بۇگىندە «شاۋشەن» شارۋا قوجالىعىنىڭ يگىلىكتى تىرلىكتەرىن ءبىر جامبىل وبلىسىنىڭ جۇرتى عانا ەمەس, بۇكىل ەل بىلەدى. اعايىندى قالي, سايرامباي جانە مەيرامباي دونەنباەۆتاردىڭ ەلگە جاساپ وتىرعان جاقسىلىقتارىن, قايىرىمدى ىستەرىن بۇل جاقتىڭ ادامدارى اڭىز قىپ ايتادى. شىنىندا «اۋىلىنا قاراپ ازاماتىن تانى» دەگەن, بۇل ازاماتتاردىڭ كىندىك قانى تامعان اق باستى الاتاۋدىڭ ەتەگىندە جاتقان جارلىسۋ بۇل كۇندە ءتورت قۇبىلاسى ساي, ەڭ اجارلى, كورىكتى اۋىلدىڭ ءبىرى دەسە دە بولعانداي.
اعايىندى ىسكەر جىگىتتەر مال شارۋاشىلىعىن دامىتىپ, اۋىل جاستارىنا جۇمىس تاۋىپ بەرىپ وتىرسا, قايبىر جىلى ءار مالشىسىنا جەكە-جەكە ءۇي, قورا-قوپسى سوعىپ بەرىپ, ەلدىڭ ۇلكەن العىسىن العان. دونەنباەۆتاردىڭ ەلگە جاساپ جۇرگەن جاقسىلىقتارى ءبىر بۇل عانا ەمەس. وسى اۋىل تورىنەن ورىن تەپكەن ايى اسپانمەن تالاسقان اللا ءۇيى, مەدرەسە, ەكى قاباتتى ينتەرنات ءۇيى, مەكتەپ (قارجىلاي كومەك كورسەتكەن), ءبارى-ءبارى وسى ءجىگىتتەردىڭ دەمەۋشىلىگى ارقاسىندا پايدا بولدى. قازىر بۇل ەڭسەلى عيماراتتار كوزدىڭ جاۋىن الىپ, جاپ-جاسىل اۋىلدىڭ كوركىن تىپتەن اشىپ تۇر.
ەندى, مىنە, جەڭىس مەرەكەسى كۇنى «شاۋشەن» شارۋا قوجالىعىنىڭ توراعاسى سايرامباي دونەنباەۆ جارلىسۋ اۋىلىنان 1932-1933 جىلدارداعى اشارشىلىق قۇرباندارى جانە 1941-1945 جىلدارداعى ۇلى وتان سوعىسى جاۋىنگەرلەرىنە ارنالعان ەسكەرتكىش اشتى. ەسكەرتكىش ماڭى ابباتتاندىرىلىپ, سۋبۇرقاق ورناتىلىپ, بۇل ىسكە باس-اياعى 50 ميلليون تەڭگە جۇمسالدى. ەلدى جاپپاي اشارشىلىق جايلاعان سول ءبىر زۇلمات جىلدارى وسى ءتوڭىرەكتەگى اۋىلداردان نەبارى 70-تەي وتباسى عانا امان قالعان ەكەن. ال ۇلى وتان سوعىسى باستالعاندا جارلىسۋدان 200-گە جۋىق ازامات مايدانعا اتتانىپ, سونىڭ 80-گە جۋىعى عانا قايتا ورالىپتى. «بۇل ەسكەرتكىش سول مارقۇمدارعا دەگەن قۇرمەت. سۇيەكتەرى ءار قيىردا قالعان سول بوزداقتاردى بۇگىنگى جاستار ەسكە الىپ, وسى ەسكەرتكىشكە كەلگەن سايىن رۋحتارىنا قۇران باعىشتاپ ءجۇرسىن. كەيىنگى ۇرپاق ەلدىڭ باسىنان قانداي قيىن جاعدايلاردىڭ وتكەنىن سەزىنىپ, قانشاما ازاماتتارىمىزدىڭ ەلدى قورعاۋدا ايانباي كۇرەسكەنىن ءبىلسىن. سولاردىڭ ەرلىگى جاس ۇرپاققا ونەگە بولسىن دەگەن نيەتپەن وسى ەسكەركىشتى اشتىق», دەيدى بۇل جونىندە سايرامباي دونەنباەۆ.
مىنە, وسىنداي اتپال ازاماتتار تۇرعاندا اۋىل ەڭسەسى ەشقاشان تومەن تۇسپەسە كەرەك. «ءولى ريزا بولماي, ءتىرى بايىمايدى» دەگەن, بۇل كۇنى جارلىسۋ اۋىلىندا ارۋاقتارعا اس بەرىلىپ, قۇران باعىشتالىپ, جيىن سوڭى قازاقتىڭ ۇلتتىق ويىنى كوكپارعا ۇلاستى.
ورالحان ءداۋىت,
«ەگەمەن قازاقستان».
جامبىل وبلىسى.