قازاقستاننىڭ جۇپتىق سىنداعى ءبىرىنشى, الەمنىڭ 19-راكەتكاسى اننا دانيلينا اقش اشىق چەمپيوناتىنىڭ شيرەك فينالىنا شىعا المادى, دەپ حابارلايدى Egemen.kz.
دانيلينا برازيليالىق بەاتريس حادداد مايامەن بىرگە جارىستىڭ 8-راكەتكالارى بولىپ تىركەلگەن ەدى. قازاقستاندىق-برازيليالىق جۇپ ءۇشىنشى اينالىمدا دودانىڭ 10-راكەتكالارى, امەريكالىق نيكول مەليچار-مارتينەس – اۋستراليالىق ەللەن پەرەسپەن شەبەرلىك بايقاستى.
ءبىر ساعاتتان استام ۋاقىتقا سوزىلعان باسەكەدە امەريكالىق-اۋستراليالىق دۋەت 6:3, 6:3 ەسەبىمەن جەڭىسكە جەتتى. جاسوسپىرىمدەردەن ارۋجان ساعىندىقوۆا جارىس جولىن جالعاستىرۋدا. ىرىكتەۋ سايىستارىنان وتكەن ول چەمپيوناتتىڭ العاشقى اينالىمىندا بۇگىن امەريكالىق ليۆ حوۆدەمەن كورتقا شىعادى.