ءماجىلىس ۆيتسە-سپيكەرى, «نۇر وتان» پارتياسى فراكتسياسىنىڭ جەتەكشىسى داريعا نازارباەۆانىڭ تورايىمدىق ەتۋىمەن ەكونوميكانىڭ قارجى سەكتورىن دامىتۋعا, سونىڭ ىشىندە, قارجى سەكتورىن دامىتۋدىڭ 2030 جىلعا دەيىنگى تۇجىرىمداما جوباسىنا قاتىستى «نۇر وتان» پارتياسى فراكتسياسىنىڭ كەڭەيتىلگەن جينالىسى ءوتتى.
وعان ۇلتتىق بانك توراعاسى قايرات كەلىمبەتوۆ قاتىستى. قازاقستاننىڭ قارجىلىق جۇيەسىن دامىتۋ تۇراقسىز سيپاتقا يە جانە بىرقاتار پروبلەمالاردىڭ ورىن الۋىنا بايلانىستى كۇردەلەنە تۇسۋدە. بانك سەكتورىنىڭ شاعىن جانە ورتا بيزنەستى قارجىلاندىرۋ ۇردىسىنە جەتكىلىكتى تۇردە تارتىلماۋى, جوعارى تاۋەكەلدى تۇتىنۋشىلىق نەسيەلەردىڭ ءوسۋى, ءىجو ساقتاندىرۋ ۇيىمدارى اكتيۆتەرى ۇلەسىنىڭ ازدىعى, سونداي-اق, قۇندى قاعاز نارىعىنىڭ تومەنگى وتىمدىلىگى قازاقستان رەسپۋبليكاسى قارجى سەكتورىن دامىتۋدىڭ 2030 جىلعا دەيىنگى تۇجىرىمداماسىن جاساۋعا سەبەپ بولدى.
تۇجىرىمدامانىڭ باستى ماقساتى – ەكونوميكالىق ىنتىماقتاستىق جانە دامۋ ۇيىمى ستاندارتتارىن قوسا وتىرىپ, ۇزدىك حالىقارالىق ستاندارتتار بازاسىندا ەكونوميكادا رەسۋرستاردى قايتا بولۋدە ونىڭ تيىمدىلىگىن ارتتىرۋ جانە باسەكەگە قابىلەتتى قارجىلىق سەكتور قۇرۋ.
قازاقستان رەسپۋبليكاسىنىڭ قارجى سەكتورىن دامىتۋدىڭ 2030 جىلعا دەيىنگى تۇجىرىمداماسى ءتومەندەگى مىندەتتەردى جۇزەگە اسىرۋدى كوزدەيدى:
1) قانداي دا ءبىر قىسىلتاياڭ كەزدە مەملەكەتتىڭ جانە قوعامنىڭ قارجى جۇيەسىنىڭ تۇراقتىلىعىن قامتاماسىز ەتۋدەگى قيىندىعىن ازايتۋ;
2) ەكونوميكالىق ينتەگراتسيا كەزىندە قارجى سەكتورىنىڭ باسەكەگە قابىلەتتىلىگىن ارتتىرۋ;
3) قارجى جۇيەسىنىڭ ساپالى دامۋى ءۇشىن ينفراقۇرىلىمدى جەتىلدىرۋ جانە جاعىمدى جاعداي جاساۋ;
4) قارجى ونىمدەرى تۇرعىسىنان ەكونوميكانىڭ قاجەتتىلىگىنە جاۋاپ بەرەتىن قارجى سەكتورى ءوسىمىنىڭ رەسۋرسىن ارتتىرۋ;
5) تەپە-تەڭ ەكونوميكالىق جاعدايدى قامتىپ, ەكونوميكاداعى نەسيە تاۋەكەلىن ازايتۋ.
ۇلتتىق بانك توراعاسى قارجىلىق جۇيەنىڭ قازىرگى جاعدايى جانە بولاشاق باسىم باعىتتار تۋرالى جان-جاقتى باياندادى. ءماجىلىس دەپۋتاتتارى بىرقاتار پروبلەمالىق ماسەلەلەر كوتەردى. ولاردىڭ ويىنشا, اتالعان ماسەلەلەرگە قارجىلىق سەكتوردى دامىتۋ تۇجىرىمداماسى جوباسىندا ءتيىستى دەڭگەيدە كوڭىل بولىنبەگەن. زەينەتاقى اكتيۆتەرىن بجزق ورنالاستىرۋ جانە باسقارۋ تۋراسىندا دا ناقتىلىق جوق, بجزق قور نارىعىن دامىتۋعا جانە بانكتەردى ۇزاق مەرزىمدى قورلاندىرۋعا قاتىسا ما, جوق پا؟
بۇگىنگى كۇنى كورپوراتيۆتىك سەكتوردا نەسيەلەردىڭ تۇراقتى جوعارى وسۋىنە قول جەتكىزۋ مەملەكەت ءۇشىن باستى باعىتتاردىڭ ءبىرى بولىپ تابىلادى. ال تۇجىرىمدامادا وسى ماقساتقا جەتۋدىڭ جوسپارى, وعان سۇرانىستى ارتتىرۋ شارالارى, نەسيەلەر بويىنشا پايىزدىق مولشەرلەمەنى ازايتۋ, باسقا دا جاعدايلار ناقتى كورسەتىلمەگەن.
وسى ءتارىزدى كوپتەگەن ساۋالدارعا ۇلتتىق بانك ءتوراعاسى قايرات كەلىمبەتوۆ جاۋاپ بەردى.