پارلامەنت سەناتىنىڭ توراعاسى ماۋلەن اشىمباەۆ قوستاناي وبلىسىنداعى الاپات ءورت كەزىندە قازا تاپقان مارقۇمنىڭ وتباسى مەن جاقىندارىنا كوڭىل ايتىپ, قيىن جاعدايعا تاپ بولعان حالىققا قولداۋ ءبىلدىرىپ, قالىڭ جۇرتتى بىرلىككە شاقىردى.
«قوستاناي وبلىسىنداعى توتەنشە جاعداي ءبارىمىزدى الاڭداتىپ وتىر. ءتىلسىز جاۋدىڭ وڭىرگە ايتارلىقتاي سالدارىن تيگىزۋدە. تۇرعىن ۇيلەر, ورمان مەن اۋىلشارۋاشىلىق جەرلەرى وتقا وراندى. وكىنىشكە قاراي, ادام شىعىنى دا تىركەلدى. قازا تاپقان ازاماتتىڭ جاقىندارى مەن تۋعان-تۋىستارىنا قايعىلارىنا ورتاقتاسىپ, كوڭىل ايتامىز.
مەملەكەت باسشىسىنىڭ تاپسىرماسىمەن اپاتتى اۋىزدىقتاۋ ءۇشىن ارنايى جەدەل شتاب قۇرىلعانى بەلگىلى. ۇكىمەتكە توتەنشە جاعداي سالدارىن جويۋ ءۇشىن قاجەتتى قاراجات ءبولۋ جانە باسپانالارىنان ايىرىلعان ازاماتتارعا ارناپ جاڭا تۇرعىن ۇيلەر سالۋ جۇمىسىن جەدەل باستاۋ جونىندە تاپسىرما بەرىلدى.
اپاتپەن كۇرەس جۇمىستارىنا پارلامەنت سەناتى دا ءوز ۇلەسىن قوسادى. قوستاناي وبلىسىنان سايلانعان سەناتورلار جەدەل شتابتىڭ جۇمىسىنا اتسالىسۋدا. سونداي-اق سەنات دەپۋتاتتارى زارداپ شەككەندەرگە كومەك رەتىندە ءبىر كۇندىك جالاقىلارىن اۋدارادى.
وسىنداي جاعدايدا بىرلىگىمىزدى تانىتىپ, جۇدىرىقتاي جۇمىلۋ اسا ماڭىزدى. زارداپ شەككەندەردىڭ ساۋىعىپ كەتۋلەرىن جانە جاعدايدىڭ تەزىرەك تۇراقتالۋىن تىلەيمىز», دەلىنگەن الەۋمەتتىك جەلىدەگى جازبادا.