دا ءبىر مولشەرىن پايدالانۋىنا كەپىلدىك بەرەدى. جولداۋدا پرەزيدەنت «بالالارعا ارنالعان ۇلتتىق قور» باعدارلاماسىن ۇسىندى. وسىعان سايكەس ۇلتتىق قوردىڭ جىل سايىنعى كىرىسىنىڭ 50 پايىزى 18 جاسقا دەيىنگى بالالاردىڭ ارنايى جيناقتاۋشى ەسەپ شوتتارىنا اۋدارىلاتىن بولادى. بۇل باستاما – وسكەلەڭ ۇرپاقتى قولداۋعا باعىتتالعان كومەك.
قاشاندا ەڭبەك ادامى حالىق اراسىندا قۇرمەتكە يە. سول سەبەپتى قوعامدا ءوز ءىسىنىڭ مامانىنا جانە ەڭبەكقور جاندارعا قۇرمەت كورسەتۋ باسىمدىق بولىپ قالا بەرمەك.
الايدا مەملەكەتتىك باسقارۋ جۇيەسى قايتا قۇرىلماسا, ەكونوميكالىق رەفورما جاساۋ مۇمكىن ەمەس. ەل پرەزيدەنتىنىڭ ساياسي قىزمەتكەرلەردىڭ جەكە جاۋاپكەرشىلىگىن ارتتىرا وتىرىپ, مەملەكەتتىك باسقارۋ جۇيەسىن ورتالىقسىزداندىرۋعا دەگەن ۇمتىلىسى وڭتايلى شەشىم بولدى.
رەفورمالار مەن جاڭارۋ باعىتىن نىق ۇستانا وتىرىپ, مەملەكەتتىلىكتى دايەكتى نىعايتا ءتۇسۋ – ۋاقىت تالابى. قاسىم-جومارت توقاەۆ ەل مۇددەسى بارىنەن جوعارى ەكەنىن كورسەتتى. مەملەكەت باسشىسى جاريا ەتكەن پرەزيدەنت مانداتىن 7 جىلعا, ءبىر عانا مەرزىمگە شەكتەۋ تۋرالى ۇسىنىسى حالىقتان قولداۋ تاپتى.
قازاقستاننىڭ بولاشاعى – قازاقستاندىقتاردىڭ ءوز قولىندا. حالىق پەن ارميانىڭ ءبىرتۇتاس ەكەنى بارىمىزگە ءمالىم. مەملەكەت باسشىسىنىڭ باستامالارى قارۋلى كۇشتەردى دامىتۋعا, ەلىمىزدىڭ قورعانىس قابىلەتىن نىعايتۋعا باعىتتالعانى انىق.
رۋسلان جاقسىلىقوۆ,
قورعانىس ءمينيسترى, گەنەرال-پولكوۆنيك