ەلىمىزدە 2012 جىلدان باستاپ ادام قۇقىقتارىن قورعاۋدىڭ حالىقارالىق جانە ۇلتتىق تەتىكتەرىن تالقىلاۋعا ارنالعان سەمينار-ترەنينگتەر وتكىزىلىپ كەلەدى. قالىپتاسۋ ۇستىندەگى داستۇرگە ساي, كەشە باتىس قازاقستان وبلىستىق اكىمدىگىندە وسىنداي ىرگەلى دە كوكەيكەستى ماسەلەنى وزەك ەتكەن باسقوسۋ مارەگە جەتتى. قازاقستان پرەزيدەنتى جانىنداعى ادام قۇقىقتارى جونىندەگى كوميسسيا حاتشىسى تاستەمىر ابىشەۆ جەتەكشىلىك ەتكەن سەمينار-ترەنينگكە مەملەكەتتىك قىزمەتشىلەر مەن وڭىردەگى ۇكىمەتتىك ەمەس ۇيىمداردىڭ وكىلدەرى قاتىستى.
دوڭگەلەك ۇستەل ۇلگىسىندە ورىستەگەن شارا بارىسىندا وعان قاتىسۋشىلار بىرىككەن ۇلتتار ۇيىمىنىڭ ادام قۇقىقتارى سالاسىنداعى باقىلاۋ فۋنكتسيالارىمەن تانىستى. بۇگىندە ادام قۇقىقتارى جونىندەگى حالىقارالىق كونۆەنتسيامەن قۇرىلعان باقىلاۋ ورگاندارىنىڭ قۇزىرلارى كوپشىلىكتىڭ بارىنە بىردەي ءمالىم ەمەستىگى دە جاسىرىن ەمەس. ءوزارا پىكىر الماسۋ ساتىندە بۇل ماسەلە جونىندە دە ناقتى مىسالدار كەلتىرىلدى. ازاماتتاردىڭ جەكە ارىزدارى بۇۇ-نىڭ ادام قۇقىقتارى جونىندەگى كوميتەتىندە قارالۋ تەتىكتەرى دە وقىرمانداردى ەنجار قالدىرا قويمايتىن شىعار. سەميناردا بۇعان قاتىستى دا تولىققاندى جاۋاپتار قايتارىلدى.
ءيا, بۇگىندە مەملەكەتىمىزدە ادام قۇقىقتارىن قورعاۋدىڭ ۇلتتىق جۇيەسى ورنىعىپ كەلەدى. ونىڭ اياسىن تەك ءبىر عانا مەملەكەتتىك ورگاندارمەن نەمەسە سوت جۇيەسىمەن شەكتەي سالۋعا بولمايدى. ءبىر سوزبەن ايتقاندا, مۇنداي ۇلگىدەگى ۇلتتىق جۇيە دەگەنىمىز – ادام قۇقىقتارىن قورعايتىن بارلىق ينستيتۋتتاردىڭ ءبىر-بىرىمەن ءوزارا قارىم-قاتىناسى مەن ۇيلەسىمى دەگەن ءسوز. بۇل جونىندە قازاقستان پرەزيدەنتى جانىنداعى ادام قۇقىقتارى جونىندەگى كوميسسيا مۇشەسى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى, زاڭ عىلىمدارىنىڭ دوكتورى ەڭلىك نۇرعاليەۆا ورامدى وي قوزعادى.
قازىرگى كۇنى رەسپۋبليكا ازاماتتارىنىڭ نەمەسە ەل اۋماعىندا تۇراقتى, ياكي ۋاقىتشا تۇرىپ جاتقان وزگە دە ادامداردىڭ ەڭبەك جانە الەۋمەتتىك-ەكونوميكالىق قۇقىقتارىن قورعاۋ ماسەلەلەرى دە وزەكتى بولىپ وتىر. سونداي-اق, قازىرگى كەزدە ءارتۇرلى ەڭبەك جانجالدارىن وڭتايلى شەشۋدىڭ جانە الەۋمەتتىك سەرىكتەستىكتى ورنىقتىرۋدىڭ تەتىكتەرى كوپ جاعدايلاردا ەلىمىزدىڭ كاسىپوداقتارى فەدەراتسياسىنا دا جاۋاپتى مىندەتتەر جۇكتەيدى. بۇعان قاتىستى كوميسسيا مۇشەسى قايرات اماندىقوۆ ەگجەي-تەگجەيلى اڭگىمەلەپ بەردى.
سەمينار-ترەنينگكە قاتىسۋشىلار ادام قۇقىقتارىن قورعاۋ مەن كوتەرمەلەۋ ماسەلەلەرى بويىنشا ءوزارا وي-پىكىر الماسىپ, بۇعان دەيىنگى جيناقتاعان تاجىريبەلەرىن ورتاعا سالدى. ونى كوميسسيا حاتشىسى تاستەمىر ابىشەۆ قورىتىندىلاپ, ءتيىستى ءتۇيىن جاسادى.
تەمىر قۇسايىن,
«ەگەمەن قازاقستان».
ورال.